ពេជ្រ សិង្ហៈ យកបងប្រុសជាគំរូដើម្បីភាពជោគជ័យ

កីឡាករវ័យ​ក្មេង​ ពេជ្រ សិង្ហៈ បានដាក់ចិត្តខិតខំប្រឹងប្រែងហ្វឹកហាត់ ដើម្បីទទួល​ជោគជ័យ​ដូចបងប្រុសបង្កើតរបស់ខ្លួនគឺកីឡាករ ពេជ្រ សម្បត្តិ ដែលជោគជ័យខ្លាំងក្នុងអាជីពប្រដាល់។

ពេជ្រ សិង្ហៈ បានសម្រេចចិត្តចូល​ប្រឡូក​គុនខ្មែរ ដោយមិនមានភាពស្ទាក់ស្ទើរនោះទេ ពីព្រោះរូបគេមានចិត្តស្រឡាញ់គុនខ្មែរតាំងពីក្មេង និងតែងតែមើលបងប្រុសរបស់ខ្លួនប្រកួត​ជំរុញ​ឲ្យ​រូប​គេ​ចាប់អាជីពជាអ្នកប្រដាល់។

ពេជ្រ សិង្ហៈ បានប្រាប់«កម្ពុជាថ្មី»ថា ៖«ដំបូង ខ្ញុំមើលបងប្រុសរបស់ខ្ញុំប្រកួត ហើយខ្ញុំក៏ចង់ប្រកួតដែរ។ ខ្ញុំ​មានចិត្តស្រឡាញ់គុនខ្មែរ​ខ្លាំង។ ពេលឃើញបងប្រុសប្រកួតបានចំណូលជួយគ្រួសារ ឃើញបែបនេះខ្ញុំក៏សុំឪពុកម្តាយទៅហាត់ប្រដាល់ជាមួយបងប្រុស»។

ក្នុងការហ្វឹកហាត់នៅក្លិបប្រដាល់គុនខ្មែរ ពេជ្រ សុផាន់ កីឡាករ ពេជ្រ សិង្ហៈ​ មិនសូវជួបបញ្ហាលំបាកទេ ពីព្រោះរូបគេត្រូវបានបងប្រុសបង្កើតកីឡាករ ពេជ្រ សម្បត្តិ ជួយជ្រោម​ជ្រែង និង​ណែនាំ​ជា​ប្រចាំ។ ឪពុកម្ដាយ​ក៏​គាំទ្រ​ឲ្យ​ខ្ញុំ​ចាប់​អាជីព​ប្រដាល់​​ដែរ។ នេះក៏ជាកត្តាមួយ​ធ្វើឲ្យ​ខ្ញុំ​មានកម្លាំង​ដើម្បី​អនាគត​របស់ខ្ញុំ»។

កីឡាករ ពេជ្រ សង្ហិៈ បានបន្ថែមថា៖«សម្រាប់ឪពុកម្តាយរបស់ខ្ញុំគាត់បានអប់រំណែនាំខ្ញុំឲ្យតស៊ូអត់ធ្មត់ក្នុងការហ្វឹកហាត់។ ចំពោះបងប្រុសរបស់ខ្ញុំ គាត់តែងតែប្រាប់ខ្ញុំថាក្នុងនាមជាអ្នកកីឡាយើងត្រូវអត់ធ្មត់ស៊ូទ្រាំប្រឹងប្រែងហ្វឹកហាត់ហើយគោរពវិន័យក្លិបនិងស្តាប់ដំបូន្មានគ្រូទើបយើងទទួលបានជោគជ័យ»។

កីឡាករ ពេជ្រ សិង្ហៈ ធ្វើបានល្អ​​ក្នុង​ការ​ប្រកួត​មិត្តភាពអន្តរជាតិលើកដំបូងក្នុងកម្មវិធីគុនខ្មែរអលស្តារវគ្គ៨ ដោយផ្តួលកីឡាករ​ឡាវ​ក្នុងទឹកទី២៕

អត្ថបទ៖ ផា រតនា