អាជីព

ដោះស្រាយដោយសន្តិវិធី ជាមួយមិត្តរួមការងារមានចរិតយ៉ាប់ ឬពូកែចាប់កំហុសរករឿងយើង

បានផុស

៥ years មុន

នៅ

ថ្ងៃពុធ ៤ សីហា ២០២១

ដោយ

ជារឿងធម្មតា ដែលនៅកន្លែងធ្វើការតែងមានការខ្វែងគំនិតគ្នាទៅវិញទៅមក។ យ៉ាងណាក៏ដោយ បញ្ហាភាគច្រើនអាចត្រូវបានដោះស្រាយ បន្ទាប់ពីកិច្ចប្រជុំបានចប់។ ប៉ុន្តែមានពេលខ្លះ បញ្ហាមិនបញ្ចប់ដោយងាយៗ ហើយមនុស្សដែលមានការខ្វែងគំនិតគ្នានៅក្នុងបន្ទប់ប្រជុំ នៅតែមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ហារបស់មនុស្សពីរនាក់ យូរៗវាអាចនឹងក្លាយជាបញ្ហារបស់មនុស្សពីរក្រុម ដែលនេះជាសញ្ញាបង្ហាញថា នឹងមានបញ្ហាធំៗ ក្នុងពេលអនាគតដ៏ខ្លីខាងមុខនេះ សម្រាប់ក្រុមហ៊ុនទាំងមូល។

ដរាបណាយើងត្រូវធ្វើការជាមួយគ្នា និងមានបំណងដូចគ្នា ដើម្បីសម្រេចបាននូវអ្វីដែលល្អបំផុត។ ដូច្នេះបើមានបញ្ហាត្រូវរកដំណោះស្រាយឲ្យមានប្រយោជន៍សងខាង។ កុំយករឿងផ្ទាល់ខ្លួនឬដ្រាម៉ាមកដោះស្រាយឲ្យសោះ ចៀសវាងនាំបញ្ហាវែងឆ្ងាយ។ បើបរិយាកាសការងារកាន់តែអាក្រក់ នោះទំនាក់ទំនងក្រុមក៏កាន់តែអាក្រក់ទៅៗ ដូចគ្នា។

១ ដំបូងត្រូវដឹងថាមានបញ្ហាអ្វីបានទៅចឹង

មុននឹងអ្នកបើកចិត្តឲ្យអ្នកណា អ្នកត្រូវដឹងថា ហេតុអ្វីបានជាឈ្លោះគ្នា តើមានអ្វីខុសជាមួយគាត់? វាជារឿងផ្ទាល់ខ្លួនឬជាការងារ។ ដើម្បីពិភាក្សាឲ្យបានច្បាស់ថា តើបញ្ហានោះជាអ្វី វាមានសារៈសំខាន់ណាស់ក្នុងការស្តាស្ថានការណ៍ឲ្យបានប្រសើរជាងមុន និងត្រូវធ្វើការជាមួយគ្នាដោយគ្មានបញ្ហា។

២ ប្រើភាគីកណ្ដាលសម្របសម្រួល

ដើម្បីប្រឈមមុខនឹងគ្នា អាចពិបាកបន្តិច។ ដូច្នេះទំនាស់ភាគច្រើន គឺត្រូវពឹងផ្អែកលើអន្តរការី( ភាគីទីបី ) ដើម្បីព្យាបាលស្នាមប្រេះនេះ។ ការមានភាគីទីបីជាអ្នកសម្របសម្រួល ធ្វើឲ្យងាយស្រួលក្នុងការស្វែងរកដំណោះស្រាយ ដែលភាគីទាំងពីរមានភាពងាយស្រួលក្នុងការនិយាយជាមួយគ្នាមិនខ្លាច។ មនុស្សកណ្ដាលនឹងធ្វើឲ្យអ្វីៗដំណើរការទៅដោយល្អ ដោយមិនមានអារម្មណ៍ថា យើងមិនត្រូវប្រឈមមុខដាក់គ្នាដោយស្មើភាព ហើយមានផាសុកភាពជាងមុន ដែលយើងមិនចាំបាច់គិតសុញគំនិតពីរបៀបចាប់ផ្ដើមខ្លួនឯងយ៉ាងម៉េច។

