កីឡា

វគ្គសន្សំពិន្ទុ ពេជ្រ សម្បត្តិ ធ្វើបានល្អជាងគេក្នុងបេក្ខភាពខ្សែក្រវាត់៤រូបចុងក្រោយ

បានផុស

៤ years មុន

នៅ

ថ្ងៃអង្គារ ១៣ កញ្ញា ២០២២

ដោយ

រហូតដល់ពេលនេះ ការប្រកួតជើងឯកខ្មែរក្រវ៉ាត់ ភេសជ្ជៈប៉ូវកម្លាំងខារ៉ាបាវ រកឃើញជើងខ្លាំង៤រូបហើយឡើងវគ្គពាក់កណ្តាលផ្តាច់ព្រ័ត្រ បន្ទាប់ពីចប់ការប្រកួតវគ្គសន្សំពិន្ទុ៤លើកដូចគ្នាតាមពូលនីមួយៗ។

នៅវគ្គពាក់កណ្តាលផ្តាច់ព្រ័ត្រ ជើងខ្លាំងគុនខ្មែរ ធន់ ផានិត ត្រូវប្រកួតជាមួយមិត្តរួមជាតិ ពេជ្រ សម្បត្តិ ខណៈ អ្នកប្រដាល់ថៃ ទួនប៉េ ត្រូវប្រកួតជាមួយមិត្តរួមជាតិ ផាត់ថាណា ដែលលក្ខខណ្ឌបែបនេះគឺ១០០% នឹងមានកីឡាករកម្ពុជា១រូប និងកីឡាករថៃ១រូបឡើង ទៅវគ្គផ្តាច់ព្រ័ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេជ្រ សម្បត្តិ

អ្នកប្រដាល់ ពេជ្រ សម្បត្តិ មានឈ្មោះបោះសំឡេងយ៉ាងខ្លាំងក្នុងរយៈពេល២ឆ្នាំចុងក្រោយនេះ និងកំពុងបានក្លាយជាកីឡាករឈានមុខគេក្នុងចំណោមអ្នកប្រដាល់គុនខ្មែរល្បីៗ។ កីឡាកររូបនេះមានអាវុធពិឃាតគឺកណ្តាប់ដៃ។

សម្រាប់ការប្រកួតវគ្គសន្សំពិន្ទុខ្សែក្រវាត់នេះ ពេជ្រ សម្បត្តិ ធ្វើបានល្អជាងគេក្នុងចំណោមបេក្ខភាពទាំង៤រូបឡើងវគ្គពាក់កណ្តាលផ្តាច់ព្រ័ត្រ។ បើកឆាក រូបគេចាញ់ពិន្ទុ ទួនប៉េ ទាំងចម្រូងចម្រាស ប៉ុន្តែផ្តួលដៃគូឲ្យសន្លប់២លើក និងឈ្នះដោយពិន្ទុ១លើក។

៤ប្រកួតវគ្គសន្សំពិន្ទុ

ប្រកួតទី១ ចាញ់ ទួនប៉េ ដោយពិន្ទុ
ប្រកួតទី២ ផ្តួល រ៉ាក់ថែ ឲ្យសន្លប់ទឹកទី២
ប្រកួតទី៣ ឈ្នះ ផាត់ថាណា ដោយពិន្ទុ
ប្រកួតទី៤ ផ្តួល ផេតម៉េម៉ៃ ឲ្យសន្លប់ទឹកទី២

ធន់ ផានិត

ធន់ ផានិត ក៏មានកេរ្តិ៍ឈ្មោះបោះសំឡេងខ្លាំងមិនចាញ់ ពេជ្រ សម្បត្តិ ប៉ុន្មានឡើយ ប៉ុន្តែរូបគេលេចមុខល្បីមុន។ អ្នកលេងគុនខ្មែររូបនេះមានកាយសម្បទាល្អ និងអាវុធល្អទាំងព្រមគឺទាត់ កែង និងជង្គង់ ប៉ុន្តែអាវុធពិឃាតរបស់គេគឺទាត់ទាំងឆ្វេង និងស្តាំ។

សម្រាប់ការប្រកួតសន្សំពិន្ទុ ធន់ ផានិត បើកឆាកបានចាញ់ពិន្ទុ ផាត់ថាណា ប៉ុន្តែ២លើកបន្ទាប់ទទួលបានជ័យជម្នះដោយពិន្ទុ មុនពេលផ្តួលដៃគូឲ្យសន្លប់ក្នុងទឹកទី២។

៤ប្រកួតវគ្គសន្សំពិន្ទុ

ប្រកួតទី១ ចាញ់ ផាត់ថាណា ដោយពិន្ទុ
ប្រកួតទី២ ឈ្នះ ផេតម៉េម៉ៃ ដោយពិន្ទុ
ប្រកួតទី៣ ឈ្នះ ទួនប៉េ ដោយពិន្ទុ
ប្រកួតទី២ ផ្តួល រ៉ាក់ថែ ឲ្យសន្លប់ទឹកទី២

ទួនប៉េ

កីឡាករថៃរូបនេះខ្លាចាស់បទពិសោធច្រើន និងបានធ្វើឲ្យកក្រើកសង្វៀនស្រុកខ្មែរតាមរយៈភាពធន់ ស៊ូ និងមិនងាយបាក់ស្រុតឡើយ។ រូបគេក៏ជាបេក្ខភាពម្នាក់ដែលសង្ឃឹមខ្ពស់ក្នុងការឡើងវគ្គផ្តាច់ព្រ័ត្រដែរ។

ខ្លាចាស់រូបនេះទទួលបានជ័យជម្នះតាមរយៈផ្តួលដៃគូឲ្យសន្លប់បាន១លើកគឺក្នុងទឹកទី៤ និងឈ្នះដោយពិន្ទុ២លើក ហើយចាញ់ដោយពិន្ទុ១លើក។

៤ប្រកួតវគ្គសន្សំពិន្ទុ

ប្រកួតទី១ ឈ្នះ ពេជ្រ សម្បតិ ដោយពិន្ទុ
ប្រកួតទី២ ផ្តួល ផាន់ ផាន់ណាត់ ឲ្យសន្លប់ទឹកទី៤
ប្រកួតទី៣ ចាញ់ ធន់ ផានិត ដោយពិន្ទុ
ប្រកួតទី៤ ឈ្នះ ជ័រ ពៅ ដោយពិន្ទុ

ផាត់ថាណា

អ្នកប្រដាល់ថៃរូបនេះត្រូវបានអ្នកគាំទ្រខ្មែរស្គាល់នៅពេលរូបគេចូលរួមប្រកួតខ្សែក្រវាត់ខារ៉ាបាវរដូវកាលនេះ។ រូបគេជាកីឡាករវ៉ៃក្បាច់ និងបច្ចេកទេសល្អ ដោយជាបេក្ខភាពឈានមុខគេម្នាក់ក្នុងចំណោមកីឡាករថៃទាំង៤រូប។

ផាត់ថាណា មិនធ្លាប់ផ្តួលដៃគូឲ្យសន្លប់ឡើយក្នុងការប្រកួតសន្សំពិន្ទុទាំង៤លើកគឺឈ្នះដោយពិន្ទុ៣លើក និងចាញ់ដោយពិន្ទុ១លើក។

៤ប្រកួតវគ្គសន្សំពិន្ទុ