Messi ត្រូវការបញ្ជូនបាល់ ៥ លើកទៀត នឹងក្លាយជាស្តេចបញ្ជូន ក្នុងប្រវត្តិសាស្ត្រ​បាល់ទាត់

ខ្សែប្រយុទ្ធរបស់ក្រុម Inter Miami កីឡាករ Lionel Messi ត្រូវការការបញ្ជូនឱ្យមិត្តរួមក្រុមស៊ុតបញ្ចូលទីត្រឹមតែ ៥ លើកទៀតប៉ុណ្ណោះ នឹងបំបែកកំណត់ត្រាក្លាយជាស្តេចបញ្ជូនបាល់ (assists) ក្នុងប្រវត្តិសាស្ត្របាល់ទាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ០៩ ខែ វិច្ឆិកា ឆ្នាំ ២០២៥ ខ្សែប្រយុទ្ធម្ចាស់អាវលេខ ១០ Lionel Messi បានស៊ុតបញ្ចូលទី ២ គ្រាប់ និងបញ្ជូន (assist) ១ លើក រួមចំណែកជួយឱ្យក្រុម Inter Miami យកឈ្នះលើក្រុម Nashville ក្នុងលទ្ធផល ៤-០ នៃការប្រកួតលីគកំពូល អាមេរិក Major League Soccer។

ការបញ្ជូន ១ លើកចុងក្រោយនេះ បានធ្វើឱ្យ Messi បង្គ្រប់ចំនួនបញ្ជូនរបស់ខ្លួនបាន ៤០០ លើកនៅក្នុងអាជីព។ ស្ថិតិនេះ បានធ្វើឱ្យ Messi ក្លាយជាកីឡាករបញ្ជូនបាល់ឱ្យមិត្តរួមក្រុមស៊ុតបញ្ចូលទីច្រើនជាងគេបំផុតសម្រាប់បាលទាត់បច្ចុប្បន្ន ពោលគឺលើសកីឡាករឈរលេខ ២ Thomas Muller រហូតដល់ទៅ ៤៨ លើកឯណោះ។

ប៉ុន្តែបើគិតអំពីកំណត់ត្រាបាល់ទាត់គ្រប់សម័យកាលវិញ គឺ Messi ស្ថិតនៅពីក្រោយអតីតខ្សែប្រយុទ្ធ Real Madrid និងជម្រើសជាតិ ហុងគ្រី លោក Ferenc Puskás ចំនួន ៤ លើក ដែលលោករកបានការបញ្ជូនចំនួន ៤០៤ លើក អំឡុងពេលលោកនៅជាកីឡាករ។

ដូច្នេះប្រធានក្រុមរបស់ក្រុមជម្រើសជាតិ អាហ្សង់ទីន Lionel Messi ត្រូវការការបញ្ជូនត្រឹមតែ ៥ លើកទៀតប៉ុណ្ណោះ នឹងក្លាយជាកីឡាករបាល់ទាត់បញ្ជូនបាល់ឱ្យមិត្តរួមក្រុមស៊ុតបញ្ចូលទីច្រើនជាងគេបំផុតនៅក្នុងប្រវត្តិសាស្ត្របាល់ទាត់គ្រប់សម័យកាល៕

អត្ថបទ៖ សេម កុសល