​ថៃ​ ប្រកាសអាសន្ន​ភ្លៀង​ធ្លាក់​ខ្លាំង​ក្នុង​ខេត្ត​ចំនួន​៥០ ដោយទីក្រុង​បាងកក​​រង​គ្រោះ​ខ្លាំងជាងគេ

យោងតាមការចេញផ្សាយរបស់សារព័ត៌មាន Khaosod នៅថ្ងៃទី១៥ខែ តុលា នាយកដ្ឋានឧតុនិយមថៃបានព្រមានពីភ្លៀងធ្លាក់ខ្លាំងពាសពេញខេត្តចំនួន៥០ ដោយទីក្រុងបាងកកត្រូវបានព្យាករណ៍ថានឹងប្រឈមភ្លៀងធ្លាក់ខ្លាំងជាងគេ។

នាយកដ្ឋានឧតុនិយមថៃ បានព្យាករណ៍ថា នឹងមានបាតុភូតផ្គរ រន្ទះ និងភ្លៀងធ្លាក់ខ្លាំងពាសពេញតំបន់ភាគច្រើននៃប្រទេស ដែលធ្វើឲ្យប៉ះពាល់ដល់តំបន់ដីគោក និងសមុទ្រ។ ប្រហែល ៦០-៧០% នៃប្រទេសថៃត្រូវបានព្យាករណ៍ថានឹងមានភ្លៀងធ្លាក់ ពិសេសមានភ្លៀងធ្លាក់ខ្លាំងនៅភាគខាងជើង កណ្តាល ខាងកើត និងខាងត្បូង។

នាយកដ្ឋានឧតុនិយមថៃបាននិយាយថា ភ្លៀងធ្លាក់នេះគឺបណ្តាលមកពីរលកខ្យល់បក់ពីទិសខាងកើត ដែលនាំសំណើមពីសមុទ្រចិនខាងត្បូង រួមជាមួយនឹងខ្យល់មូសុងនិរតីដែលគ្របដណ្តប់លើសមុទ្រ Andaman ឈូងសមុទ្រថៃ និងតំបន់ភាគខាងត្បូង។

អាជ្ញាធរ​ថៃបាន​ណែនាំ​ដល់​ប្រជាពលរដ្ឋ​នៅ​តំបន់​រងគ្រោះ​ឱ្យ​មានការ​ប្រុង​ប្រយ័ត្ន​ចំពោះ​ទឹកជំនន់​ភ្លាមៗ ភ្លៀង​ធ្លាក់​ខ្លាំង និង​ផ្គរ​រន្ទះ ជាពិសេស​តំបន់​ងាយ​នឹង​មាន​ទឹកជំនន់​។ អ្នកដំណើរត្រូវបានជំរុញឱ្យមានការប្រុងប្រយ័ត្នបន្ថែមនៅពេលធ្វើដំណើរឆ្លងកាត់ផ្លូវលិចទឹក និងត្រូវមានឆ័ត្រ ឬពាក់អាវភ្លៀងនៅពេលចេញទៅក្រៅ។

ចំពោះនៅតំបន់សមុទ្រ រលកនៅសមុទ្រ Andaman និងឈូងសមុទ្រថៃ ត្រូវបានគេរំពឹងថានឹងឡើងដល់ប្រហែល ១ ម៉ែត្រ និងច្រើនជាង ២ ម៉ែត្រនៅក្នុងតំបន់ដែលមានព្យុះ។ ប្រជានេសាទ និងប្រតិបត្តិករទូកត្រូវបានណែនាំឲ្យជៀសវាងការជិះទូកក្នុងពេលមានព្យុះផ្គររន្ទះ។ ការ​ប្រកាស​អាសន្ន​អាកាសធាតុនេះនឹង​មាន​ប្រសិទ្ធភាព​ចាប់​ពី​ព្រឹក​ថ្ងៃ​ពុធ​នេះរហូតដល់​ព្រឹក​ថ្ងៃ​ព្រហស្បតិ៍៕

អត្ថបទ៖ ប៊ុន សុភាព