កីឡា

យប់នេះតារាគុនខ្មែរជួរមុខ៦រូបនឹងធ្វើឲ្យកក្រើកសង្វៀននៅជ្រោយចង្វារ

បានផុស

៣ ខែ មុន

នៅ

ថ្ងៃអាទិត្យ ៧ មករា ២០២៤

ដោយ

កីឡាករប្រដាល់គុនខ្មែរជួរមុខ៦រូបនឹងទទួលស្វាគមន៍អ្នកលេងឆ្លងដែនក្នុងព្រឹត្តិការណ៍ប្រកួត Idol Kun Khmer វេលាម៉ោង៧យប់ ថ្ងៃទី៧ ខែមករា ឆ្នាំ២០២៤ នៅជ្រោយចង្វារដែលផ្សាយផ្ទាល់នៅលើកញ្ចក់ទូរទស្សន៍ BTV។

ក្នុងសន្និសីទសារព័ត៌មាន លោក ខូវ ឆាយ អនុប្រធានសហព័ន្ធកីឡាប្រដាល់គុនខ្មែរបានថ្លែងថា ព្រឹត្តិការណ៍ប្រកួតនេះពិតជាអស្ចារ្យដោយសារចំពោះពេលវេលានៃការប្រារព្ធខួបលើកទី៤៥នៃទិវាជ័យជម្នះ៧មករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ លោក គង់ វិសាល តំណាងទូរទស្សន៍បាយ័នបានលើកឡើងថា នេះជាព្រឹត្តិការណ៍លើកទី៣សម្រាប់ព្រឹត្តិការណ៍ប្រដាល់ធំរបស់ទូរទស្សន៍បាយ័ន បន្ទាប់ពីលើកទី១ធ្វើនៅពហុកីឡដ្ឋានជាតិអូឡាំពិក និងលើកទី២ធ្វើនៅខណ្ឌកំពូល។ សម្រាប់ព្រឹត្តិការណ៍លើកទី៣នេះពិតជាវិសេសវិសាលខ្លាំង ពីព្រោះដើម្បីអបអរសាទរទិវាជ័យជម្នះ៧មករា។

កីឡាករ Semih Sah Cindir ដែលជាដៃគូរបស់កីឡាករ រឿង សុភ័ណ្ឌ បាននិយាយថា ខ្លួនពិតជាសប្បាយរីករាយណាស់ដែលបានមកប្រកួតនៅប្រទេសកម្ពុជា។ ការរៀបចំកម្មវិធីប្រកួតពិតជាបានល្អ ហើយអ្វីដែលពិសេសគឺប្រជាជនពិតជារួសរាយរាក់ទាក់ណាស់ដែលធ្វើឲ្យកីឡាករមកប្រកួតមានភាពកក់ក្តៅ។

កីឡាករតួកគីបានឲ្យដឹងថា ខ្លួនបានស្គាល់ដៃគូ រឿង សុភ័ណ្ឌ ជាកីឡាករដ៏ល្អ និងឈានមុខគេនៅក្នុងប្រទេសកម្ពុជា។ ជាពិសេសកីឡាករកម្ពុជារូបនេះកម្រមានដៃគូណាផ្តួលឲ្យរូបគេឲ្យសន្លប់ណាស់។ ទោះបីជាយ៉ាងណា កីឡាកររូបនេះជឿជាក់លើកណ្តាប់ដៃរបស់ខ្លួន។

កីឡាករប្រេស៊ីល Victor Hugo មានបទពិសោធក្នុងអាជីពប្រដាល់ជាង១០ឆ្នាំមកហើយ។ កីឡាករល្បី និងលំដាប់ឈានមុខនៅប្រទេសថៃរូបគេបានជួបស្ទើរអស់។ នេះជាលើកទី២ដែលរូបគេបានមកប្រកួតនៅប្រទេសកម្ពុជា បន្ទាប់ពីលើកទី១តាំងពីឆ្នាំ២០១៤។

លន បញ្ញា vs Victor Hugo Nunes (ប្រេស៊ីល)

កីឡាករ Victor Hugo បានប្រាប់ថា រូបគេសង្ឃឹមក្លាយជាអ្នកប្រដាល់ទី១ដែលបញ្ឈប់កំណត់ត្រាជ័យជម្នះរយៈពេល៣ឆ្នាំជាប់គ្នារបស់ដៃគូកម្ពុជា លន បញ្ញា។ កីឡាករនិយាយថា ៖«ខ្ញុំស្គាល់ លន បញ្ញា ខ្លះៗដែរគឺជាកីឡាករវ៉ៃមួយៗ ដោយព្យាយាមទាត់ ការពារ និងថយក្រោយ។ ខ្ញុំជឿជាក់លើសមត្ថភាពរបស់ខ្ញុំដែលអាចបញ្ចប់កំណត់ត្រារបស់គាត់បាន»។

ជាមួយគ្នានេះ កីឡាករតួកគី Ozmen បានជឿជាក់១០០% ថា ខ្លួននឹងផ្តួលកីឡាករកម្ពុជា ពេជ្រ សម្បត្តិ ឲ្យសន្លប់ក្នុងទឹកទី២តាមរយៈកណ្តាប់ដៃ និងជង្គង់។ កីឡាករបានប្រាប់សារព័ត៌មាន«កម្ពុជាថ្មី»ថា ៖«ខ្ញុំចូលចិត្តវ៉ៃដើរឆ្ពោះទៅមុខ។ មានគេប្រាប់ខ្ញុំថា សម្បត្តិ ជាកីឡាករសម្រុកចូលវ៉ៃ អត់ចេះថយក្រោយ អីចឹងការប្រកួតនេះដឹងថា កក្រើក។ ខ្ញុំជឿជាក់១០០% ខ្ញុំនឹងផ្តួលគាត់ឲ្យដេកក្នុងទឹកទី២ដោយកណ្តាប់ដៃ ឬអាចជង្គង់»។