គ្រូភ្នំពេញក្រោនចាត់ទុកព្រៃវែងជាក្រុមមួយគ្រោះថ្នាក់នៅចុងម៉ោង

ជំនួបសប្ដាហ៍ទី៨ ក្នុងពានរង្វាន់ខេមបូឌានព្រីមៀរលីគ ក្លិបភ្នំពេញក្រោនបើកទ្វារកីឡដ្ឋានស្មាតអរអេសអិន ទទួលក្លិបព្រៃវែង នាវេលាម៉ោង៦ល្ងាច ថ្ងៃសៅរ៏ទី២១ ខែតុលា ឆ្នាំ២០២៣។

ក្នុងសន្និសីទមុនការប្រកួតលោក Oleg Starynskyi គ្រូបង្វឹកភ្នំពេញក្រោនបាននិយាយថា៖«ពួកយើងទាំងអស់គ្នាដឹងហើយថា ព្រៃវែងជាក្រុម​មួយល្អ។ ជាពិសេសការរកគ្រាប់បាល់ចុងម៉ោងរបស់ពួកគេ។ ទោះបីពេលខ្លះពួកគេរបូតគ្រាប់បាល់និងលេងមិនបានល្អនៅការចាប់ផ្តើមការប្រកួតក៏ដោយ តែ​ពួកគេមិនបោះបង់​ចោល​ការ​ព្យាយាម​ឡើយ។ ជាពិសេសព្រៃវែងមានកីឡាករក្មេងៗដែលមានឆន្ទៈក្នុងការប្រយុទ្ធ»។

សម្រាប់ការប្រកួត៥លើកចុងក្រោយរបស់ភ្នំពេញពិតជាធ្វើបានល្អមែនទែនគឺឈ្នះទាំង៥ប្រកួតក្នុងនោះឈ្នះក្លិប Shan United ៤-០, ឈ្នះអង្គរថាយហ្គឺរ ៣-០, ឈ្នះអាយអេសអាយ ដង្កោសែនជ័យ​ ៤-២, ឈ្នះCebu ៣-០ និងឈ្នះវិសាខា ១-០។

ចំពោះលទ្ធផលការប្រកួត៥លើកចុងក្រោយ​ព្រៃវែងគឺចាញ់ព្រះខ័នរាជស្វាយរៀង ៥​-៣, ឈ្នះអង្គរថាយហ្គឺរ ២​-១, ចាញ់ក្រសួងការពារជាតិ ៣-០, ឈ្នះគិរីវង់ ២-១ និងស្មើជាមួយបឹងកេត ១-១។

លោក Oleg បានបន្ថែមថា៖«ខ្ញុំគិតថា ព្រៃវែងជាក្រុមមួយ​លេងបាល់លឿនហើយចូលចិត្តលេងបាល់ពី​ក្រោយ​ខ្នង។ កីឡាកររបស់ពួកគេពោរពេញដោយកម្លាំង និងព្យាយាមលេងដាក់សម្ពោធលើគូប្រកួត។ សម្រាប់ក្រុមខ្ញុំគឺនៅតែលេងតាមទម្រង់ដដែល ប៉ុន្តែរឿងដែលយើងមិនអាចមើលរំលងគឺព្រែវែងជាមួយក្រុមដែល​វាយបកបានល្អ ជាពិសេសគុណភាព​កីឡាកររបស់ពួកគេក្នុងការញាក់មួយទល់មួយ»៕

អត្ថបទ៖ ផា រតនា