ក្រោយ​ឆក់​យក​ជីវិត​ជាង១៤០​នាក់​នៅហ្វីលីពីន ព្យុះ«កាលម៉េហ្គី»កំពុង​វាយប្រហារវៀតណាមវិញ​ម្ដង

ព្យុះទីហ្វុង «កាលម៉េហ្គី (Kalmaegi)» បានបោកបក់ចូលភាគកណ្តាលប្រទេសវៀតណាម​កាលពីល្ងាចថ្ងៃព្រហស្បតិ៍​ទី​៦​ខែ​វិច្ឆិកា​ ដោយនាំមកនូវខ្យល់បក់បោក និងភ្លៀងធ្លាក់យ៉ាងគំហុក បន្ទាប់ពីព្យុះដ៏​កំណាច​នេះបានសម្លាប់មនុស្សយ៉ាងហោចណាស់​១៤២​នាក់នៅក្នុងប្រទេសហ្វីលីពីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម VN Express ក្រសួងធនធានធម្មជាតិ និងបរិស្ថានរបស់ប្រទេសវៀតណាម បាននិយាយថា ព្យុះ​«កាលម៉េហ្គី»មាន​កម្លាំងខ្យល់បក់រហូតដល់​១៤៩​គីឡូម៉ែត្រក្នុងមួយម៉ោង ដោយបង្ខំ​ឲ្យ​មានការជម្លៀសមនុស្សរាប់ពាន់នាក់ពីខេត្តជាប់មាត់សមុទ្រ រួមមាន Gia Lai និង Quang Ngai។

លោក Pham Anh Tuan មន្ត្រីជាន់ខ្ពស់​ម្នាក់​នៅ​ខេត្ត Gia Lai ជាទីដែលប្រជាជនជាង៧​០០០នាក់​ត្រូវបានជម្លៀសចេញមុនពេល​ព្យុះ​ទៅ​ដល់ បាន​រៀបរាប់​ថា «នេះគឺជាព្យុះទីហ្វុងដ៏ធំមួយដែលមានសមត្ថភាពបំផ្លិចបំផ្លាញដ៏គួរ​ឲ្យ​ភ័យខ្លាច»។

អ្នកស្រុក​ម្នាក់​ឈ្មោះ Vu Van Hao អាយុ​៤៨​ឆ្នាំបានប្រាប់​ទីភ្នាក់ងារព័ត៍មាន AFP ដោយពណ៌នាអំពីបង្អួចដែលបែកខ្ទេចខ្ទី និងអគារដែលរងការខូចខាតថា «ខ្យល់បក់ខ្លាំង គ្មានអ្វីអាចទប់ទល់បានទេ»។

ប្រព័ន្ធផ្សព្វផ្សាយរដ្ឋបានរាយការណ៍ពីការដាច់ចរន្តអគ្គិសនី និងការរំខានដល់ការដឹកជញ្ជូន ដោយសាលារៀន និងព្រលានយន្តហោះបានបិទ​នៅក្នុងខេត្តមួយចំនួន។ អ្នកព្យាករបានព្រមានអំពីទឹកជំនន់ភ្លាមៗ និងការរអិលបាក់ដី។

ព្យុះទីហ្វុងនេះ​បានវាយប្រហារ ក្រោយ​ភាគកណ្តាលនៃប្រទេសវៀតណាម​​ទើប​តែ​ជួប​​គ្រោះ​ទឹកជំនន់ ហើយ​បានសម្លាប់មនុស្សយ៉ាងហោចណាស់​៤៧​នាក់ កាលពីសប្តាហ៍មុន និងបាន​ជន់​លិចទឹកផ្នែកខ្លះនៃទីក្រុងប្រវត្តិសាស្ត្រនៃទីក្រុង Hue និង Hoi An។

ប្រធានាធិបតីវៀតណាមលោក To Lam បានកាត់បន្ថយសម័យប្រជុំនៃគណៈកម្មាធិការកណ្តាលរបស់បក្សកុម្មុយនិស្តដែលកំពុងកាន់អំណាច ដើម្បីត្រួតពិនិត្យការត្រៀមរៀបចំទប់ទល់​នឹង​ព្យុះ។ យោងតាមការិយាល័យស្ថិតិជាតិ ប្រទេសវៀតណាម​មាន​ខ្យល់ព្យុះប្រហែល​១០​ដងក្នុងមួយឆ្នាំ ដោយ​​​មាន​តួលេខ​អ្នក​ស្លាប់ ឬបាត់ខ្លួនចំនួន​២៧៩​នាក់​រួចមកហើយពីគ្រោះមហន្តរាយធម្មជាតិក្នុងឆ្នាំ​២០២៥។

សូម​ជម្រាប​ថា មុន​ទៅ​ដល់​វៀតណាម ព្យុះ​«កាលម៉េហ្គី»​បាន​បង្ក​គ្រោះថ្នាក់​យ៉ាង​ធ្ងន់ធ្ងរ​នៅក្នុងប្រទេសហ្វីលីពីន ដោយ​បានបំផ្លិចបំផ្លាញកោះ Cebu និង Negros បង្ក​ជា​ទឹកជំនន់ដែលមិនធ្លាប់មានពីមុនមក។ លោក​ប្រធានាធិបតី Ferdinand Marcos Jr. បាន​ប្រកាស​ពី​​អាសន្ន​​នៃ​គ្រោះមហន្តរាយ​ជាតិ ដោយមនុស្ស​ជាង​៥០០ ០០០​នាក់​ត្រូវ​ភៀសខ្លួន។

អ្នកវិទ្យាសាស្ត្របានភ្ជាប់ការកើនឡើងនៃកម្លាំងព្យុះដូចជា «កាលម៉េហ្គី» ទៅនឹង​ការប្រែប្រួលអាកាសធាតុដែលជំរុញដោយ​កត្តា​មនុស្ស ជា​ហេតុ​ធ្វើ​ឲ្យ​មហាសមុទ្រកាន់តែក្តៅ និងភ្លៀង​​កាន់តែ​ធ្លាក់​​​ខ្លាំង៕

ប្រែ​សម្រួល៖ ឈាង