កីឡា

Breaking News: កម្ពុជាបានសម្រេចដកខ្លួនពីកីឡាស៊ីហ្គេម នៅថៃ គ្រប់ប្រភេទកីឡា

បានផុស

៧ ខែ មុន

នៅ

ថ្ងៃពុធ ១០ ធ្នូ ២០២៥

ដោយ

កម្ពុជា បានសម្រេចដកខ្លួនពីការចូលរួមប្រកួតកីឡាស៊ីហ្គេម លើកទី៣៣ ឆ្នាំ ២០២៥ នៅប្រទេសថៃ ជាផ្លូវការហើយ បន្ទាប់ពីបានចូលរួមក្នុងពិធីបើកជាផ្លូវការនាយប់ថ្ងៃទី៩ ខែធ្នូ ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ពុជាបានសម្រេចបញ្ជូនកីឡាចំនួន ១២ ប្រភេទទៅចូលរួមប្រកួតស៊ីហ្គេម លើកទី៣៣ នៅប្រទេសថៃ។

ថ្នាក់ដឹកនាំ ១៣ នាក់ និងកីឡាករ កីឡាការិនី គ្រូបង្វឹកចំនួន ៥១នាក់ បានធ្វើដំណើរទៅដល់ប្រទេសថៃចន្លោះនៅថ្ងៃទី៨ ដល់ ទី៩ ខែធ្នូ ឆ្នាំ ២០២៥។ ប្រតិភូ និងអត្តពលិកកម្ពុជាបានចូលរួមពិធីគោរពទង់ជាតិជាផ្លូវការនៅរសៀលថ្ងៃទី៨ ខែធ្នូ និងបានចូលរួមពិធីបើកជាផ្លូវការនៅយប់ថ្ងៃទី៩ ខែធ្នូ ឆ្នាំ ២០២៥។

តាមការគ្រោងទុកកីឡាចំនួន ៦ប្រភេទត្រូវចេញដំណើរទៅប្រទេសថៃ នៅថ្ងៃទី១១ ថ្ងៃទី១៤ និងថ្ងៃទី១៦ ខែធ្នូ ឆ្នាំ ២០២៥។

ទោះបីជាយ៉ាងណា ដោយសារបារម្ភពីហានិភ័យនៃសុវត្ថិភាពកាន់តែខ្ពស់ ខណៈជម្លោះព្រំដែនកាន់តែអាក្រក់ ដូច្នេះថ្នាក់ដឹកនាំប្រតិភូកីឡាកម្ពុជាដែលមានលោក វ៉ាត់ ចំរើន រដ្ឋលេខាធិការនៃក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានដាក់លិខិតជាផ្លូវការទៅក្រុមប្រឹក្សាកីឡាអាស៊ីអាគ្នេយ៍ពីការដកខ្លួនគ្រប់គ្រប់ប្រភេទកីឡាពីការចូលរួមប្រកួតកីឡាស៊ីហ្គេម លើកទី៣៣ ឆ្នាំ ២០២៥។

ការសម្រេចចូលរួមប្រកួតកីឡាស៊ីហ្គេម លើកទី៣៣ នៅប្រទេសថៃ គឺក្នុងនាមជាសមាជិកនៃសហព័ន្ធកីឡាអាស៊ីអាគ្នេយ៍ និងដើម្បីបំពេញកាតព្វកិច្ចលើឆាកអន្តរជាតិស្របតាមគោលការណ៍របស់អូឡាំពិកដែលកីឡាជាទូតនាំមកនូវសាមគ្គីភាព មិត្តភាព និងការរួបរួម។ តាមរយៈការបង្ហាញខ្លួនជាផ្លូវការក្នុងពិធីគោរពទង់ជាតិនៃប្រទេសទាំង ១១ និងពិធីបើកជាផ្លូវការ គឺមានន័យថា កម្ពុជាបានបំពេញភារកិច្ចហើយ ហើយក៏គ្មានស្ថាប័នកីឡាអន្តរជាតិណាចោទលើកម្ពុជាថា គ្មានស្មារតីជាអ្នកកីឡាដែរ។

ការសម្រេចចិត្តដកខ្លួននេះទទួលបានសាទរពីមហាជនកម្ពុជា ដោយសារពួកគាត់បារម្ភពីសុវត្ថិភាពជាចម្បងរបស់ប្រតិភូ និងអត្តពលិកដែលស្ថិតនៅប្រទេសថៃ៕