ក្រសួងរៀបចំដែនដី ប្រកាស​បញ្ចប់ការរៀបចំប្រព័ន្ធ​ឌីជីថល ផ្តល់សេវាគាប់ចិត្ត​ដល់ពលរដ្ឋ​

ក្រសួងរៀបចំដែនដី នគរូបនីយកម្ម និងសំណង់ បានប្រកាស​បញ្ចប់ការរៀបចំប្រព័ន្ធឌីជីថល សម្រាប់ផ្តល់សេវាគាប់ចិត្តជូនដល់​ពលរដ្ឋ​កម្ពុជា។

ក្រសួងរៀបចំដែនដី នគរូបនីយកម្ម និងសំណង់បាន​បញ្ជាក់ថា បន្ទាប់ពីរៀបចំប្រព័ន្ធថ្នាលឌីជីថលរួចរាល់ ក្រសួងនឹងបន្តដាក់សេវាដែលមានសរុបប្រមាណជិត ១ ០០០ មុខ ទៅក្នុងប្រព័ន្ធអនឡាញ និងធ្វើការបណ្តុះបណ្តាល​អតិថិជន ដែល​ជាស្ថាប័នក៏ដូចជាប្រជាពលរដ្ឋអាចរៀនប្រើប្រាស់សម្រាប់ជាប្រយោជន៍ក្នុងតម្រូវការជីវភាពប្រចាំថ្ងៃ។

បើតាម​មន្រ្តីជំនាញ តាមរយៈ​ការធ្វើទំនើបកម្មនៃការផ្តល់សេវាសាធារណៈតាមប្រព័ន្ធឌីជីថលអនុវត្តបានកាន់តែពេញលេញ​ នឹង​​ជំរុញបង្កើនដល់​​ចំណូលថវិកាជាតិកើនឡើង​ថែម​ទៀត។

ក្នុងយុទ្ធសាស្រ្តបញ្ចកោណដំណាក់កាលទី១ និងស្របតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ នៅក្នុងអាណត្តិទី៧ នៃរាជរដ្ឋាភិបាល ក្រសួងរៀបចំដែនដី នគរូបនីយកម្ម និងសំណង់ បានកំពុង​អនុវត្តនូវគោលនយោបាយសេវាគាប់ចិត្ត តាមរយៈការធ្វើទំនើបកម្មប្រព័ន្ធបច្ចេកវិទ្យាព័ត៌មាន និងការធ្វើ​ឌីជីថលភាវូបនីយកម្មកិច្ចការសាធារណៈរបស់រដ្ឋ ដើម្បីពង្រឹងប្រសិទ្ធភាពការងារ និងការផ្តល់សេវាសាធារណៈ ក្នុងគោលដៅឆ្ពោះទៅសម្រេចបាននូវគោលនយោបាយគន្លឹះ ក្នុងការចុះបញ្ជីដីបង្ហើយ សេវាគាប់ចិត្ត និងបរិយាកាស​គ្មានវិវាទ។

ក្នុងការអនុវត្តនូវគោលនយោបាយសេវាគាប់ចិត្ត ក្រសួងបានប្រែក្លាយការផ្ដល់សេវាសាធារណៈទៅជាប្រព័ន្ធឌីជីថល តួយ៉ាងដូចជាសេវាលក់ផ្ដាច់ អំណោយផ្ដាច់ ហ៊ីប៉ូតែក និងបញ្ចាំ ដែលបានប្រតិភូកម្មឱ្យមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានី-ខេត្ត៕