នយោបាយ

ក្រសួងមហាផ្ទៃ ប្រកាសទទួលស្គាល់លទ្ធផលសមាជរបស់ “គណបក្សខ្មែរស្រឡាញ់ជាតិ”

បានផុស

៤ years មុន

នៅ

ថ្ងៃព្រហស្បតិ៍ ២៨ មេសា ២០២២

ដោយ

រដ្ឋមន្ត្រីក្រសួងមហាផ្ទៃ បានទទួលស្គាល់លទ្ធផលសមាជលើកដំបូងរបស់ “គណបក្សខ្មែរស្រឡាញ់ជាតិ” ដែលបានប្រារព្ធធ្វើកាលពីខែមករា ឆ្នាំ២០២២ នេះបើយោងតាមលិខិតរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលផ្ញើជូនលោក ជីវ កត្តា ប្រធានគណបក្សខ្មែរស្រឡាញ់ជាតិ ចុះថ្ងៃទី២៨ ខែមេសា ឆ្នាំ២០២២។

លិខិតសម្តេចក្រឡាហោម ស ខេង បានលើកឡើងថា ក្រសួងមហាផ្ទៃសម្រេចទទួលស្គាល់លទ្ធផលសមាជលើកដំបូងរបស់គណបក្សខ្មែរស្រឡាញ់ជាតិ ដែលបានប្រារព្ធធ្វើកាលពីថ្ងៃទី៣០ ខែមករា ឆ្នាំ២០២២ ដោយបានបោះឆ្នោតអនុម័តសម្រេចធ្វើវិសោធនកម្មលក្ខន្តិកៈ ទទួលស្គាល់សមាសភាពគណៈកម្មាធិការនាយកចំនួន៤៥រូប និងសមាសភាពគណៈកម្មាធិការអចិន្ត្រៃយ៍ចំនួន៨រូប ព្រមទាំងសម្រេចជ្រើសរើសក្បាលម៉ាស៊ីនដឹកនាំគណបក្ស គឺទី១, លោក ជីវ កត្តា ជាប្រធានគណបក្ស ទី២, លោក តាន់ ទីន ជាអនុប្រធានប្រចាំការគណបក្ស ទី៣, លោកកង គឹមហាក់ ជាអនុប្រធានគណបក្ស និងទី៤, លោក ខឺយ ស៊ីនឿន ជាអនុប្រធានគណបក្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានោះ សម្តេចក្រឡាហោម ស ខេង ក៏បានទទួលនូវបញ្ជីឈ្មោះ និងជីវប្រវត្តិសង្ខេបរបស់សមាសភាពថ្នាក់ដឹកនាំតាមរចនាសម្ព័ន្ធ ដែលបានកំណត់នៅក្នុងលក្ខន្តិកៈគណបក្ស ស្របតាមច្បាប់ស្តីពីគណបក្សនយោបាយផងដែរ។

គួរបញ្ជាក់ថា គណបក្សខ្មែរស្រឡាញ់ជាតិ បានដាក់ពាក្យសុំចុះបញ្ជីគណបក្សនយោបាយនៅក្រសួងមហាផ្ទៃ កាលពីថ្ងៃទី០១ ខែមេសា ឆ្នាំ២០២០ ហើយត្រូវបានក្រសួងមហាផ្ទៃសម្រេចចុះក្នុងបញ្ជីគណបក្សនយោបាយនៅក្រសួងមហាផ្ទៃកាលពីថ្ងៃទី១០ ខែមេសា ឆ្នាំ២០២០៕

ដោយ ៖ កោះកែវ