កម្ពុជាបន្តបណ្ដេញជនជាតិវៀតណាម៤៥នាក់ទៀតចេញពីប្រទេស

អគ្គនាយកដ្ឋានអន្តោប្រវេសន៍ បន្តបណ្ដេញជនជាតិវៀតណាម ដែលពាក់ព័ន្ធករណីលួចឆ្លងដែន និងស្នាក់នៅធ្វើការដោយខុសច្បាប់ចំនួន៤៥នាក់បន្ថែមទៀតចេញពីប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរបាយការណ៍របស់អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ជនជាតិវៀតណាមដែលបានបណ្ដេញចេញក្នុងចំណោមទាំង៤៥នាក់នេះមានស្ត្រី១០នាក់ ដែលក្នុងនោះទទួលបានពីនាយកដ្ឋានច្រកទ្វារទី១ ស្នងការដ្ឋាននគរបាលខេត្តស្វាយរៀង និងស្នងការដ្ឋាននគរបាលរាជធានីភ្នំពេញ។

ការអនុវត្តនីតិវិធីបណ្ដេញចេញនេះ គឺបានធ្វើឡើងតាមរយៈប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង កាលពីថ្ងៃទី១៦ ខែកក្កដា ឆ្នាំ២០២៥ តាមការណែនាំរបស់លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ និងលោកឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍។

កាលពីថ្ងៃទី៨ ខែកក្កដា ឆ្នាំ២០២៥កន្លងទៅ អនុវត្តតាមច្បាប់អន្តោប្រវេសន៍ អគ្គនាយកដ្ឋានអន្តោប្រវេសន៍ ក៏ទើបបានបណ្ដេញជនជាតិវៀតណាមចំនួន៦៥នាក់ចេញពីប្រទេសផងដែរ ហើយការបណ្ដេញចេញជនបរទេសពីប្រទេសនេះ ក៏ត្រូវបានអនុវត្តជាប់ជាប្រចាំផងដែរ។ ជាក់ស្ដែង រយៈពេល៦ខែ ឆ្នាំ២០២៥ ជនបរទេសជិត៥ពាន់នាក់ មាន៨៨សញ្ជាតិ ត្រូវបានអនុវត្តនីតិវិធីបណ្ដេញចេញពីកម្ពុជាទៅកាន់ប្រទេសកំណើតរៀងៗខ្លួន ក្រោយរកឃើញប្រព្រឹត្តបទល្មើសលួចឆ្លងដែនចូលមកធ្វើការដោយខុសច្បាប់ ឬប្រព្រឹត្តបទល្មើសនានា៕