គ្រូ​​​​បាល់ទះ​កម្រិត​ពិភពលោកមកបណ្តុះបណ្តាល​ជំនាញ​គ្រូបង្វឹករយៈ​ពេល​​ ៥ ថ្ងៃ​នៅ​កម្ពុជា

នៅព្រឹកថ្ងៃ អង្គារ៍ ទី ០១ ខែ កក្កដា ឆ្នាំ ២០២៥ សហព័ន្ធបាល់ទះកម្ពុជា ដែលបានសហការជាមួយគណៈកម្មាធិការ​​ជាតិអូឡាំពិក​កម្ពុជា​ បានអញ្ជើញលោក Dusan Jarotta គ្រូឧទ្ទេសមកពីសហព័ន្ធកីឡាបាល់ទះពិភពលោក (FIVB) មកបណ្តុះបណ្តាលធនធានគ្រូបង្វឹកបាល់ទះក្នុងប្រទេស កម្ពុជា ឱ្យមានកម្រិតស្តង់ដាស្របតាមអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អាំង សិរីពិសិដ្ឋ អនុប្រធាន និងជាអគ្គលេខាធិការបាល់ទះកម្ពុជា បានអញ្ជើញចូលរួមជាអធិបតីក្នុងពិធីបើកវគ្គសាមគ្គីអូឡាំពិក ស្ដីពីគ្រូបង្វឹកកីឡាបាល់ទះកម្រិត “គ” (Olympic Solidarity Coaching Course Volleyball Level C នៅគណៈកម្មាធិការជាតិអូឡាំពិកកម្ពុជា។

លោកបានមានប្រសាសន៍អំពីគោលបំណងនៃការបើកវគ្គបណ្តាលបណ្តាលនេះ គឺដើម្បីផ្តល់ចំណេះជំនាញទៅដល់គ្រូបង្វឹកនៅក្នុងប្រទេស កម្ពុជា ។ ការបណ្តុះបណ្តាលនេះ គឺពិតជាសំខាន់​ណាស់ ពីព្រោះ កម្ពុជា ត្រូវបានអញ្ជើញដោយសហព័ន្ធបាល់ទះពិភពលោក ដើម្បីបញ្ជូនគ្រូបង្វឹកទៅរៀននៅទីនោះ ដើម្បីទទួលបានអាជ្ញាបណ្ណគ្រូបង្វឹកបាល់ទះកម្រិត FIVB ស្តង់ដាអន្តរជាតិ។ ប៉ុន្តែជារួម គឺសហព័ន្ធមានភាពពិបាក ក្នុងការជ្រើសរើសគ្រូបង្វឹក ដែលមានលក្ខណៈសម្បត្តិគ្រប់គ្រាន់។ ដូច្នេះហើយ ទើបជំហានដំបូងនេះ សហព័ន្ធបាល់ទះកម្ពុជា បានសម្រេចបើកវគ្គបណ្តុះបណ្តាលគ្រូបង្វឹកកម្រិត “គ” នេះជាមុនសិន។

លោក អាំង សិរីពិសិដ្ឋ បានឱ្យដឹងបន្តថា នៅក្នុងវគ្គបណ្តុះបណ្តាលនេះ គឺមានគ្រូបង្វឹក គ្រូជំនួយសរុបចំនួន ៤៥ រូបមកទទួលការបណ្តុះបណ្តាល។ ក្នុងនោះ ក្លិបបាល់ទះចំនួន ៣០ ជាង ក្នុងប្រទេស កម្ពុជា ទទួលបានការអញ្ញាតឱ្យក្នុង ១ ក្លិប បញ្ជូនគ្រូបង្វឹកចំនួន ១ នាក់មកចូលរួម ហើយចំណែកគ្រូបង្វឹកផ្សេងៗទៀត គឺត្រូវបានការចាត់តាំងដោយក្រសួងអប់រំ យុវជន និងកីឡា។

ជាមួយគ្នានេះ លោករំពឹងថា បន្ទាប់ពីវគ្គបណ្តុះបណ្តាលនេះបញ្ចប់ កម្ពុជា នឹងមានគ្រូបង្វឹកបាល់ទះស្របតាមកម្រិតស្តង់ដាអន្តរជាតិ។ ម្យ៉ាង​ទៀត កម្ពុជា នឹងមានធនធានគ្រូបង្វឹកគ្រប់គ្រាន់ ដើម្បីដឹកនាំក្រុមនីមួយៗ និងជម្រើសជាតិជាដើម ហើយមិនត្រឹមតែប៉ុណ្ណោះ អាចនឹងទទួលបានឱកាសចេញទៅដឹកនាំនៅក្រៅប្រទេសថែមទៀត។

គួរបញ្ជាក់ជាថ្មីថា វគ្គបណ្ដុះបណ្ដាលនេះ គឺធ្វើឡើងរយៈពេល ៥ ថ្ងៃ ពីថ្ងៃទី ៣០ ខែ មិថុនា ដល់ថ្ងៃទី ៥ ខែ កក្កដា ឆ្នាំ ២០២៥ដែលមាន Dr. Dusan Jarotta ជាគ្រូឧទ្ទេសមកពីសហព័ន្ធកីឡាបាល់ទះពិភពលោក (FIVB) និងមានសិក្ខាកាមមកពីអង្គភាពនានាចំណុះនាយកដ្ឋាននានានៃអគ្គនាយកដ្ឋានកីឡា, មន្ទីរអប់រំ យុវជន និងកីឡាខេត្ត, លោកគ្រូបង្វឹក គ្រូជំនួយ កីឡាករ នៃសហគម-ក្លិបកីឡាបាល់ទះ ចំនួន ៣២ សរុបចំនួន ៤៥រូប (ស្រី ១៣រូប)៕

អត្ថបទ៖ កុសល