អាវុធហត្ថខេត្តព្រះសីហនុ ឃាត់ខ្លួនមន្ត្រីអាវុធហត្ថស្រុកកំពង់សីលាម្នាក់ ពាក់ព័ន្ធករណីកាន់កាំភ្លើងគំរាមអ្នកបើករថយន្ដដឹកទំនិញ

កម្លាំងបញ្ជាការដ្ឋានកងរាជអាវុធហត្ថខេតព្រះសីហនុ បានសម្រេចឃាត់ខ្លួនមន្ត្រីអាវុធហត្ថស្រុកកំពង់សីលាម្នាក់ ដើម្បីអនុវត្តដាក់វិន័យកងទ័ព ក្រោយពីមន្ត្រីអាវុធហត្ថរូបនេះធ្វើសកម្មភាពកាន់កាំភ្លើងសំញ៉ែងគំរាមលើអ្នកបើកបររថយន្ដ​ដឹកទំនិញមួយគ្រឿង គ្រាន់តែរឿងធ្វើដំណើរលើដងផ្លូវ។

ការឃាត់ខ្លួនមន្ត្រីអាវុធហត្ថស្រុកកំពុងសីលានេះ ​ធ្វើឡើងបន្ទាប់ពីមានគណនីហ្វេសប៊ុកមួយបង្ហោះចែកចាយនៅលើបណ្ដាញសង្គមពីសកម្មភាព​បុគ្គលម្នាក់ដែលមានពាក់មួកសុវត្ថិភាពអក្សរ (អ.ហ.) កាន់ដោយកាំភ្លើងខ្លីមួយដើមមកគំរាមលើខ្លួន ក្រាន់តែរឿងធ្វើដំណើរដងផ្លូវ។

លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស នៅព្រឹកថ្ងៃទី១៧ ​ខែតុលានេះ បានឲ្យដឹងថា តាមការស្រាវជ្រាវ ករណីនេះជនសង្ស័យមានឈ្មោះ ខាន់ នីរ៉ូត ឋានន្តរសក្តិ ព្រឹន្ទបាលទោ បម្រើការងារនៅមូលដ្ឋានកងរាជអាវុធហត្ថស្រុកកំពង់សីលា ខេត្តព្រះសីហានុ។

ឧត្តមសេនីយ៍ត្រី អេង ហ៊ី បញ្ជាក់ថា កាលពីថ្ងៃទី១៥ ខែតុលា ឆ្នាំ២០២៥ មានរថយន្តធំដឹកទំនិញម៉ាកហ៊ីយ៉ាន់ដាយ ពណ៌ទឹកប្រាក់ បានបើកបរលើផ្លូវជាតិលេខ៤ ចន្លោះគីឡូម៉ែត្រលេខ១៧៥ និង១៧៦ ស្ថិតនៅភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុ បានឡើងវ៉ាជែងរថយន្តចំនួន៣គ្រឿងចូលគន្លងផ្លូវបញ្ច្រាសទិស ហើយស៊ីប្លេខ្លាំងៗដាក់បុគ្គលឈ្មោះ ខាន់ នីរ៉ូត ដែលកំពុងតែបើកបរម៉ូតូ ក្នុងទិសដៅផ្ទុយគ្នា។ ពេលនោះបុគ្គលឈ្មោះ ខាន់ នីរ៉ូត ក៏អែបខាងឈប់ម៉ូតូ បើកកែបម៉ូតូយកកាំភ្លើងខ្លី១ដើមកាន់នៅដៃ ក៏ជិះម៉ូតូត្រលប់ទៅក្រោយតាមរថយន្ត ប្រហែល​៥០០​ម៉ែត្រ​ក៏ឃើញរថយន្តនោះអែបខាងឈប់។ បុគ្គលឈ្មោះ ខាន់ នីរ៉ូត ក៏សួរអ្នកបើកបររថយន្តថា “បងឯងបើករថយន្តរបៀបមិច” ចំណែកខាងអ្នកបើកបររថយន្តតបវិញថា “អ្នកឯងបើកម៉ូតូរបៀបមិច”។ ហើយបុគ្គលឈ្មោះ ខាន់ នីរ៉ូត ក៏បើកបរម៉ូតូកាត់មុខរថយន្តនោះ ត្រលប់ក្រោយវិញ មិនបានស្រែកគំរាមកំហែង ហើយក៏មិនបានលើកកាំភ្លើងខ្លីភ្ជង់ទៅអ្នកបើកបររថយន្តទេ។

ក្រោយពីធ្វើការស្រាវជ្រាវ មន្ត្រីជំនាញបានរកឃើញបុគ្គលពាក់ព័ន្ធឈ្មោះ ខាន់ នីរ៉ូត ឋានន្តរសក្តិ ព្រឹន្ទបាលទោ បម្រើការងារនៅមូលដ្ឋានកងរាជអាវុធហត្ថស្រុកកំពង់សីលា និងបានបញ្ជូនបុគ្គលនោះ ទៅបញ្ជាការដ្ឋានកងរាជអាវុធហត្ថខេត្តព្រះសីហនុ ដើម្បីចំណាត់ការបន្តតាមនីតិវិធី។

បើតាមលោកឧត្តមសេនីយ៍ត្រី អេង ហ៊ី ករណីនេះ កម្លាំងកងរាជអាវុធហត្ថក៏បានធ្វើការសម្របសម្រួល ព្រមព្រៀងសូមទោសចំពោះទង្វើខុសឆ្គងនឹងវិន័យ ក្រមសីលធម៌ វិជ្ជាជីវៈ របស់បុគ្គលឈ្មោះ ខាន់ នីរ៉ូត ជាមួយអ្នកបើករថយន្ដនៅថ្ងៃកើតហេតុនោះរួចរាល់ហើយដែរ ចំណែកបុគ្គលឈ្មោះ ខាន់ នីរ៉ូត បាននិងកំពុងធ្វើការឃាត់ខ្លួននៅបញ្ជាការដ្ឋានកងរាជអាវុធហត្ថខេត្តព្រះសីហនុ បន្តនីតិវិធីទណ្ឌកម្មវិន័យកងទ័ព៕