សន្តិសុខសង្គម

ឆ្លងចរន្តអគ្គិសនីឆេះរោងបាយក្រោយផ្ទះពលរដ្ឋយ៉ាងសន្ធោសន្ធៅ បង្កឲ្យខូចខាតសម្ភារៈមួយចំនួន នៅសង្កាត់ស្ទឹងមានជ័យទី ០២

បានផុស

៥ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

ឆ្លងចរន្តអគ្គិសនីឆាបឆេះរោងបាយក្រោយផ្ទះប្រជាពលរដ្ឋយ៉ាងសន្ធោសន្ធៅ បណ្ដាលឲ្យខូចខាតម៉ូតូ ចំនួន ០២ គ្រឿង ព្រមទាំងសម្ភារៈមួយចំនួនធំផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ០៥ និង ៣០ នាទីទៀបភ្លឺ ថ្ងៃទី ១០ ខែកុម្ភៈ ឆ្នាំ ២០២៦ ស្ថិតនៅចំណុចផ្ទះលេខ ២២៤ ផ្លូវលំ ភូមិឫស្សី ០៣ សង្កាត់ស្ទឹងមានជ័យទី ០២ ខណ្ឌមានជ័យ រាជធានីភ្នំពេញ។

ប្រជាពលរដ្ឋរស់នៅក្បែរកន្លែងកើតហេតុ បានឲ្យដឹងថា មុនពេលកើតហេតុ ពួកគាត់ដែលជាអ្នករស់នៅក្បែរខាងគ្នាជាមួយម្ចាស់ផ្ទះរងគ្រោះ ខណៈទើបតែភ្ញាក់ពីសម្រាន្ត បានឮសំឡេងផ្ទុះ ០១ ទៅ០២ ដង ដែរ ប៉ុន្តែបានរត់ចេញពីក្នុងផ្ទះស្ទុះចេញក្រៅ ដើម្បីរកមើល តែមិនឃើញមានអ្វី ទើបមិនបានចាប់អារម្មណ៍ ក៏ត្រឡប់ចូលផ្ទះវិញ។

ប្រជាពលរដ្ឋដដែល បានបន្តថា លុះមួយសន្ទុះក្រោយមក មានធុំក្លិនផ្សែងឈ្ងៀម ដោយកើតចិត្តសង្ស័យ ពួកគាត់ក៏ចេញទៅមើលម្តងទៀត ឃើញរោងបាយម្ចាស់ផ្ទះរងគ្រោះត្រូវអណ្ដាតភ្លើងឆាបឆេះយ៉ាងសន្ធោសន្ធៅបាត់ទៅហើយ។ ភ្លាមៗ ពួកគាត់ ក៏បានប្រញាប់រាយការណ៍ជូនសមត្ថកិច្ចមូលដ្ឋាន ដើម្បីឲ្យជួយបន្តទាក់ទងទៅកាន់នគរបាលពន្លត់អគ្គិភ័យចុះអន្តរាគមន៍ពន្លត់នៅទីតាំងខាងលើ ជៀសវាងមានការរាលដាលកាន់តែខ្លាំងបន្តទៀត។

អគ្គិភ័យនេះបានឆាបឆេះរោងបាយឈើប្រក់ស័ង្កសី ចំនួន ០១ រោង រួមមាន ៖ ម៉ូតូចំនួន ០២ គ្រឿង , កុំព្យូទ័រយួរដៃ ០១ គ្រឿង , ទូទឹកកក ០១ គ្រឿង , ម៉ាស៊ីនបោកសំលៀកបំពាក់ ០១ គ្រឿង , ម៉ាស៊ីនចម្រោះទឹកក្តៅទឹកត្រជាក់ ០១ គ្រឿង និងសម្ភារៈប្រើប្រាស់មួយចំនួនទៀត។ ក្នុងនោះ រថយន្តការិយាល័យបង្ការពន្លត់អគ្គិភ័យ និងសង្គ្រោះ , រថយន្តជំនួយក្រុមហ៊ុនស្រាបៀរកម្ពុជា មកដល់ទីតាំងចំនួន ០៦ គ្រឿង បាញ់ឲ្យរលត់ជាស្ថាពរ។ ចំពោះមូលហេតុ សមត្ថកិច្ចបានស្រាវជ្រាវរកឃើញថា បណ្តាលមកពីឆ្លងចរន្តអគ្គិសនី៕

អត្ថបទ ៖ រដ្ឋា