អ្នកនាំពាក្យ ៖ គិតត្រឹមល្ងាចនេះ ពុំមានករណីអគ្គិភ័យឆាបឆេះផ្ទះពលរដ្ឋ នោះទេ

មន្ត្រីនាំពាក្យនគរបាលរាជធានីភ្នំពេញ បានឲ្យដឹងថា គិតមកដល់ម៉ោង ៤ល្ងាចថ្ងៃទី ៣១ ខែមករា ឆ្នាំ ២០២២ ដែលជាថ្ងៃសែនចូលឆ្នាំចិន-វៀតណាមនេះ ពុំមានហេតុការណ៍គ្រោះអគ្គិភ័យ ឆេះផ្ទះប្រជាពលរដ្ឋ កើតឡើងនោះទេ។

លោកវរសេនីយ៍ឯក សាន សុខសីហា ជំនួយការស្នងការ និងជាអ្នកនាំពាក្យ នៃស្នងការដ្ឋាននគរបាលរាជធានីភ្នំពេញ ប្រាប់កម្ពុជាថ្មីថា នៅក្នុងភូមិសាស្រ្ដរាជធានីភ្នំពេញ ពុំមានករណីអគ្គិភ័យ ដែលឆេះទៅលើផ្ទះរបស់ប្រជាពលរដ្ឋទេ សម្រាប់ថ្ងៃសែនចូលឆ្នាំចិន-វៀតណាមនេះ គឺគ្រាន់តែមានករណីឆេះស្មៅមួយកន្លែង និងឆេះកក់មួយកន្លែង តែត្រូវកម្លាំងនគរបាលជំនាញ​ ចុះអន្តរាគមន៍ពន្លត់រួចរាល់ហើយ។

លោកបានបញ្ជាក់បន្ថែមថា ដោយអនុវត្តតាមបទបញ្ជា របស់លោកឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ គឺកម្លាំងសមត្ថកិច្ចជំនាញ ការិយាល័យបង្ការ ពន្លត់អគ្គិភ័យ និងសង្គ្រោះរាជធានីភ្នំពេញ បានត្រៀមខ្លួន ២៤ម៉ោង លើ២៤ម៉ោង ដើម្បីជួយសង្រ្គោះប្រជាពលរដ្ឋ នៅពេលមានអគ្គិភ័យ កើតឡើងជាយថាហេតុណាមួយ។

ជាមួយគ្នានេះ អ្នកនាំពាក្យនគរបាលរាជធានីភ្នំពេញរូបនេះ ក៏បានអំពាវនាវដល់ប្រជាពលរដ្ឋ ត្រូវមានការប្រុងប្រយ័ត្នខ្ពស់ នៅពេលមានការអុជទាន ធុប សែនចូលឆ្នាំចិនរួចហើយ សូមពិនិត្យមើលឲ្យម៉ត់​ចត់ មុនពេលចាកចេញពីផ្ទះ ឬក៏ទីតាំង សែននោះ ដើម្បីចៀសវាងកើតមានករណី អគ្គិភ័យជាយថា​ហេ​តុណាមួយ៕

អត្ថបទ៖ ឃួន សុភ័ក្រ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត