Update៖ ករណីបង្ក្រាបគ្រឿងញៀននៅខណ្ឌចំការមន ឃាត់ខ្លួនមនុស្សជាង៣០០នាក់

កម្លាំងនគរបាលមន្ទីរប្រឆាំងបទល្មើសគ្រឿងញៀន នៃអគ្គស្នងការដ្ឋាននគរបាលជាតិ សហការជាមួយនគរបាល​មូលដ្ឋានខណ្ឌចំការមន ចុះឡោមព័ទ្ធទីតាំងអគារយីហោ «ពេជ្រលេីមេឃ» នៅក្បែរស្ពានហង្សកោះពេជ្រ ឃាត់ខ្លួនជនជាតិចិន វៀតណាម និងខ្មែរ សរុបប្រមាណជាង ៣០០នាក់ ព្រមទាំងដកហូតបានគ្រឿងញៀនប្រភេទកេតាមីនជាច្រើន។

ប្រតិបត្តិការបង្ក្រាបគ្រឿងញៀនទ្រង់ទ្រាយធំនេះ ដឹកនាំបង្ក្រាបផ្ទាល់ដោយឧត្តមសេនីយ៍ឯក ឃឹង សារ៉ាត នាយកមន្ទីរប្រឆាំងបទល្មើសគ្រឿងញៀន កាលពីវេលាម៉ោង ១២និ៣០នាទីរំលងអធ្រាត្រ ឈានចូលថ្ងៃទី១៦ ខែតុលា ឆ្នាំ២០២៥ រហូតដល់ព្រឹក នៅនៅអាគារយីហោ ពេជ្រលេីមេឃ ស្ថិតតាមបណ្ដោយផ្លូវសបិត សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មានឲ្យដឹងទៀតថា ការចុះបង្ក្រាបទីតាំងចែកចាយ និងប្រើប្រាស់គ្រឿងញៀនដ៏ធំនេះ ធ្វើឡើងបន្ទាប់ពីមានការស្រាវជ្រាវពីកម្លាំងជំនាញរបស់មន្ទីរប្រឆាំងបទល្មើសគ្រឿងញៀនអស់រយៈពេលជាយូរមកហើយ ទើបកម្លាំងបើកប្រតិបត្តិការចុះឡោមព័ទ្ធ និងឆែកឆេរតាំងពីវេលារំលងអធ្រាត្ររហូតដល់វេលាម៉ោងប្រមាណជាង៩ព្រឹកទើបចប់ប្រតិបត្តិការ។

លោកឧត្តមសេនីយ៍ឯក ឃឹង សារ៉ាត នាយកមន្ទីរប្រឆាំងបទល្មើសគ្រឿងញៀន បានឲ្យដឹងថា ការចុះឡោមព័ទ្ធឆែកឆេរអគារយីហោ “ពេជ្រលេីមេឃ”នេះ ពាក់ព័ន្ធបទល្មើសគ្រឿងញៀន។ នៅក្នុងប្រតិបត្តិការនេះសមត្ថកិច្ចបាននាំខ្លួនជនសង្ស័យប្រុសស្រីជាង៣០០នាក់ នៅក្នុងនោះមានជនជាតិចិន ជនជាតិវៀតណាម និងជនជាតិខ្មែរ ព្រមទាំងដកហូតគ្រឿងញៀនប្រភេទកេតាមីនជាច្រើនផងដែរ។

លោកឧត្តមសេនីយ៍ឯក ឃឹង សារ៉ាត បានបញ្ជាក់ថា ទីតាំងខាងលើមើលពីក្រៅដូចជាការដ្ឋានដែលកំពុងសាងសង់ដើម្បីបន្លំភ្នែកមហាជន និងសមត្ថកិច្ច តែនៅខាងក្នុងស្អាតមិនធម្មតា។

បច្ចុប្បន្នជនសង្ស័យប្រុសស្រីចម្រុះជាតិសាសន៍ទាំងនោះត្រូវបានសមត្ថកិច្ចបញ្ជូនតាមរថយន្តក្រុងទៅកាន់អគ្គស្នងការដ្ឋាននគរបាលជាតិដើម្បីសាកសួរ និងចាត់ការតាមនីតិវិធី៕

អត្ថបទ៖ សុភា