ខ្យល់កន្ត្រាក់ ផ្គរ រន្ទះ នៅតែបន្តយាយីមកលើខេត្តបាត់ដំបង

លំនៅឋានរបស់ប្រជាពលរដ្ឋមួយចំនួនក្នុងស្រុកថ្មគោលរងការបំផ្លាញដោយសារកម្លាំងខ្យល់កន្ត្រាក់ មិនត្រឹមតែប៉ុណ្ណោះ ថែមទាំងមានរន្ទះបាញ់សម្លាប់មនុស្ស និងសត្វគោដំណាលគ្នានៅក្នុងក្រោលគោតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងលើរបាយការណ៍ហេតុការណ៍នៃគ្រោះធម្មជាតិនេះ បានកើតឡើងទៅលើស្រុកចំនួនពីរគឺស្រុកថ្មគោល និងស្រុកបាណន់។ គឺកាលពីថ្ងៃទី ២៦ ខែឧសភា ឆ្នាំ២០២៣ វេលាម៉ោង ១៧៖០០ មានភ្លៀងលាយឡំនឹងខ្យល់កន្ត្រាក់ បានធ្វើឲ្យប៉ះពាល់ផ្ទះប្រជាពលរដ្ឋ ចំនួន ៤ ខ្នងផ្ទះនៅក្នុងភូមិសាស្ត្រ ភូមិស្នួលកោង ឃុំបឹងព្រីង ស្រុកថ្មគោល។ 

ផ្ទះជនរងគ្រោះមានឈ្មោះ ១.ឈ្មោះ ហ៊ាន ហាច ភេទប្រុស អាយុ ៦៥ឆ្នាំ ២.ឈ្មោះ ហាច ស្រីនិច ភេទស្រី អាយុ ៣៧ឆ្នាំ ៣.ឈ្មោះ ចាប ឆៀន ភេទស្រី អាយុ ៣៥ឆ្នាំ និង ៤.ឈ្មោះ ថន សាណាម ភេទស្រី អាយុ ៣៣ឆ្នាំ។

នៅវេលាម៉ោង ១៧៖៣០នាទី ថ្ងៃដដែលក៏មានករណីគ្រោះធម្មជាតិមួយកើតឡើង នៅក្នុងស្រុកបាណន់ដោយរន្ទះបាញ់បានបាញ់ទៅលើប្រជាកសិករម្នាក់ដែលកំពុងបញ្ចូលគោទៅក្នុងក្រោល បណ្តាលឱ្យស្លាប់មនុស្សម្នាក់មានឈ្មោះ អ៊ុន សាន់ ភេទប្រុស អាយុ៤៤ឆ្នាំ រស់នៅក្រុមទី១០ ភូមិស្តៅ ឃុំបាយដំរាំ ស្រុកបាណន់ នៅក្នុងរោងគោ ជាប់ប្រឡាយចិនខាងកើតផ្ទះរបស់ខ្លួនចម្ងាយប្រហែល២០០ម៉ែត្រ និងបណ្តាលឱ្យងាប់សត្វគោចំនួន ៣ក្បាល ផងដែរ ក្នុងពេលតែមួយ ដែលបច្ចុប្បន្នក្រុមគ្រួសារកំពុងរៀបចំធ្វើបុណ្យតាមប្រពៃណីហើយ៕

អត្ថបទ៖ សោ និយមរ័ត្ន