រំភើប​!​ ស្រួង​ ភាវី​ ឈ្នះ​​ជើង​ឯក​​ប៊ីយ៉ា​ការ៉ុម​​លំដាប់​​ពិភព​​លោក​​​ចំពោះ​​មុខ​​ឪពុក​ម្តាយ​​​នៅ​​កូរ៉េ

កីឡាការិនីស្នូឃ័រកម្ពុជា ស្រួង ភាវី បានសាង​ស្នាដៃថ្មីដ៏រំភើបរីករាយចំពោះមុខឪពុកម្តាយបង្កើតរបស់ខ្លួននៅលើទឹកដីនៃប្រទេសកូរ៉េខាងត្បូង បន្ទាប់ពីនាងបានឈ្នះជើងឯកកីឡាប៊ីយ៉ាការ៉ុមលំដាប់ពិភពលោក PBA-LPBA Championship កាលពីពេលថ្មីៗនេះ។

ស្រួង ភាវី បានឲ្យដឹងថា ក្តីស្រមៃរបស់នាងគឺនាំយកឪពុកម្តាយបង្កើត​ទៅទឹកដីប្រទេសកូរ៉េខាងត្បូង និងមើលនាងប្រកួតផ្ទាល់។ ទីបំផុតក្តីស្រមៃរយៈពេលជាង១០ឆ្នាំ​បានក្លាយជាការពិត។

កីឡាការិនីដែលមានដើមកំណើតនៅខេត្តត្បូងឃ្មុំបានរៀបរាប់ថា ៖«អស់រយៈពេលជាង១០ឆ្នាំ ដែលកូនស្រី កម្ពុជាម្នាក់នេះ មានក្ដីសុបិនថា នៅថ្ងៃណាមួយ កូននឹងនាំអ្នកមានគុណទាំងពីរ ឱ្យលោកបានមកមើលការប្រកួត របស់កូនស្រី ដែលជាការប្រកួតខ្នាតអន្តរជាតិ ដ៏ល្អឥតខ្ចោះនៅទឹកដីប្រទេសកូរ៉េនេះ»។

ភាវី បន្ថែមថា ៖«ទីបំផុត កូនស្រី កម្ពុជាម្នាក់នេះ អាចធ្វើបាន ហើយក៏នឹកស្មានមិនដល់ថា ក្តីសុបិនក្លាយជាការពិតនៅក្នុងពេលនេះឡើយ ហើយនឹងការយកឈ្នះ គ្រប់ការប្រកួតដ៏តឹងតែង ហើយរន្ធត់ស្លុតអារម្មណ៍មួយនេះផងដែរ។ កូនសន្យាថា នឹងធ្វើជាកូនស្រីល្អសម្រាប់ គ្រួសារនិងសង្គមជាតិ»។

សូមបញ្ជាក់ថា ការប្រកួតបានប្រព្រឹត្តទៅរយៈពេល៧ថ្ងៃដែលមានកីឡាការិនីជាច្រើនរូបមកពីបណ្តាប្រទេសផ្សេងៗជុំវិញពិភពលោក។ នៅវគ្គពាក់កណ្តាលផ្តាច់ព្រ័ត្រ ស្រួង ភាវី បានយកឈ្នះកីឡាការិនីម្ចាស់ផ្ទះ Ga-young KIM និងនៅវគ្គផ្តាច់ព្រ័ត្របានយកឈ្នះកីឡាការិនីម្ចាស់ផ្ទះ Mi-rae LEE​ ដើម្បីគ្រងជើងឯក PBA-LPBA Championship លំដាប់ពិភពលោកដែលមានប្រាក់រង្វាន់២០លានវ៉ុន៕

អត្ថបទ៖ វីរបុត្រ