កីឡា

ឈុត សេរីវណ្ណថង មានការបារម្ភដែរអំឡុងផ្ទុះសង្គ្រាម និងត្រូវផ្លាស់ប្ដូរជើងហោះហើរកន្លងទៅនេះ

បានផុស

៤ ខែ មុន

នៅ

ថ្ងៃចន្ទ ៩ មីនា ២០២៦

ដោយ

កីឡាករគុនខ្មែរ ឈុត សេរីវណ្ណថង ថាបារម្ភចំពោះសុវត្ថិភាពដែរពិសេសអំឡុងពេលធ្វើដំណើរដែលកំពុងមានសង្គ្រាមដូចដែលមហាជនបានដឹងហើយ និងបានព្យាពេលការហោះហើរថែមទាំងត្រូវផ្លាស់ប្ដូរជើងហោះហើរថ្មីទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពលើផេកសហព័ន្ធ

អ្នកប្រដាល់គុនខ្មែរ ឈុត សេរីវណ្ណថង បានឲ្យដឹងថា អំឡុងផ្ទុះសង្គ្រាមនៅអន្តរជាតិនេះដែលប៉ះពាល់រហូតដល់ការផ្លាស់ប្ដូរជើងហោះហើរដូចនេះគឺខ្លួនពិតជាមានការបារម្ភចំពោះសុវត្ថិភាពដោយខ្លាចជួបគ្រោះថ្នាក់ដោចៃដន្យណាមួយដោយមើលមិនឃើញ។ តាមគម្រោងត្រូវហោះចេញនៅថ្ងៃទី១ មីនា ពីបារាំងទៅឌូប៉ៃ រួចបន្តទៅសិង្ហបុរីទើបទៅដល់កម្ពុជា ប៉ុន្តែដោយផ្ទុះសង្គ្រាមគឺត្រូវព្យាពេលខ្ទង់ ១០-១៥ថ្ងៃឯណោះ។

រូបភាពលើផេកសហព័ន្ធ

ឈុត សេរីវណ្ណថង បន្ថែមទៀតថា ដោយមើលឃើញពីការលំបាករបស់ក្រុមកីឡាករគុនខ្មែរ និងបារម្ភពីសុខសុវត្ថិភាពលោក លាង ម៉េង បានជួយចេញថ្លៃទិញសំបុត្រយន្តហោះថ្មីដើម្បីវិលមកកាន់ប្រទេសកំណើតវិញ។ អំឡុងពេលទិញសំបត្រយន្តហោះថ្មីនេះក៏ត្រូវពន្យារយៈពេល ៥ថ្ងៃទៀតទើបអាចហោះចេញមកបាន ខណៈអំឡុងពេលនោះការចំណាយលើការហូបចុកផ្សេងៗគឺបានលោក ខូវ ឆាយ ជាអ្នកជួយរ៉ាប់រងផងដែរ។

រូបភាពលើផេកសហព័ន្ធ

កីឡាករដើមកំណើតពីខេត្តបាត់ដំបងរូបនេះ ថ្លែងអំណរគុណជាខ្លាំងចំពោះលោក លាង ម៉េង ដែលបានជួយទិញសំបុត្រហោះយន្តថ្មីដល់ក្រុមគុនខ្មែរបានវិលត្រឡប់មកពីបារាំងលើកនេះ និងតែងតែឧបត្ថម្ភដល់កីឡាករកន្លងមក។ ជាមួយគ្នានេះដែររូបគេអរគុណចំពោះសហព័ន្ធប្រដាល់គុនខ្មែរ លោក ខូវ ឆាយ ដែលបានយកចិត្តទុកដាក់ និងមើលថែកីឡាករគុនខ្មែរពិសេសអំឡុងពេលប្រកួតនៅប្រទេសបារាំង។

រូបភាពលើផេកសហព័ន្ធ

បញ្ជាក់ដែរថា ក្រុមគុនខ្មែរដែលបានទៅចូលរួមការប្រកួតដណ្ដើមខ្សែក្រវាត់នៅប្រទេសបារាំង កាលពីថ្ងៃទី១ ខែមីនា ឆ្នាំ២០២៦ កន្លងទៅនេះបានត្រូវព្យាពេលហោះហើរដោយសារសង្គ្រាម និងមិនអាចកំណត់ពេលណាទើបមានជើងហោះហើរថ្មីនោះឡើយអំឡុងពេលក្រោយប្រកួតចប់នោះ។ យ៉ាងណាបន្ទាប់ពីមានការឧបត្ថម្ភថ្លៃសំបុត្រយន្តហោះថ្មីពីលោក លាង ម៉េង បានធ្វើឲ្យក្រុមគុនខ្មែររួមមានគ្រូៗ កីឡាករ ឈុត សេរីវណ្ណថង ពេជ្រ សម្បត្តិ បឺត សង្ឃឹម និងអ្នកមួយចំនួនបានដូរជើងហោះហើរទៅប្រទេសចិនវិញ និងបានជិះបន្តមកដល់ខ្មែរតែម្ដង។ សរុបទៅក្រុមគុនខ្មែរមកដល់កម្ពុជាចុងក្រោយគេអំឡុងថ្ងៃទី៧ ខែមីនា ឆ្នាំ២០២៦ នេះ៕