រដ្ឋាភិបាលប្រកាសឱ្យអនុវត្តក្រប​ខណ្ឌ​យុទ្ធសាស្ត្រនៃកម្មវិធីកែទម្រង់ច្បាប់ ដើម្បីពង្រឹងមុខងារនីតិកម្ម

នៅព្រឹកថ្ងៃទី១០ ខែកក្កដា ឆ្នាំ២០២៥នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសដាក់ឱ្យអនុវត្តក្របខណ្ឌយុទ្ធសាស្ត្រ​នៃ​កម្មវិធី​កែទម្រង់ច្បាប់របស់រាជរដ្ឋាភិបាល ដើម្បីជំរុញការអនុវត្តការងារកែទម្រង់ច្បាប់ និងពង្រឹងមុខងារនីតិកម្ម។

បើតាមលោកឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួល​បន្ទុក​ទីស្តីការគណៈរដ្ឋមន្ត្រី «ក្របខណ្ឌយុទ្ធ​សាស្ត្រនៃកម្មវិធីកែទម្រង់ច្បាប់របស់រាជរដ្ឋាភិបាល» ត្រូវបានរៀបចំឡើងដោយគណៈកម្មាធិការដឹកនាំការកែទម្រង់ច្បាប់ ដែលក្របខណ្ឌយុទ្ធ​សាស្ត្រនេះជាមគ្គុទេសក៍បង្ហាញផ្លូវ ក្នុងការដឹកនាំ សម្របសម្រួល ការផ្តល់ប្រឹក្សា ការតាក់តែង ការត្រួតពិនិត្យការអនុវត្ត និងការដោះស្រាយវិវាទនៃច្បាប់ ធ្វើយ៉ាងណាធានាប្រសិទ្ធភាព និងស័ក្ដិសិទ្ធភាព​នៃ​ការ​អនុវត្តច្បាប់ ស្របតាមចក្ខុវិស័យ និងយុទ្ធសាស្ត្រកែទម្រង់ច្បាប់។

ចក្ខុវិស័យ និងយុទ្ធសាស្ត្រកែទម្រង់ច្បាប់ បានកំណត់ដាក់​ចេញ​យុទ្ធសាស្ត្រគន្លឹះចំនួន៤ គឺ១)ដឹកនាំ និងសម្រប​សម្រួល​ចង​ក្រង និងផ្សព្វផ្សាយច្បាប់ និងលិខិតបទដ្ឋានគតិយុត្ត ២) ដឹកនាំ និង​សម្របសម្រួលរៀបចំក្របខណ្ឌតាក់តែងច្បាប់ និងលិខិតបទដ្ឋានគតិយុត្ត ៣) ដឹកនាំ និងសម្របសម្រួលពិនិត្យ និងវាយតម្លៃគុណភាព​ និងប្រសិទ្ធ​ភាពនៃការតាក់តែងនិងការអនុវត្តច្បាប់និងលិខិតបទដ្ឋានគតិយុត្ត និង៤) ដឹកនាំនិងសម្របសម្រួលរៀបចំក្របខ័ណ្ឌ​ដោះស្រាយវិវាទ​គតិយុត្ត​ និងការពារនីត្យានុកូលភាព។

ឧបនាយករដ្ឋមន្ត្រីប្រចាំការ វង្សី វិស្សុត បន្តឱ្យដឹងថា ក្របខណ្ឌយុទ្ធសាស្ត្រនៃកម្មវិធីកែទម្រង់ច្បាប់របស់រាជរដ្ឋាភិបាលនេះ ត្រូវបានរៀបចំ និង​ដាក់​ឆ្លងកិច្ចប្រជុំក្នុងក្របខណ្ឌនៃគណៈកម្មាធិការដឹកនាំការកែទម្រង់ច្បាប់កាលពី​ថ្ងៃ​ទី៩ ខែកញ្ញា ឆ្នាំ២០២៤ និងដាក់ពិភាក្សាយ៉ាងទូលំទូលាយក្នុងសិក្ខាសាលាថ្នាក់​ជាតិ កាលពីថ្ងៃទី១៦ ខែធ្នូ ឆ្នាំ២០២៤ ដោយមានសមាសភាពចូលរួមពីតំណាងក្រសួងស្ថាប័ន វិជ្ជាជីវករច្បាប់ សាស្ត្រាចារ្យនីតិសាស្ត្រ អ្នកជំនាញការជាតិ និងអន្តរជាតិ។

ជាអធិបតីភាពនៅក្នុងពិធីនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងគូសរំលេចថា ក្របខណ្ឌយុទ្ធសាស្ត្រ​នៃកម្មវិធី​កែ​ទម្រង់​ច្បាប់របស់រាជរដ្ឋាភិបាល គឺជាមគ្គុទេសក៍បង្ហាញផ្លូវដំបូងក្នុងការដឹកនាំ គ្រប់គ្រង និងការ​អនុវត្ត​ការងារទាក់ទងនឹងការកែទម្រង់ច្បាប់ គឺសំដៅកែទម្រង់ច្បាប់កម្ពុជាឱ្យទៅជាប្រព័ន្ធច្បាប់មួយមានឯកភាព ប្រសិទ្ធភាព សមានគតិភាព ឧត្តមានុភាពគតិយុត្ត និងសន្តិសុខគតិយុត្ត ស្របតាម​ឧត្តមានុវត្តន៍អន្តរជាតិ និងបរិការណ៍កម្ពុជា៕