កីឡា

ហែម ប៉ុច កីឡាករហែលទឹកកម្ពុជាបានបំបែកឯតទគ្គកម្មចាស់របស់ខ្លួន ក្នុងការប្រកួតកីឡាអូឡាំពិក នៅទីក្រុងតូក្យូ

បានផុស

៤ years មុន

នៅ

ថ្ងៃសុក្រ ៣០ កក្កដា ២០២១

ដោយ

កីឡាករហែលទឹកកម្ពុជា ហែម ប៉ុច បានបញ្ចប់ការប្រកួតរបស់ខ្លួន សម្រាប់វិញ្ញាសាហែល ៥០ ម៉ែត្រ នៅក្នុងព្រឹត្តិការណ៍អូឡាំពិក ទីក្រុងតូក្យូ ឆ្នាំ២០២០ (Tokyo Olympic Games 202 0) កាលពីវេលាម៉ោង ១៧ ល្ងាចមិញនេះ ដោយឈរលេខរៀងទី៤ ក្នុងស៊េរីទី៤ ដោយប្រើថិរវេលា ២៤.៩១វិនាទី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហែម ប៉ុច បានបំបែកឯតទគ្គកម្មចាស់របស់ខ្លួន ដែលធ្លាប់ធ្វើបានចុងក្រោយលើវិញ្ញាសា ៥០ ម៉ែត្រសេរី គឺថិរវេលា ២៤និង៩១វិនាទី។

ឯតទគ្គកម្មនេះ ជាកំណត់ត្រាខ្ពស់បំផុតសម្រាប់អត្តពលិកហែលទឹកកម្ពុជា ក្នុងការប្រកួតកីឡាអូឡាំពិក វិញ្ញាសា ហែល ៥០ម៉ែត្រសេរីបុរសកន្លងមក ដ្បិតលោក ហែម គិរី អតីតកីឡាករហែលទឹកជម្រើស ជាតិ ដែលបច្ចុប្បន្នជាអគ្គលេខាធិការសហព័ន្ធហែលទឹក លោកធ្លាប់ធ្វើបានក្នុងថិរវេលា ២៦. ៤១ វិនាទី កាលពីឆ្នាំ២០០០ និងកីឡាករ ហែម ថុនពន្លឺ ធ្លាប់ធ្វើបានក្នុងថិរវេលា ២៧និង០៣ វិនាទី កាលពីឆ្នាំ២០០៨។

លោក វ៉ាត់ ចំរើន នាយបេសកកម្ម បានប្រាប់តាមសារអេឡិចត្រូឡិច (Telegra m)ពីទីក្រុងតូក្យូឲ្យដឹងថា ” ហែលទឹក ជាលទ្ធផលកីឡាករ ហែម ប៉ុច ហែលក្នុងវិញ្ញាសា ៥០ម សេរី ធ្វើបានថិរវេលា ២៤:៩១ បំបែកថិរវេលាចាស់ដែលធ្វើនៅស៊ីហ្គេមហ្វីលីពីន ២៤:៩២ ទទួលបានចំណាត់ លេខ៤ក្នុង heat ហើយមានចំណាត់ថ្នាក់រួមទី៥២ ក្នុងចំណោមកីឡា ៧៣ នាក់ មិនអាចបន្តទៅវគ្គពាក់កណ្តាលផ្តាច់ព្រាត់ទេ។សម្រាប់កីឡាការិនីឃឿន ប៊ុនពេជ្រមរកត ហែលក្នុងវិញ្ញាសា៥០ម សេរី ធ្វើបានថិតវេលា ២៩:៤២ បំបែកថិរវេលាចាស់ ២៩:៩៩ នៅស៊ីហ្គេម ហ្វីលីពីនទទួលបានចំណាត់លេខ៣ក្នុង heat ហើយមានចំណាត់ថ្នាក់រួមទី ៦៥ ក្នុងចំណោម ៨១នាក់ មិនអាចបន្តទៅវគ្គពាក់កណ្តាលផ្តាច់ព្រាត់ទេ “៕

ដោយ ៖ វិសិទ្ធ