ព័ត៌មានជាតិ

រដ្ឋបាលខណ្ឌកំបូល ដាក់គ្រឿងចក្រស្ដារប្រឡាយជាប់ផ្លូវជាតិលេខ ៤ រំដោះជំនន់ទឹកភ្លៀង និងបរិស្ថានស្អាត

បានផុស

១១ ខែ មុន

នៅ

ថ្ងៃព្រហស្បតិ៍ ៤ កញ្ញា ២០២៥

ដោយ

កាលពីថ្ងៃទី ៣ ខែកញ្ញា ឆ្នាំ ២០២៥ លោក ទ្រី ណារ៉េត អភិបាលរងខណ្ឌកំបូល បានដឹកនាំក្រុមមន្ត្រីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ សហការជាមួយក្រុមការងារសង្កាត់ និងភូមិពាក់ព័ន្ធ ចុះអនុវត្តការងារស្តារប្រឡាយខាងជើងផ្លូវជាតិលេខ ៤ ដើម្បីរំដោះជំនន់ទឹកភ្លៀង និងបរិស្ថានស្អាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការងារនេះ បានចាប់ផ្ដើមពីព្រំប្រទល់ខណ្ឌពោធិ៍សែនជ័យ រហូតដល់ព្រំប្រទល់ស្រុកអង្គស្នួល ខេត្តកណ្តាល។ គោលបំណងសំខាន់ ដើម្បីបង្កើនសមត្ថភាពបង្ហូរទឹក ការពារបញ្ហាទឹកជំនន់ កាត់បន្ថយសំណល់ និងបង្កើតបរិយាកាសអនាម័យស្អាតសម្រាប់ប្រជាពលរដ្ឋរស់នៅជាយផ្លូវ។

លោក សុខ វិចិត្រ ប្រជាពលរដ្ឋនៅសង្កាត់កន្ទោក បានបញ្ជាក់អំពីអារម្មណ៍របស់ខ្លួនថា លោកសូមអរគុណដល់អាជ្ញាធរខណ្ឌ និងក្រុមការងារ ដែលបានចុះសម្អាតប្រឡាយនេះ។ ពេលមានភ្លៀងធ្លាក់ មុននេះ ទឹកតែងតែជំនន់ចូលផ្ទះ ធ្វើឲ្យរដូវភ្លៀងក្លាយទឹកដក់ស្អុយ។ ឥឡូវនេះ លោកមានក្តីសង្ឃឹមថា ស្ថានភាពនឹងប្រសើរឡើង ហើយបរិស្ថានក៏ស្អាតជាងមុនផងដែរ។

លោក វិចិត្រ បានបន្ថែមថា ការងារស្តារប្រឡាយនេះ មិនត្រឹមជាការងាររបស់អាជ្ញាធរប៉ុណ្ណោះទេ ប៉ុន្តែជាការចូលរួមរួមគ្នាពីប្រជាពលរដ្ឋគ្រប់រូប ដើម្បីអនាម័យល្អប្រសើរផងដែរ។

ជាមួយនេះ លោកអភិបាលរងខណ្ឌកំបូល ក៏បានលើកទឹកចិត្តឲ្យប្រជាពលរដ្ឋ និងម្ចាស់អាជីវកម្មតាមបណ្ដោយផ្លូវជាតិលេខ ៤ ចូលរួមរក្សាទុកអនាម័យ បោះសំរាមត្រឹមត្រូវ និងកុំរំលោភលើប្រឡាយជាសាធារណៈ។ ការសហការយ៉ាងសកម្មរវាងអាជ្ញាធរ និងប្រជាពលរដ្ឋ នឹងជួយឲ្យតំបន់មានភាពស្រស់ស្អាត ប្រកបដោយសណ្ដាប់ធ្នាប់៕

អត្ថបទ ៖ សំណាង