ព័ត៌មានអន្ដរជាតិ

១៧រដ្ឋនៅអាមេរិកត្រូវប្រកាសអាសន្ន ព្រោះព្យុះទឹកកកដ៏ធ្ងន់ធ្ងរពេក

បានផុស

៣ ខែ មុន

នៅ

ថ្ងៃសៅរ៍ ២៤ មករា ២០២៦

ដោយ

មនុស្សជាង១៨០លាននាក់ កំពុងស្ថិតក្នុងការប្រុងប្រយ័ត្ន ចំពោះព្យុះទឹកកកដ៏ធំចុងសប្តាហ៍ ដែលមានឥទ្ធិពលពីរដ្ឋ New Mexico ទៅកាន់រដ្ឋ Maine ហើយត្រូវបានគេរំពឹងថា នឹងធ្វើឱ្យភាគខាងត្បូងសហរដ្ឋអាមេរិកមានទឹកកក និងព្រិលដ៏គ្រោះថ្នាក់។

យោងតាមសារព័ត៌មាន ABC, អ្នកព្យាករណ៍ឱ្យដឹងថា ព្យុះនេះចាប់ផ្តើមនៅរសៀលថ្ងៃសុក្រ នាំមកនូវព្រិលនិងទឹកកកនៅ រដ្ឋ New Mexico និងតំបន់ Texas panhandle ។ នៅពេលល្ងាច ទីក្រុង Dallas នឹងឃើញមានខ្យល់បោកបក់ខ្លាំង ហើយទីក្រុង Oklahoma នឹងមានព្រិលធ្លាក់ផងដែរ។

ចំណែកថ្ងៃសៅរ៍នេះ គឺជាថ្ងៃដែលមានព្រិលច្រើនបំផុត លាយឡំជាមួយទឹកកកដ៏គ្រោះថ្នាក់ និងព្រិលធ្លាក់ខ្លាំងនៅភាគខាងត្បូងប្រទេស។

មិនតែប៉ុណ្ណោះ មានរដ្ឋចំនួន១៧ បានប្រកាសដាក់រដ្ឋរបស់ពួកគេ ក្នុងភាពអាសន្ន ខណៈដែលព្យុះជិតមកដល់រដ្ឋ ដូចជា៖ Alabama, Arkansas, Georgia, Kansas, Kentucky, Louisiana, Maryland, Mississippi, Missouri, New Jersey, New York, North Carolina, Pennsylvania, South Carolina, Tennessee, Texas and Virginia ។

លើសពីនេះ ក្រុងវ៉ាស៊ីនតោន ក៏បានប្រកាសដាក់ក្រុងរបស់ខ្លួន ក្នុងគ្រាអាសន្នផងដែរ។

រីឯជើងហោះហើរជាង ២ ៣០០ ដែលចេញ-ចូលសហរដ្ឋអាមេរិក ដែលគ្រោងនឹងហោះថ្ងៃសៅរ៍នេះ ឥឡូវត្រូវបានលុបចោលមុនពេលព្យុះនេះកើតឡើង ដោយអាកាសយានដ្ឋានពីររបស់ទីក្រុង Dallas រងការវាយប្រហារខ្លាំងបំផុត។

យោងតាមលក្ខខណ្ឌរបស់អាកាសធាតុ ក្រុមអ្នកស្វែងរក និងជួយសង្គ្រោះទីក្រុងចំនួន២៨ កំពុងរង់ចាំត្រៀមដាក់ពង្រាយ និងគាំទ្រប្រតិបត្តិការសង្គ្រោះជីវិត តាមសំណើរបស់អាជ្ញាធរក្រុងនីមួយៗ៕

ប្រែសម្រួល៖ ណឺ មិនា