ព័ត៌មានជាតិ

ក្រុងសំពៅពូនសិក្សាសាងសង់ស្ពានឆ្លងទន្លេបាសាក់ តភ្ជាប់សង្កាត់ចំនួនពីរជាប់ព្រំដែនវៀតណាម

បានផុស

១១ ខែ មុន

នៅ

ថ្ងៃពុធ ៣ កញ្ញា ២០២៥

ដោយ

Dy Bunnara

ស្ពានឆ្លងកាត់ទន្លេបាសាក់ កំពុងត្រូវបានសិក្សាដើម្បីសាងសង់តភ្ជាប់សង្កាត់ចំនួនពីរក្នុងក្រុងសំពៅពូនជាប់ព្រំដែនវៀតណាម។

លោក អេង សុវិចិត្ត អភិបាលក្រុងសំពៅពូនបានគូសបញ្ជាក់ថា គម្រោងសាងសង់ស្ពាននេះស្ថិតនៅក្នុងដំណាក់កាលសិក្សានៅឡើយ។

លោកថា សង្កាត់សំពៅពូននិងសង្កាត់ជ្រៃធំខណ្ឌចែកដោយទន្លេ ហើយការធ្វើដំណើរកន្លងទៅត្រូវប្រើទូកដចម្លង ឬត្រូវធ្វើដំណើរវាងតាមស្ពានកោះធំដែលមានចម្ងាយឆ្ងាយ។

ខណៈគម្រោងសាងសង់ស្ពាននេះស្ថិតនៅក្នុងដំណាក់កាលសិក្សា លោករំពឹងថា បើសិនស្ពាននេះត្រូវបានកសាងឡើងនឹងជួយសម្រួលដល់ការធ្វើដំណើរនិងការដឹកជញ្ជូន រួមទាំងផ្តល់ប្រយោជន៍ដល់ការអភិវឌ្ឍសេដ្ឋកិច្ចសម្រាប់ពលរដ្ឋក្នុងមូលដ្ឋាន ខណៈតំបន់នេះក៏ជាច្រកព្រំដែនដ៏សំខាន់សម្រាប់ការធ្វើពាណិជ្ជកម្មរវាងប្រទេសកម្ពុជានិងប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធការសិក្សាគម្រោងសាងសង់ស្ពានឆ្លងទន្លេនៅក្រុងសំពៅពូន ដែលជាក្រុងថ្មីទើបបំបែកចេញពីស្រុកកោះធំខេត្តកណ្តាល លោក ផន រឹម មន្រ្តីអ្នកនាំពាក្យក្រសួងសាធារណការនិងដឹកជញ្ជូនបានប្រាប់ថា ចក្ខុវិស័យរបស់រដ្ឋាភិបាលត្រូវសាងសង់ស្ពានជាច្រើនកន្លែងតាមដងទន្លេបាសាក់ ទន្លេមេគង្គ និងទន្លេសាប។ ប៉ុន្តែការសាងសង់គម្រោងណាមួយក៏ត្រូវផ្អែកលើភាពជាក់ស្តែងនៃតម្រូវការចាំបាច់តាមអាទិភាពនៃគម្រោងនីមួយៗ។

ក្រុងសំពៅពូនត្រូវបានបំបែកចេញពីស្រុកកោះធំខេត្តកណ្តាល តាមអនុក្រឹត្យរបស់រដ្ឋាភិបាលចុះនៅថ្ងៃទី ២៣ ខែធ្នូ ឆ្នាំ ២០២២។

ភូមិសាស្ត្រក្រុងសំពៅពូន មានព្រំប្រទល់ខាងជើងជាប់ស្រុកកោះធំ ខាងកើតជាប់ស្រុកលើកដែក ខាងលិចជាប់ស្រុកអង្គរបុរី ដែលមានស្ទឹងអង្គរបុរីខណ្ឌជា ២ និងខាងត្បូងជាប់ខេត្តអានយ៉ានប្រទេសវៀតណាម។

តាមព្រះរាជក្រឹត្យចុះថ្ងៃ ១២ មិថុនា ឆ្នាំ ២០២៥ ក៏បានកែសម្រួលព្រំប្រទល់រដ្ឋបាលខេត្តតាកែវនិងកណ្តាល ដោយកាត់ផ្ទៃដីទំហំ ២ ៤៧៥ ហិកតា ពីស្រុកអង្គរបុរី ខេត្តតាកែវចូលមកភូមិសាស្រ្តក្រុងសំពៅពូនខេត្តកណ្តាល ដែលធ្វើឲ្យក្រុងសំពៅពូនរីកផ្ទៃដីដល់ទំហំសរុប ២៩ ៧៧៥ ហិកតា ដែលមានសង្កាត់ចំនួន ៥ និងភូមិសរុបចំនួន ៥៣ ភូមិ។

ក្រុងសំពៅពូនបច្ចុប្បន្នមានពលរដ្ឋរស់នៅសរុបប្រមាណ ៨៣ ៥៨៦ នាក់ ជាមួយដង់ស៊ីតេពលរដ្ឋជាមធ្យម ២៩៩ នាក់ក្នុងមួយគីឡូម៉ែត្រការ៉េ។ វិស័យសំខាន់ៗសម្រាប់ទ្រងទ្រង់សេដ្ឋកិច្ចរបស់ក្រុងមានកសិកម្ម សិប្បកម្ម និងសេវាកម្ម៕