ព័ត៌មានជាតិ

ឆមាសទី ១ ឆ្នាំ ២០២៥ ទេសចរអន្តរជាតិមកកម្សាន្តខេត្តសៀមរាបមានជាង ៥ សែននាក់ កើនឡើង ៨% ធៀបឆ្នាំ ២០២៤

បានផុស

១ year មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

របាយការណ៍របស់មន្ទីរទេសចរណ៍ខេត្តសៀមរាបបង្ហាញថា ក្នុងឆមាសទី ១ ឆ្នាំ ២០២៥ ខេត្តសៀមរាបទទួលបានភ្ញៀវទេសចរបរទេសកើនឡើងប្រមាណ ៨% បើប្រៀបធៀបរយៈពេលដូចគ្នាក្នុងឆ្នាំ ២០២៤។

ក្នុងឆមាសទី ១ ឆ្នាំ ២០២៥ ភ្ញៀវទេសចរអន្តរជាតិមកកម្សាន្តខេត្តសៀមរាបមានចំនួន ៥៦៧ ៦៧៣ នាក់ កើនឡើង ៨.៧៦% បើប្រៀបធៀបរយៈពេលដូចគ្នាឆ្នាំ ២០២៤ ដែលមានចំនួន ៥២១ ៩៥០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់មន្ទីរទេសចរណ៍ខេត្តសៀមរាប ក៏បានបង្ហាញពីកំណើនភ្ញៀវទេសចរក្នុងស្រុកក្នុងឆមាសទី ១ ឆ្នាំ ២០២៥ កើនឡើងប្រមាណ ៥០.៩១% បើប្រៀបធៀបនឹងរយៈពេលដូចគ្នាឆ្នាំ២០២៤។

ពាក់ព័ន្ធកំណើនភ្ញៀវទេសចរមកខេត្តសៀមរាប បើតាមមន្រ្តីអាកាសយានដ្ឋានអន្តរជាតិសៀមរាបអង្គរបានឲ្យដឹងថា ការធ្វើដំណើរតាមផ្លូវអាកាសក៏មានការកើនឡើង ក្រោយមានការបើកជើងហោះហើរថ្មីៗតភ្ជាប់មកអាកាសយានដ្ឋានសៀមរាបអង្គរ។

លោក យឹម សានីរាន មន្ត្រីសម្របសម្រួលនៅអាកាសយានដ្ឋានសៀមរាបអង្គរបានប្រាប់ដល់កម្ពុជាថ្មីថា លោកសង្កេតឃើញមានកំណើនភ្ញៀវធ្វើដំណើរតាមយន្តហោះមានការកើនឡើងមួយរយៈចុងក្រោយនេះ ក្រោយមានការតភ្ជាប់ជើងហោះហើរថ្មីៗមកអាកាសយានដ្ឋានសៀមរាបអង្គរ។

លោកបានលើកឡើងពីការវិវឌ្ឍនថ្មីៗក្រោយក្រុមហ៊ុនអាកាសចរណ៍ Emirate បើកការហោះហើរពីខេត្តសៀមរាបទៅទីក្រុងឌុយបៃ ៣ ជើង ក្នុងមួយសប្តាហ៍។ ខណៈថ្មីៗនេះទៀត ក៏មានការបង្កើនជើងហោះហើរពីខេត្តសៀមរាបទៅទីក្រុងបាងកក និងពីទីក្រុងបាងកកមកខេត្តសៀមរាប ក្រោយមានការបិទខ្ទប់ព្រំដែនគោករវាងប្រទេសទាំងពីរ។

បន្ថែមពីនេះ បើតាមលោក យឹម សានីរាន តាមព័ត៌មានដែលលោកទទួលបាននៅអំឡុងខែកក្កដានេះ ក្រុមហ៊ុនអាកាសចរណ៍ Air Cambodia ក៏នឹងបើកការហោះហើរពីខេត្តសៀមរាបទៅទីក្រុងសិនជិនប្រទេសចិន ដែលនឹងរុញកំណើនភ្ញៀវទេសចរធ្វើដំណើរតាមផ្លូវអាកាសមកខេត្តសៀមរាបកើនឡើងថែមទៀត៕