៣ និយាយសុំទោស

គ្រាន់តែនិយាយថាសុំទោស វាមិនពិបាកនោះទេ ពិបាកតែធ្វើខុសហើយ នៅមិនដឹងខុស ហើយថែមទាំងសួរគេបកមកវិញ ខ្ញុំខុសអីតើស! កុំគិតថាខ្លួនចាស់ជាង កាន់តំណែងខ្ពស់ជាង ឬមានថានៈជារៀងច្បង ហើយប្រកាន់ថាមិនអាចទៅអោនលំទោនសុំទោសអ្នកណាម្នាក់ឡើយ។ ធ្វើដូច្នេះ កាន់តែពង្រីកបញ្ហាធំជាងមុនទ្វេដងប៉ុណ្ណោះ។

មានកំហុសហើយ និយាយពាក្យសុំទោស មិនធ្វើឲ្យអ្នកខាតបង់ភាពថ្លៃថ្នូរទេ នេះជាការទទួលខុសត្រូវ។ ពាក្យសុំទោសមួយម៉ាត់ អាចជួយធ្វើឲ្យស្ថានការណ៍ប្រសើរឡើងច្រើន បញ្ហាទាំងអស់បញ្ចប់យ៉ាងឆាប់រហ័សដូចគ្នា។

៤ ផ្ដល់ឲ្យគ្នាទៅវិញទៅមកនូវឱកាស

បន្ទាប់ពីដឹងថាខុស យើងគួរតែផ្ដល់ឱកាសឲ្យពួកគេបានសុំទោស និងកែលម្អផ្នែកដែលនៅតែមានកំហុស ដោយមិនធ្វើកំហុសម្តងទៀត ឬនិយាយអាក្រក់ធ្វើឲ្យរឿងកាន់តែអាក្រក់ទៅៗ។ បើមិនដូច្នោះទេ វាបង្កើតឲ្យមានការប៉ះទង្គិច ឬរបួសគ្មានទីបញ្ចប់នៅក្នុងបេះដូងម្នាក់ៗ។

រឿងបានកន្លងផុតទៅហើយ សូមអភ័យទោស ហើយបំភ្លេចចោល ដើម្បីរក្សាទំនាក់ទំនងនិងការងារដែលត្រូវធ្វើរួមគ្នា។ រៀនស្វែងយល់ពីអ្នកដទៃយកចិត្តទុកដាក់ចំពោះយើង ហើយយើងនឹងដឹងថា ការផ្ដល់ឱកាសឲ្យពួកគេមិនមែនជារឿងលំបាកទេ ។

៥ ហ៊ាននិយាយទល់មុខគ្នាតែម្ដង

ការប្រឈមមុខគ្នាគឺគួរឲ្យរន្ធត់និងពិបាកណាស់ ប៉ុន្តែការនិយាយទល់មុខគ្នាគឺជាទំនាក់ទំនងល្អបំផុត។ ព្រោះភាគីម្ខាងទៀត អាចមើលឃើញដោយភាពស្មោះត្រង់និងកំហុសតាមរយៈកែវភ្នែក។ វាខុសពីការនិយាយតាមរយៈឆាត និងស្ដាប់តែសម្លេងរបស់គ្នា។ ការនិយាយទល់មុខ ជួយកែស្ថានការណ៍មកប្រសើរច្រើន បើសិនម្នាក់ៗនៅលាក់កំបាំង មិនហ៊ានប្រឈមមុខ គិតថាខ្លួនត្រូវរៀងៗខ្លួន នោះបញ្ហានឹងក្លាយជាមហារីករហូតមួយជីវិត៕

ប្រែសម្រួល៖ សាង ស្រីល័ក្ខ

ចុចអាន៖គន្លឹះជោគជ័យក្នុងក្រុមការងារ ដែលអ្នកដឹកនាំច្រើនអនុវត្តជាប្រចាំ

ចុចអាន៖ល្បិចពិសេស ធ្វើការឆាប់ឡើងប្រាប់ខែ ហើយនាំខ្លួនរីកចម្រើនថែមទៀត

ចុចអាន៖ជំពូកបុគ្គលិកដែលគេចាត់ទុកជា “មនុស្សអត់ប្រយោជន៍”