នគរបាលខណ្ឌចំការមន បន្តផ្សព្វផ្សាយផលប៉ះពាល់គ្រឿងញៀន ការប្រើប្រាស់បារីអេឡិចត្រូនិក បញ្ហាក្មេងទំនើង

នគរបាលខណ្ឌចំការមន បានបន្តអនុវត្តផ្សព្វផ្សាយផលប៉ះពាល់គ្រឿងញៀន ការប្រើប្រាស់បារីអេឡិចត្រូនិក បញ្ហាក្មេងទំនើងក្នុងមូលដ្ឋាន និង ណែនាំពីច្បាប់ចរាចរណ៍ដល់ប្រជាពលរដ្ឋនៅក្នុងសង្កាត់ទន្លេបាសាក់ ឲ្យមានការយល់ដឹងកាន់តែច្បាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះផ្សព្វផ្សាយនេះបានធើ្វឡើងនៅថ្ងៃទី ១៣ ខែមីនា ឆ្នាំ ២០២៥ ដឹកនាំដោយលោកវរសេនីយ៍ត្រី តូ បុណ្យនុរាជ្យ អធិការរងខណ្ឌចំការមន សហការជាមួយគណៈបញ្ជាការឯកភាពខណ្ឌ និងសង្កាត់ ចុះធ្វើវេទិកាសាធារណៈ និងផ្សព្វផ្សាយពីគោលនយោបាយភូមិ-សង្កាត់ មានសុវត្ថិភាព (ផលប៉ះពាល់ នៃការប្រើប្រាស់សារធាតុញៀន និងបញ្ហាក្មេងទំនើង) ដល់ប្រជាពលរដ្ឋ។

លោកអធិការរងខណ្ឌចំការមនទទួលផែនការងារព្រហ្មទណ្ឌ បានឲ្យដឹងថា ការអប់រំ ផ្សព្វផ្សាយផលប៉ះពាល់ គ្រឿងញៀន បញ្ហាក្មេងទំនើង និង បញ្ហាចរាចរណ៍ គឺជាកាតព្វរបស់អាជ្ញាធរ ត្រូវតែចុះផ្សព្វផ្សាយទៅកាន់មនុស្សគ្រប់មជ្ឈដ្ឋាន ដែលជាកត្តាចម្បងមួយផ្នែកធំ ដើម្បីបញ្ជ្រាបអំពីផលប៉ះពាល់ទៅកាន់ពលរដ្ឋដែលជាមូលដ្ឋានគ្រឹះមួយសម្រាប់បន្តផ្សព្វផ្សាយដល់អ្នកដទៃទៀត ដើម្បីកាត់បន្ថយបញ្ហាសង្គមបានកាន់តែប្រសើរ។

ចុងក្រោយ លោកសំណូមពរទៅកាន់ពលរដ្ឋដែលជាអាណាព្យាបាល ត្រូវត្រួតពិនិត្យការសិក្សារបស់កូនៗ ឲ្យបានជាប់ និងទូន្មានជៀសឲ្យឆ្ងាយពីគ្រឿងញៀន ដើម្បីក្លាយជាកូនល្អ សម្រាប់គ្រួសារ និង ក្លាយជាយុវជនគំរូរបស់សង្គម ហើយប្រសិនបើមានបញ្ហាអ្វីមួយនៅក្នុងមូលដ្ឋាន ត្រូវប្រញាប់រាយការណ៍ជូនអាជ្ញាធរ ដើម្បីអាជ្ញាធរមានសមត្ថកិច្ចចុះអន្តរាគមន៍ទាន់ពេលវេលា៕

ដោយ ៖ ម៉េង