កីឡា

ពេជ្រ ប៊ុនសិទ្ធ វ៉ៃតែ២ប្រកួតបានខ្សែក្រវាត់ និងប្រាក់រង្វាន់៥ពាន់ដុល្លារ

បានផុស

២ years មុន

នៅ

ថ្ងៃសៅរ៍ ២ មីនា ២០២៤

ដោយ

កីឡាករគុនខ្មែរ ពេជ្រ ប៊ុនសិទ្ធ ទទួលបានខ្សែក្រវាត់១គ្រឿងទៀតក្នុងអាជីពប្រដាល់របស់ខ្លួន បន្ទាប់ពីបានយកឈ្នះកីឡាករ ប៊ុន សុធា ដោយពិន្ទុនៅវគ្គផ្តាច់ព្រ័ត្រកាលពីយប់ថ្ងៃទី១ ខែមីនា ឆ្នាំ២០២៤ នៅសង្វៀនបាយ័ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតម៉ារ៉ាតុងដណ្តើមខ្សែក្រវាត់គុនខ្មែរទម្ងន់៥៧គីឡូក្រាម នៅជុំទី១ ពេជ្រ ប៊ុនសិទ្ធ បានប្រើពេល៣ទឹកពេញដើម្បីទទួលបានជ័យជម្នះដោយពិន្ទុលើកីឡាករ រិទ្ធី ចាន់ណា ខណៈ ប៊ុន សុធា បានប្រើពេលតែ២ទឹកប៉ុណ្ណោះដើម្បីផ្តួលកីឡាករ ណង សាវ ឲ្យអាជ្ញាកណ្តាលបញ្ឈប់ការប្រកួតក្នុងទឹកទី២។

នៅវគ្គផ្តាច់ព្រ័ត្រជើងខ្លាំងទាំងពីរបានប្រើពេល៣ទឹកពេញ។ ការប្រកួតទាំង៣ទឹកមើលឃើញថា ពេជ្រ ប៊ុនសិទ្ធ បានប្រើកណ្តាប់ដៃយ៉ាងល្អលើមុខរបស់ ប៊ុន សុធា ដែលព្យាយាមទាត់ជើងក្រោមជារឿយៗ។ ប៊ុន សុធា ក៏ព្យាយាមប្រើកណ្តាប់ដៃដែរ ប៉ុន្តែមិនសូវមានប្រសិទ្ធភាព ហើយ ពេជ្រ ប៊ុនសិទ្ធ ក៏ទាត់ជើងក្រោមបានច្រើនដែរ។

ចប់ការប្រកួត ចៅក្រមទាំង៥រូបបានផ្តល់ពិន្ទុឲ្យ ពេជ្រ ប៊ុនសិទ្ធ ឈ្នះពិន្ទុ ៤-១ លើ ប៊ុន សុធា ដើម្បីក្លាយជាម្ចាស់ខ្សែក្រវាត់អមដោយប្រាក់រង្វាន់២០លានរៀល (៥ពាន់ដុល្លារ)។ ចំណែក ប៊ុន សុធា ក្នុងនាមជាជើងឯករងទទួលបានប្រាក់រង្វាន់១២លានរៀល។

នេះជាខ្សែក្រវាត់លើកទី២របស់ ពេជ្រ ប៊ុនសិទ្ធ ក្នុងអាជីពប្រដាល់របស់ខ្លួន បន្ទាប់ពីលើកទី១បានឈ្នះខ្សែក្រវាត់ខារ៉ាបាវ ដែលមានប្រាក់រង្វាន់៦ពាន់ដុល្លារអាមេរិក ក្រោយផ្ដួលកីឡាករថៃ ផេតផាកភូមិ នៅវគ្គផ្ដាច់ព្រ័ត្រ កាលពីថ្ងៃទី២៥ ខែមិថុនា ឆ្នាំ២០២៣ នៅសង្វៀនបាយ័នស្ទឹងមានជ័យ៕