កីឡា

U-20 កម្ពុជា ចាកចេញទៅតាជីគីស្ថានថ្ងៃនេះ ត្រឹមតែ ២ ថ្ងៃមុនការប្រកួត AFC ចាប់ផ្ដើម

បានផុស

៤ years មុន

នៅ

ថ្ងៃចន្ទ ១២ កញ្ញា ២០២២

ដោយ

ក្រុមជម្រើសជាតិកម្ពុជាអាយុក្រោម ២០ ឆ្នាំ គ្រោងនឹងចាកចេញពីមាតុភូមិ ទៅប្រទេសតាជីគីស្ថាន នាថ្ងៃទី ១២ ខែកញ្ញា ឆ្នាំ ២០២២ នេះ ដើម្បីចូលរួមប្រកួតពានយុវជនអាស៊ីអាយុក្រោម ២០ ឆ្នាំ (AFC U-20 Asian Cup) វគ្គជម្រុះ ដែលគ្រោងធ្វើនា ២ ថ្ងៃបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបង្ហើបឱ្យដឹងក្រុមដែលមានសមាសភាពទាំងថ្នាក់ដឹកនាំ គ្រូបង្វឹក គ្រូជំនួយ និងកីឡាករ ប្រមាណជិត ៣០ នាក់ នឹងចាកចេញពីកម្ពុជានាវេលាយប់ តាមជើងហោះហើរដែលមានការផ្លាស់ប្ដូរ ដល់ទៅ ៣ដង។

ប្រការនេះត្រូវបានដាក់ក្ដីព្រួយបារម្ភថា នឹងអាចធ្វើឱ្យប៉ះពាល់ដល់ការនឿយហត់របស់កីឡាករ ដ្បិតការធ្វើដំណើរត្រូវចំណាយពេលយូរ ហើយការប្រកួតកៀកខ្លាំងមែនទែន ពោលគឺប្រកួតបើកឆាកនៅថ្ងៃទី ១៤ ទៅហើយ។

U-20 កម្ពុជា ដែលត្រូវតតាំងជាមួយម្ចាស់ផ្ទះពូល I តាជីគីស្ថាន, លីបង់ និងសិង្ហបុរី ប្រកួតដំបូងត្រូវជួបលីបង់ នៅថ្ងៃទី ១៤ បន្ទាប់មកថ្ងៃទី ១៦ ជួបសិង្ហបុរី និងប្រកួតចុងក្រោយថ្ងៃទី ១៨ ជួបម្ចាស់ផ្ទះ តាជីគីស្ថាន។

ដើម្បីបានឡើងទៅវគ្គបន្ត U-20 កម្ពុជា ដាច់ខាតត្រូវតែឈរលេខ ១ ក្នុងពូល ជាកៅអីឡើងដោយស្វ័យប្រវត្តិ ខណៈក៏អាចឡើងផងដែរ ក្នុងនាមជាក្រុមលេខ ២ ល្អ ដោយត្រូវប្រៀបធៀបជាមួយពូលចំនួន ៩ ផ្សេងទៀត ហើយយកតែ ៥ ក្រុមប៉ុណ្ណោះឡើងទៅជុំផ្ដាច់ព្រ័ត្រ ដែលគេប្រកួតនៅប្រទេសអ៊ូសបីគីស្ថាន នាខែមីនា ឆ្នាំ ២០២៣៕

អត្ថបទ៖ មន្នីរ័ត្ន