ថៃមិនទាន់ដោះលែងកងទ័ពកម្ពុជាទាំង២០រូប ដែលថៃបានចាប់ខ្លួននៅឡើយទេ គិតត្រឹមល្ងាចនេះ

មកដល់ពេលនេះ ភាគីថៃមិនទាន់បានដោះលែងកងទ័ពកម្ពុជាទាំង២០រូប ដែលថៃបានចាប់ខ្លួននៅឡើយទេ គិតត្រឹមល្ងាចនេះ។ អ្នកនាំពាក្យក្រសួងការពារជាតិកម្ពុជា អះអាងដូច្នេះក្នុងសន្និសីទសារព័ត៌មាន នាល្ងាចថ្ងៃទី៣១ ខែកក្កដានេះ។

លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានទទូចដល់ភាគីថៃ ធ្វើយ៉ាងណាឱ្យឆាប់បញ្ជូនកងកម្លាំងរបស់កម្ពុជា ដែលយោធាថៃបានចាប់យកទៅនោះត្រឡប់មកកម្ពុជាវិញ រួមទាំងកងកម្លាំងផ្សេងទៀតប្រសិនបើមាន។

អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បញ្ជាក់ថា កម្ពុជាកំពុងបន្តចរចាឱ្យអស់ពីលទ្ធភាពជាមួយភាគីថៃ ដើម្បីឱ្យមានការដោះលែងកងកម្លាំងកម្ពុជាទាំង២០នាក់ដែលភាគីថៃបានចាប់ជាចំណាប់ខ្មាំង ឱ្យពួកគេអាចត្រលប់មកកម្ពុជាវិញបានឆាប់បំផុត និងដោយសុខសុវត្ថិភាព៕

ដោយ៖ ធឿន វ៉ាន់សុង