ភ្ជុំបិណ្ឌ ៣ថ្ងៃ ខេត្តរតនគិរី ទទួលបានភ្ញៀវទេសចរជិត ២ម៉ឺននាក់កើនលើសឆ្នាំមុន

អំឡុងពេលភ្ជុំបិណ្ឌ៣ថ្ងៃ ខេត្តរតនគិរី ដែលស្ថិតនៅភូមិភាគឦសានមួយនេះ ទទួលបានភ្ញៀវទេសចរជាតិ និងអន្តរជាតិជិត ២ ម៉ឺននាក់ ដែលចំនួននេះមានការកើនឡើងបើប្រៀបធៀបទៅនឹងឆ្នាំមុន។ នាឱកាសពិធីបុណ្យភ្ជុំបិណ្ឌដែលជាបុណ្យប្រពៃណីជាតិខ្មែរប្រារព្ធនៅទូទាំងប្រទេស ទាំងភ្ញៀវជាតិ និងអន្តរជាតិ បានធ្វើដំណើរទៅលេងកម្សាន្តនៅខេត្តរតនគិរី ដែលមានតំបន់ទេសចរណ៍ធម្មជាតិច្រើនអនេក ជាពិសេសនោះទេសចរណ៍វប្បធម៌ជនជាតិដើមភាគតិច។

លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានឱ្យដឹងថា ភ្ញៀវជាតិនិងអន្តរជាតិ នៅអំឡុងពិធីបុណ្យភ្ជុំបិណ្ឌឆ្នាំនេះ មានភ្ញៀវទេសចរជិត ២ម៉ឺននាក់ បានធ្វើដំណើរមកខេត្តរតនគិរី ដើម្បីសម្រាកកម្សាន្តនិងធ្វើបុណ្យទាន។ លោកបន្តទៀតថា សម្រាប់ពិធីបុណ្យភ្ជុំបិណ្ឌប្រពៃណីជាតិជាតិខ្មែរ មានជនជាតិដើមភាគតិច ដែលធ្វើការងារនៅឆ្ងាយវិលមកលេងស្រុកកំណើតរបស់ខ្លួនវិញ និងភ្ញៀវមកសម្រាកលេងកម្សាន្តសរុបចំនួន ១៧ ​២៤៨ នាក់ កើនឡើងប្រមាណ ៣% បើធៀបទៅនឹងពិធីបុណ្យភ្ជុំបិណ្ឌឆ្នាំ ២០២៤ មានចំនួន ១៦ ៩០៧ នាក់។

ជាក់ស្តែងខេត្តរតនគិរី ដោយគិតពីថ្ងៃទី២១ ដល់ ថ្ងៃទី២៣ ខែកញ្ញា ឆ្នាំ២០២៥ មានភ្ញៀវជាតិ និងអន្តរជាតិបានចូលមកសម្រាកលម្ហែកម្សាន្ត និងស្នាក់នៅសរុបចំនួន ១៧ ២៤៨នាក់ កើនឡើង៣.២៣% ក្នុងនោះភ្ញៀវជាតិមានចំនួន ១៧ ០៣៨នាក់ កើនឡើង ៣.១៦%និងទេសចរបរទេសចំនួន ២១០នាក់ កើនឡើង៨.៨១%»។

គួរជម្រាបថា ខេត្តភូមិភាគឦសានមួយនេះ នៅតែជាទីកន្លែងដ៏សំខាន់របស់ប្រទេសកម្ពុជា ដ៏ទាក់ទាញចំណាប់អារម្មណ៍ ភ្ញៀវជាតិនិងអន្តរជាតិ ដែលបានឈប់សម្រាក់ពីការងារ រយៈពេល៣ ថ្ងៃ នៅក្នុងរដូវពិធីភ្ជុំបិណ្ឌឆ្នាំ២០២៥ តែងតែទៅលេងកម្សាន្ត ដើម្បីគយគន់ទេសភាព បឹងយក្សឡោម ផ្ទៃបឹងកន្សែង ទឹកជ្រោះ ផ្ទះជនជាតិដើមភាគតិចចម្រុះជាតិ​សាសន៍ ភ្លក់ម្ហូបអាហារជនជាតិដើមភាគតិច និងស្លៀកសម្លៀកបំពាក់ជនជាតិដើមភាគតិចថតរូបជាដើម៕

អត្ថបទ៖ ខៀវ ចាប