ក្រសួង​បិទលែងឱ្យ​ធ្វើដំណើរតាមផ្លូវល្បឿនលឿន ​ក្រោយគ្រោះថ្នាក់ផ្ទួនៗ

ក្រសួងសាធារណការ និងដឹកជញ្ជូន នៅថ្ងៃអង្គារ៍នេះ បានប្រកាសហាមមិនឱ្យយានយន្តគ្រប់ប្រភេទធ្វើចរាចរណ៍តាមផ្លូវល្បឿនលឿនភ្នំពេញ-ក្រុងព្រះសីហនុ ខណៈគម្រោងសាងសង់ផ្លូវមិនទាន់បញ្ចប់មិនទាន់បំពាក់បរិក្ខាសុវត្ថិភាពចរាចរណ៍។

សេចក្ដីជូនដំណឹងរបស់ក្រសួងសាធារណការបញ្ជាក់ថា គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ កំពុងដំណើរការមិនទាន់បញ្ចប់ទាំងស្រុងនោះទេ ជាពិសេសនៅមិនទាន់បំពាក់បរិក្ខារសុវត្ថិភាពចរាចរណ៍នៅឡើយ។

បច្ចុប្បន្នការធ្វើចរាចរយានយន្តរបស់សាធារណជន និងប្រជាពលរដ្ឋមួយចំនួនបានចូលប្រើប្រាស់ផ្លូវនេះ មានការកើនឡើងគួឱ្យកត់សម្គាល់ និងបានបង្កឱ្យមានគ្រោះថ្នាក់ជាញឹកញាប់។

បើតាមក្រសួងសាធារណការ ដើម្បីចៀសវាងការរំខានដល់ដំណើរការសាងសង់បញ្ចប់គម្រោងឱ្យបានទាន់ពេលវេលា និងចៀសវាងបង្កគ្រោះថ្នាក់ក្នុងការធ្វើដំណើរក្រសួងសម្រេចឱ្យបិទគ្រប់ច្រកចេញ-ចូល មិនអនុញ្ញាតឱ្យយានយន្តគ្រប់ប្រភេទចូលប្រើប្រាស់ផ្លូវល្បឿនលឿន ក្រៅពីយានយន្តដែលបម្រើការងារឱ្យគម្រោង និងយានយន្តមានតម្រូវការចាំបាច់ដែលអនុញ្ញាតដោយក្រសួងសាធារណការ៕