ព័ត៌មានអន្ដរជាតិ

ការបោះឆ្នោតប្រជាមតិគាំទ្រវិសោធនកម្មរដ្ឋធម្មនុញ្ញនៅថៃ ក្លាយជារបត់នយោបាយក្តៅ

បានផុស

៤ ខែ មុន

នៅ

ថ្ងៃពុធ ១៤ មករា ២០២៦

ដោយ

ការបោះឆ្នោតនៅប្រទេសថៃនៅថ្ងៃទី៨ខែកុម្ភៈខាងមុខ មិនត្រឹមតែជាការបោះឆ្នោតជ្រើសតំណាងរាស្ត្រតាមធម្មតា ដូចដែលធ្លាប់ធ្វើកន្លងមកទេ ប៉ុន្តែជាការបោះឆ្នោតលើកនេះបានភ្ជាប់ជាមួយការធ្វើប្រជាមតិសម្រាប់កែប្រែរដ្ឋធម្មនុញ្ញដែលតាក់តែងឡើងក្នុងឆ្នាំ២០១៧ដោយក្រុមយោធាក្នុងជំនាន់រដ្ឋាភិបាលរបស់អតីតនាយករដ្ឋមន្ត្រី ប្រាយុធ ចាន់អូចា។

អ្នកបោះឆ្នោតនៅប្រទេសថៃកាលឆ្នាំ២០២៣។រូបភាព Xinhua

នៅក្នុងការបោះឆ្នោតមុនអាណត្តិរបស់ប្រទេសថៃនាពេលខាងមុខនេះ បន្ទាប់ពីមានវិបត្តិនយោបាយដ៏ធ្ងន់ធ្ងររហូតដល់ដូរនាយករដ្ឋមន្ត្រីចំនួន៣រូបក្នុងរយៈពេលមិនដល់៣ឆ្នាំ ប្រទេសថៃប្រឈមការកែប្រែរដ្ឋធម្មនុញ្ញដ៏ចម្រូងចម្រាស ដែលត្រូវបានក្រុមអ្នកប្រជាធិបតេយ្យជឿនលឿនចោទថា រដ្ឋធម្មនុញ្ញឆ្នាំ២០១៧ដែលតាក់តែងក្រោមរបបយោធា បានលម្អៀងទៅរកក្រុមយោធានិងរបបរាជបល្ល័ង្ក។

សារព័ត៌មានថៃ Thai Enquirer បានស្រង់សម្តីរបស់បេក្ខជនតំណាងរាស្ត្រនៃគណបក្សភឿថៃ លោក Chaturon Chaisang ដែលជំរុញឲ្យពលរដ្ឋថៃបោះឆ្នោតគាំទ្រដល់ការធ្វើ់ប្រជាមតិសម្រាប់កែប្រែរដ្ឋធម្មនុញ្ញថៃ ដែលត្រូវបានគេចោទប្រកាន់ថា «ជាឧបករណ៍ឬជាអាវុធនយោបាយ» សម្រាប់បង្ក្រាបក្រុមអ្នកប្រជាធិបតេយ្យជឿនលឿន ដែលប្រឆាំងរបបរាជានិយមរបស់ថៃ។

នៅក្នុងពិធីឃោសនារកសំឡេងឆ្នោត លោក Chaturon បានសង្កត់ធ្ងន់ថា រដ្ឋធម្មនុញ្ញថ្មីមានទំនាក់ទំនងយ៉ាងជិតស្និទ្ធទៅនឹងជីវភាពរស់នៅរបស់ប្រជាពលរដ្ឋ ដែលអនុញ្ញាតឱ្យមានរដ្ឋាភិបាលដ៏រឹងមាំ ការអនុវត្តគោលនយោបាយប្រកបដោយប្រសិទ្ធភាព និងប្រព័ន្ធត្រួតពិនិត្យ និងតុល្យភាពដោយយុត្តិធម៌។

លោក បានលើកឡើងថា ការបោះឆ្នោតនៅថ្ងៃទី ៨ខែកុម្ភៈ អនុញ្ញាតឱ្យប្រជាពលរដ្ឋមិនត្រឹមតែជ្រើសរើសសមាជិកសភាប៉ុណ្ណោះទេ ប៉ុន្តែថែមទាំងបង្កើតអនាគតរបស់ប្រទេសតាមរយៈការបោះឆ្នោតប្រជាមតិផងដែរ។ គណបក្សភឿថៃបានលើកទឹកចិត្តអ្នកបោះឆ្នោតឱ្យអនុវត្តសិទ្ធិរបស់ពួកគេ និងអនុម័តរដ្ឋធម្មនុញ្ញថ្មី ដើម្បីជួយពង្រឹងទាំងអភិបាលកិច្ច និងជីវិតប្រចាំថ្ងៃក្នុងរយៈពេលវែង។

រដ្ឋធម្មនុញ្ញថៃឆ្នាំ២០១៧ បានរារាំងគណបក្សឈ្នះឆ្នោតក្នុងការដឹកនាំរដ្ឋាភិបាលថៃកាលឆ្នាំ ២០១៩ និង ឆ្នាំ២០២៣ ដោយសារតែរបៀបនៃការបោះឆ្នោតយល់ព្រមលើបេក្ខភាពនាយករដ្ឋមន្ត្រី ត្រូវទទួលការយល់ព្រមពីសមាជិកព្រឹទ្ធសភាចំនួន២៥០ រូបដោយត្រូវចូលរួមបោះឆ្នោតជាមួយសមាជិកសភាជាប់ឆ្នោតថ្មីចំនួន៥០០រូប ហើយ អ្នកដែលទទួលបានសំឡេងគាំទ្រលើស៥០ភាគរយបូក១ ទើបជាប់ជាស្ថាពរ។ ដូចនេះ បេក្ខជនណាដែលក្រុមសមាជិកព្រឺទ្ធសភាមិនគាំទ្រ គឺគេងាយធ្លាក់ចេញពីកៅអីនាយករដ្ឋមន្ត្រី បើព្រឹទ្ធសភាមិនគាំទ្រ៕

រ៉ាន់ រើយ