សភាយុវពាណិជ្ជករអន្តរជាតិកម្ពុជា ប្រារព្ធខួប ១៥ឆ្នាំ ដើម្បីជាឱកាសទាក់ទាញការវិនិយោគមកកម្ពុជា

សភាយុវពាណិជ្ជករអន្តរជាតិកម្ពុជា (JCI Cambodia) នឹងរៀបចំពិធីអបអរសាទរខួប ១៥ ឆ្នាំដែលជាព្រឹត្តិការណ៍ដ៏ធំប្រចាំឆ្នាំរបស់ខ្លួន ក្រោមប្រធានបទដ៏មានអត្ថន័យមួយ “កេរដំណែលអ្នកដឹកនាំ (LEGACY OF LEADERS)” នៅថ្ងៃទី២៨ និងទី២៩ ខែ តុលា ឆ្នាំ ២០២៥ ក្នុងគោលបំណងជួបជុំសមាជិករបស់ខ្លួនទាំងជាតិ និងអន្តជាតិ ដើម្បីបន្តគាំទ្រនូវស្មារតីអភិវឌ្ឍសេដ្ឋកិច្ចជាតិ ព្រមទាំងកៀរគរបណ្ដាពាណិជ្ជករអន្តរជាតិ មកទទួលបាននូវបទពិសោធ និងកាលានុវត្តភាពដើម្បីទាក់ទាញការវិនិយោគមកកាន់ប្រទេសកម្ពុជាប្រកបដោយសក្ដានុពល។

ព្រឹត្តិការណ៍រយៈពេលពីរថ្ងៃនេះ នឹងរៀបចំនៅសណ្ឋាគារ Sun & Moon Riverside ក្រោមវត្តមានដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្រ្ដីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា ដោយរំពឹងថា មានអ្នកចូលរួមសរុបជាង ២០០ នាក់ ដែលជាសមាជិក JCI ថ្នាក់សកល និង JCI Cambodia, និងភ្ញៀវជាតិ និងអន្តរជាតិផងដែរ ។

ក្នុងឱកាសប្រារព្ធខួប ១៥ឆ្នាំ នឹងមានសកម្មភាពសំខាន់ៗជាច្រើន ក្នុងនោះមានវគ្គបណ្តុះបណ្តាល និងការភ្ជាប់ទំនាក់ទំងអាជីវកម្មជាតិនិង អន្តរជាតិផងដែរ។ នៅថ្ងៃទី ២៨ ខែតុលា JCI Cambodia នឹងរៀបចំមហាសន្និបាតថ្នាក់ជាតិរបស់ JCI Cambodia, ការតាំងពិព័រណ៍ពាណិជ្ជកម្មផ្សេង, និងពិធីអាហារស្វាគមន៍ពេលល្ងាចជូនសមាជិក-សមាជិកា នងភ្ញៀវកិត្តិយសជាតិ និងអន្តរជាតិថែមទៀតផង។ ចំណែកនៅថ្ងៃទី ២៩ JCI Cambodia នឹងរៀបចំកម្មវិធីពិសេសៗដូចជា៖ វគ្គបណ្ដុះបណ្ដាលជំនាញផ្សេងៗ, ការផ្គូផ្គងអាជីវកម្ម, និងបិទបញ្ចប់ដោយជាមួយពិធីអបអរសាទរខួបទី១៥ និង លៀងសាយភោជន៍រួមមានការសម្តែងសិល្បៈ, ពិធីប្រគល់ពានរង្វាន់និងលិខិតសរសើរ, និងការថ្លែងអំណរគុណដល់អ្នកឧបត្ថម្ភ។

យ៉ាងណា ការប្រារព្ធខួប ១៥ ឆ្នាំនេះ មិនត្រឹមតែជាការអបអរសាទរនូវដំណើរដ៏វែងឆ្ងាយរបស់  JCI Cambodia ប៉ុណ្ណោះទេ ប៉ុន្តែ ក៏ជាការបន្តនូវ “កេរដំណែលអ្នកដឹកនាំ” ដែលបានកសាងឡើង។ តាមរយៈកម្មវិធីនេះ សង្ឃឹមថានឹងអាចពង្រឹងភាពជាដៃគូអន្តរជាតិ និងជំរុញទឹកចិត្តអ្នកដឹកនាំវ័យក្មេងជំនាន់ក្រោយឲ្យបន្តបង្កើតផលវិជ្ជមានដល់សង្គមជាតិ។

សូមជម្រាបថា សភាយុវពាណិជ្ជករអន្តរជាតិ កម្ពុជា ជាអង្គការមិនរកប្រាក់ចំណេញបង្កើតឡើងនៅក្នុងឆ្នាំ២០១០ ដែលបាននិងកំពុងរៀបចំកម្មវិធីជាច្រើនក្នុងទិសដៅដោះស្រាយបញ្ហាសង្គម និងអភិវឌ្ឍយុវជនឱ្យក្លាយជាសហគ្រិនឆ្នើមស្របតាមទស្សនៈរបស់អង្គភាព  និងគោលនយោបាយអភិវឌ្ឍរបស់ប្រទេស​កម្ពុជា៕