ឥណ្ឌូណេស៊ី និង​អាមេរិក ចុះហត្ថលេខាលើកិច្ចព្រមព្រៀងពាណិជ្ជកម្ម​បដិការជាផ្លូវការ

ក្រសួងសេដ្ឋកិច្ចឥណ្ឌូណេ​ស៊ីបាន​ឱ្យដឹងនៅថ្ងៃសុក្រនេះ (២០ កុម្ភៈ) ថា ​ឥណ្ឌូណេស៊ី និងសហរដ្ឋអាមេរិកបានចុះហត្ថលេខាលើកិច្ចព្រមព្រៀងស្តីពីពាណិជ្ជកម្ម​បដិការជាផ្លូវការ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះហត្ថលេខានេះ ធ្វើឡើងដោយ​​រដ្ឋមន្ត្រីសេដ្ឋកិច្ចជាន់ខ្ពស់របស់ឥណ្ឌូ​ណេស៊ី លោក Airlangga Hartarto និងតំណាងពាណិជ្ជកម្មសហរដ្ឋអាមេរិក លោក Jamieson Greer ​ក្រោយភាគីទាំង២ចរចាគ្នាអស់រយៈពេលជាច្រើនខែ។

ការព្រមព្រៀងនោះ រាប់បញ្ចូលទាំងការទម្លាក់ពន្ធខ្ពស់លើទំនិញឥណ្ឌូណេស៊ីមកត្រឹម ១៩% ពីអត្រាដើម ៣២% ដែលរដ្ឋបាលរបស់ប្រធានាធិបតី ដូណាល់ ត្រាំ ប្រកាសឡើងកាលពីឆ្នាំមុន។ ​

យ៉ាងណាមិញ ព័ត៌មានលម្អិតផ្សេងទៀត​នៃកិច្ចព្រមព្រៀង មិនត្រូវបានរាប់បញ្ចូលក្នុងសេចក្តីថ្លែងការណ៍​ភ្លាមៗទេ។

​ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ បាន​ដឹកនាំប្រតិភូទៅកាន់ទីក្រុងវ៉ាស៊ីនតោន ដើម្បីកិច្ចព្រមព្រៀងដដែល និងដើម្បីចូលរួមកិច្ចប្រជុំថ្នាក់ដឹកនាំលើកដំបូងរបស់ក្រុមប្រឹក្សាសន្តិភាពរបស់​លោក ​ត្រាំ ។

នៅថ្ងៃសុក្រនេះផងដែរ (ថ្ងៃព្រហស្បតិ៍នៅទីក្រុងវ៉ាស៊ីនតោន) លោក ប្រាបូវូ និងលោក ត្រាំ ​បានចុះហត្ថលេខាលើឯកសារមួយទៀត ​ស្ដីពី «ការអនុវត្តកិច្ចព្រមព្រៀងឆ្ពោះទៅរកយុគសម័យមាសថ្មីសម្រាប់សម្ព័ន្ធភាពសហរដ្ឋអាមេរិក-ឥណ្ឌូ​ណេស៊ី»។ សេតវិមានបាននិយាយថា ឯកសារនេះ «នឹងជួយប្រទេសទាំង២ពង្រឹងសន្តិសុខសេដ្ឋកិច្ច លើកកម្ពស់កំណើនសេដ្ឋកិច្ច ​ដែលនឹង​ឆ្ពោះទៅរក​វិបុលភាពសកលជាបន្តបន្ទាប់»។

ជុំវិញកិច្ចព្រមព្រៀងពាក់ព័ន្ធពាណិជ្ជកម្មផងដែរ កាលពីដើមសប្ដាហ៍ ​ក្រុមហ៊ុនឥណ្ឌូណេស៊ី និងសហរដ្ឋ​អាមេរិក​នានា បានចុះហត្ថលេខាលើកិច្ចព្រមព្រៀងដែលមានតម្លៃប្រមាណ ៣៨,៤ ប៊ីលាន​ដុល្លារ៕ ​