ព័ត៌មានអន្ដរជាតិ

មនុស្សស្លាប់ជាង៥០នាក់ ដោយសារទឹកជំនន់ធ្ងន់ធ្ងរនៅថៃ ម៉ាឡេស៊ី និងឥណ្ឌូណេស៊ី

បានផុស

៦ ខែ មុន

នៅ

ថ្ងៃព្រហស្បតិ៍ ២៧ វិច្ឆិកា ២០២៥

ដោយ

Chheang

ទឹកជំនន់ដែលកើតឡើងនៅប្រទេសថៃ ម៉ាឡេស៊ី និងឥណ្ឌូណេស៊ី បានសម្លាប់មនុស្សជាង៥០នាក់ ដែលជាគ្រោះមហន្តរាយអាកាសធាតុដ៏អាក្រក់បំផុតមួយនៅអាស៊ីអាគ្នេយ៍ក្នុងរយៈពេលប៉ុន្មានឆ្នាំចុងក្រោយ។

*ទឹកជំនន់នៅខេត្តសុងក្លាប្រទេសថៃ (រូបថត៖ AP)*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចេញផ្សាយនាថ្ងៃទី២៧ខែវិច្ឆិកាឆ្នាំ២០២៥ ABC News បានរាយការណ៍ថា តួលេខអ្នកស្លាប់នៅថៃបានកើនឡើងដល់៣៣នាក់ ដោយជនរងគ្រោះត្រូវបានទឹកហូរគួចយកទៅ បណ្ដាលឲ្យលង់ និងឆក់ចរន្តអគ្គិសនី។ ភ្លៀងធ្លាក់ខ្លាំងរយៈពេល៣ថ្ងៃកាលពីសប្តាហ៍មុន បានជន់លិចក្រុងហាតយ៉ៃ (Hat Yai) ដែលជាមជ្ឈមណ្ឌលពាណិជ្ជកម្មភាគខាងត្បូងរបស់ប្រទេស ដោយកត់ត្រាកម្រិតទឹកភ្លៀង៣៣៥មិល្លីម៉ែត្រ កាលពីថ្ងៃសុក្រ ដែលជាកម្រិតខ្ពស់បំផុតក្នុងរយៈពេលមួយថ្ងៃមិនធ្លាប់មាន៣០០ឆ្នាំមកនេះ។

កងទ័ពថៃបានដាក់ពង្រាយទូក២០០គ្រឿង ឧទ្ធម្ភាគចក្រ២០គ្រឿង និងនាវាផ្ទុកយន្តហោះតែមួយគត់របស់ខ្លួន ដើម្បីដឹកជញ្ជូនសម្ភារៈ និងជម្លៀសអ្នកជំងឺ ដោយសារទឹកជំនន់បានប៉ះពាល់ដល់មនុស្ស២,៧លាននាក់ និងផ្ទះសម្បែងជិត១លានខ្នងទូទាំងប្រទេស។

នៅប្រទេសឥណ្ឌូណេស៊ី មនុស្សយ៉ាងហោចណាស់២៣នាក់បានស្លាប់នៅកោះស៊ូម៉ាត្រា ហើយជាង២០នាក់ទៀតនៅតែបាត់ខ្លួន បន្ទាប់ពីទឹកជំនន់និងបំណាក់ដីវាយប្រហារយ៉ាងខ្លាំងទៅលើតំបន់ភ្នំនៅភាគខាងជើងស៊ូម៉ាត្រា។ កិច្ចខិតខំប្រឹងប្រែងសង្គ្រោះត្រូវបានរារាំងដោយសារការដាច់ចរន្តអគ្គិសនី ការដាច់ផ្លូវ និងភ្លៀងធ្លាក់ខ្លាំងបន្តបន្ទាប់គ្នា។