​គណបក្សហ៊្វុនស៊ិនប៉ិច កំណត់យកថ្ងៃទី ៩ កុម្ភៈ ដើម្បី​រៀបចំសមាជ ជ្រើសរើសក្បាលម៉ាស៊ីនដឹកនាំ

គណបក្សហ៊្វុនស៊ិនប៉ិច ​ក្រុមខាងព្រះអង្គម្ចាស់ នរោត្តម ចក្រាវុធ បាន​​កំណត់យក​ថ្ងៃទី ៩ ខែកុម្ភៈ ឆ្នាំ ២០២២ខាងមុខ នៅព្រះរាជដំណាក់​ ស្ថិតក្នុងសង្កាត់វាលស្បូវ ដើម្បីរៀបចំ​សមាជវិសាមញ្ញ​​ ​ជ្រើសរើសក្បាលម៉ាស៊ីនដឹកនាំគណបក្ស និងធ្វើវិសោធនកម្មប្រការមួយចំនួន នៃលក្ខន្តិកៈគណបក្ស ព្រមទាំង​កំណត់យុទ្ធសាស្ត្រនយោបាយ គណបក្ស។ ​

លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច មានប្រសាសន៍ប្រាប់កម្ពុជាថ្មីថា ​ការរៀបចំធ្វើសមាជវិសាមញ្ញនេះ ដើម្បីរៀបចំក្បាលម៉ាស៊ីនដឹកនាំ ជំនួសសម្តេចក្រុមព្រះ នរោ​ត្តម រណប្ញទ្ធិ ដែលបានយាងចូលទិវង្គត់​។​ លោកថា ​របៀបវារៈនៅក្នុងអង្គសមាជ គឺទីមួយ យាងព្រះអង្គម្ចាស់ នរោត្តម ចក្រាវុធ ជាព្រះប្រធានគណបក្សហ្វ៊ុនស៊ិនប៉ិច ហើយនិងធ្វើវិសោ​ធនកម្មលក្ខន្តិកៈ គណបក្សមួយចំនួន ព្រមទាំងការប្រកាស សមាសភាពថ្នាក់ដឹកនាំមួយចំនួនទៀត និងអនុម័តគោលនយោបាយគណបក្សផងដែរ។

ប៉ុន្តែ​​គម្រោង​នេះ ត្រូវ​បានក្រុមមួយទៀត អះអាងថា ​ព្រះអង្គម្ចាស់ នរោត្តម ចក្រាវុធ​ គ្មាន​សិទ្ធិ​គ្រប់​គ្រាន់ ដើម្បីធ្វើការងារនេះទេ។ នេះបើតាមសេចក្តីប្រកាសព័ត៌មាន ​របស់​ការិយាល័យអ្នកនាំ​ពាក្យ​គណបក្សហ៊្វុនស៊ិនប៉ិច ​ដែលជាក្រុមខាងលោក សាយ ហាក់, លោក ហេង ចន្ថា, លោក ញ៉េប ប៊ុនជិន និងលោក ផាន់ សិទ្ធី​ជាដើម។

​​​សេចក្តីប្រកាសព័ត៌មាននេះ​ បានលើកឡើង ៣ចំណុច៖ ទី១. ព្រះអង្គម្ចាស់ នរោត្តម ចក្រាវុធ ពុំដែលបានតែងតាំង ជាសមាជិកគណៈកម្មាធិការ នាយកស្របតាមលក្ខន្តិកៈ គណបក្សហ៊្វុនស៊ិនប៉ិចឡើយ។  ដោយឡែក សេចក្តីសម្រេចតែងតាំង ព្រះអង្គជា​អនុប្រធានគណបក្ស ទោះបីស្របតាមលក្ខន្តិកៈប្រកាល៥៩ ថ្មី។ ប៉ុន្តែ ស្ថិតក្នុងការសង្ស័យ ​នៃការក្លែងបន្លំប្រើប្រាស់ព្រះហស្តលេខា សម្ដេចក្រុមព្រះ។

ទី២. ព្រះអង្គម្ចាស់ នរោត្តម ចក្រាវុធ គ្មានសិទ្ធិកោះប្រជុំគណៈកម្មាធិការនាយក ស្របតាមលក្ខន្តិកៈឡើយ មានតែគណៈកម្មាធិការនាយក​ ដែលនៅសុពលភាពជាធរមាន ​ក្នុង​បញ្ជីតម្កល់ទុកនៅក្រសួងមហាផ្ទៃប៉ុណ្ណោះ ដែលមានសិទ្ធិកោះប្រជុំ និងចូលរួមប្រជុំក្នុងករណី ដែលគណបក្សជួបវិបត្តិគ្មានប្រធានដឹកនាំ។ វៀលែងតែសមាជិករូបណាមួយ ​ត្រូវបាត់បង់សមាជិកភាព ស្របតាមលក្ខន្តិកៈគណបក្ស និងបញ្ញត្តិនៃច្បាប់ ស្ដីពី គណបក្សនយោបាយ។

ទី៣. ព្រះអង្គម្ចាស់ នរោត្តម ចក្រាវុធ ពុំមាននីត្យានុកូលភាព ជាប្រធានស្ដីទីគណបក្ស ពីព្រោះលិខិតផ្ទេរសិទ្ធិចុះថ្ងៃទី ២២ ខែវិច្ឆិកា ឆ្នាំ ២០២១ ​ដែលមានស្នាមផ្ដិតមេដៃ សម្ដេចក្រុមព្រះ មានសភាពមិនប្រក្រតី ហើយក្រសួងមហាផ្ទៃ មិនបានទទួលស្គាល់​។ ​​

សូមបញ្ជាក់ថា សម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ិនប៉ិច បានយាងចូលព្រះទិវង្គត នៅថ្ងៃអាទិត្យ ទី ២៨ ខែវិច្ឆិកា ឆ្នាំ ២០២១ វេលាម៉ោង ៩ និង៤០នាទីព្រឹក នៅប្រទេសបារាំង ត្រូវនឹងម៉ោង ៣ និង៤០នាទីរសៀល ម៉ោងនៅព្រះរាជាណាចក្រកម្ពុជា ក្នុងព្រះជន្មាយុ ៧៧ព្រះវស្សា ដោយព្រះរោគាពាធ។

ក្រោយយាង ចូលព្រះទិវង្គត់របស់សម្តេចក្រុមព្រះ បានធ្វើផ្ទៃក្នុងគណបក្សហ្វ៊ុនស៊ិនប៉ិច ដែលតែងតែមានភាពប្រេះស្រាំស្រាប់នោះ បានឈានទៅបែកបាក់កាន់តែធ្ងន់ធ្ងរ ដោយថ្នាក់ដឹកនាំបានបែកចេញជាពីរក្រុម គឺទីមួយ ក្រុមខាងព្រះអង្គម្ចាស់ នរោត្តម ចក្រាវុធ ដែលជាបុត្រារបស់​សម្តេចក្រុមព្រះ ហើយមួយក្រុមទៀត គឺក្រុមលោក សាយ ហាក់, លោក ហេង ចន្ថា, លោក ញ៉េប ប៊ុនជិន និងលោក ផាន់ សិទ្ធី ជាដើម (ក្រុមនេះគ្រោងយាងព្រះអង្គម្ចាស់ នរោតម អរុណ រស្មី ធ្វើជាប្រធានបក្ស)៕

អត្ថបទ៖ កោះកែវ​