ភាគខាងជើងវៀតណាមត្រជាក់ខ្លាំង! សីតុណ្ហភាពធ្លាក់ចុះដល់ ០អង្សាសេ

ដ្បិតតែតំបន់មួយចំនួននៅវៀតណាម ចុះត្រជាក់ក៏ដោយ ប៉ុន្តែនៅភាគខាងជើងប្រទេសនេះ អាកាសធាតុប្រែត្រជាក់ខ្លាំងបំផុត ដោយសីតុណ្ហភាពធ្លាក់ដល់ ០អង្សាសេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ VN Express, សីតុណ្ហភាព០អង្សាសេ ត្រូវបានកត់ត្រានៅពេលព្រឹកថ្ងៃព្រហស្បតិ៍ទី២២ខែមករាឆ្នាំ២០២៦ លើកំពូលភ្នំ Mau Son ក្នុងស្រុក Loc Binh នៃខេត្ត Lang Son ជាប់ព្រំដែនចិន។

ជាមួយនឹងអាកាសធាតុត្រជាក់ដល់ឆ្អឹងបែបនេះ អាជ្ញាធរបានព្រមានពីលទ្ធភាពនៃការកើតមានការកកដុំទឹកកក ដែលអាចប៉ះពាល់ធ្ងន់ធ្ងរដល់ការចិញ្ចឹមសត្វ និងដំណាំកសិកម្មរបស់ប្រជាជន។

ក្រៅពីសីតុណ្ហភាពធ្លាក់ដល់ ០អង្សាសេនៅលើភ្នំកម្ពស់១ ៥០០ម៉ែត្រមួយនេះ កន្លែងផ្សេងទៀតនៅភាគខាងជើងវៀតណាមក៏ចុះត្រជាក់ខ្លាំងផងដែរ ដោយនៅភ្នំ Trùng Khánh សីតុណ្ហភាពចុះដល់ ៤ អង្សាសេ ចំណែកនៅ Tam Dao ធ្លាក់ដល់ ៦ អង្សាសេ។

ទោះបីជាយ៉ាងណាក៏ដោយ អ្នកព្យាករបានព្រមានថា សីតុណ្ហភាពនឹងបន្តធ្លាក់ចុះខ្លាំងជាងនេះទៀត នៅប៉ុន្មានថ្ងៃខាងមុខ ខណៈទីក្រុងហាណូយ ក៏ត្រៀមខ្លួនទទួលបាតុភូតខ្យល់ត្រជាក់ផងដែរ។

សូមជម្រាបថា ភាគខាងជើងវៀតណាមកំពុងស្ថិតក្នុងស្ថានភាពត្រជាក់ខ្លាំងបំផុត ដែលតម្រូវឲ្យប្រជាជនមានការប្រុងប្រយ័ត្នខ្ពស់ចំពោះសុខភាព៕

អត្ថបទ៖ សុខ សុវណ្ណ