ពលរដ្ឋអ្នកជាប់ខ្សែស្រឡាយចិន ចាប់ផ្ដើមទិញ​សម្ភារៈមួយចំនួនដើម្បីត្រៀមក្នុងឱកាសពិធីបុណ្យចូលឆ្នាំចិនខាងមុខ

កាលពីថ្ងៃអាទិត្យ ទី១២ ខែមករា ឆ្នាំ២០២៥ នៅផ្សារអូរឬស្សី មានអតិថិជន ក៏ដូចជាប្រជាពលរដ្ឋមួយចំនួនដែលជាប់ខ្សែស្រឡាយចិន បានមកទិញទំនិញ និងសម្ភារៈមួយចំនួនដើម្បីត្រៀមចូលរួមក្នុងពិធីបុណ្យចូលឆ្នាំចិននារពេលខាងមុខនេះ។

លោក ឡយ ស៊ាងអាង ប្រធានគណៈកម្មការផ្សារអូរឬស្សី បានឲ្យដឹងថា នៅថ្ងៃអាទិត្យ ទី១២មករា មានប្រជាពលរដ្ឋច្រើនបានមកចូលផ្សារដើម្បីទិញទំនិញ ក៏ដូចជាសម្ភារៈប្រើបា្រស់ ហើយក្នុងនោះ ក៏មានប្រជាពលរដ្ឋមួយចំនួនដែលជាប់ខ្សែស្រឡាយចិនក៏បានមកទិញសម្ភារៈដើម្បីត្រៀមចូលរួមក្នុងពិធីបុណ្យចូលឆ្នាំចិនខាងមុខនេះផងដែរ។

លោកបន្ថែមថា ក្នុងឪកាសមានប្រជាពលរដ្ឋចេញចូលផ្សារច្រើនកុះករ កម្លាំងសណ្ដាប់ធ្នាប់របស់ផ្សារបានយកចិត្តទុកដាក់ខ្ពស់លេីបញ្ហាសន្តិសុខ សណ្តាប់ធ្នាប់របៀបរៀបរយ ដោយបានដាក់កម្លាំងតាមគោលដៅសំខាន់ៗ ដើម្បីសម្រួលចរាចរណ៍ជុំវិញបរិវេណផ្សារ ហើយក៏សូមការអធ្យាស្រ័យពីអតិថិជនដែលអញ្ជើញមកផ្សារអូឬស្សី ក្នុងការទិញទំនិញផ្សេងៗ ខណៈជាន់ទី២ នៃផ្សារបាននិងកំពុងធ្វេីការជួសជុលធ្វេីឱ្យមានការខ្វះខាតចំណតរថយន្ត។

គណៈកម្មការគ្រប់គ្រងផ្សារ និងអាជីវករលក់ដូរទាំងអស់សូមអរគុណប្រជាពលរដ្ឋដែលបានមកទិញទំនិញ ក្នុងផ្សារអូរឬស្សី សូមឱ្យការធ្វើដំណើររបស់បងប្អូន ប្រកបដោយសុខសុវត្ថិភាព សប្បាយរីករាយគ្រប់ៗគ្នា។

នៅក្នុងឆ្នាំ២០២៥នេះ បុណ្យចូលឆ្នាំប្រពៃណីចិន និងវៀតណាម ត្រូវបានប្រារព្ធធ្វើឡើងនៅចុងខែមករា ពោលគឺចាប់ពីថ្ងៃទី២៨ ដល់ថ្ងៃទី៣១ ខែមករា ឆ្នាំ២០២៥៕

អត្ថបទ៖ សុភា