ព័ត៌មានជាតិ
ពិព័រណ៍សៀវភៅ តន្ត្រី សិល្បៈ និងរបាំ លើកទី ៤ បើកជាផ្លូវការជាមួយស្តង់ ជាង ៥០ ចូលរួមតាំងបង្ហាញ
កាលពីថ្ងៃទី ២១ ខែកុម្ភៈ ឆ្នាំ ២០២៦ ថ្មីៗ នេះ នៅបរិវេណសួនច្បារព្រះរាជដំណាក់ ក្រុងសៀមរាប បានប្រែក្លាយជាទីសក្ការៈ នៃចំណេះដឹង និងវប្បធម៌ តាមរយៈការបើកសម្ពោធ «ពិព័រណ៍សៀវភៅ តន្ត្រី សិល្បៈ និងរបាំ លើកទី ៤» ដែលរៀបចំដោយសៀមរាបបណ្ណាល័យ (Siem Reap Library) ក្រោមការគាំទ្រយ៉ាងពេញទំហឹងពីរដ្ឋបាលខេត្តសៀមរាប។


លោក មួន ម៉េតទ្រីសាក់ (Metrisak Moun) និង លោកស្រី Marion Pili ស្ថាបនិកសៀមរាបបណ្ណាល័យ បានឱ្យដឹងថា ព្រឹត្តិការណ៍រយៈពេល ២ ថ្ងៃ ចាប់ថ្ងៃទី ២១-២២ ខែកុម្ភៈ ដោយមានស្តង់ពិព័រណ៍ជាង ៥០ មកពីបណ្តារាជធានី-ខេត្ត នានា ដើម្បីដាក់បង្ហាញស្នាដៃសិល្បៈ និងផលិតផលចំណេះដឹងយ៉ាងសម្បូរបែប។ អ្នកចូលរួមមិនត្រឹមតែបានទស្សនាប៉ុណ្ណោះទេ ប៉ុន្តែថែមទាំងមានឱកាសជួបផ្ទាល់ជាមួយវាគ្មិន និងអ្នកនិពន្ធល្បីៗ ដើម្បីជជែកពិភាក្សា និងទទួលយកបទពិសោធល្អៗ ពីម្ចាស់ស្នាដៃ ជាមួយការតាំងបង្ហាញសៀវភៅដែលពិបាករក និងសៀវភៅទើបចេញផ្សាយថ្មីៗ។ ជាពិសេសព្រឹត្តិការណ៍នេះ ក៏មានកម្មវិធីប្រកួតប្រជែងសមត្ថភាព រួមមានការប្រកួតអានសៀវភៅ ការស្មូត និងការនិទានរឿងសម្រាប់កុមារ។


ស្ថាបនិកសៀមរាបបណ្ណាល័យ បានឱ្យដឹងទៀតថា ពិព័រណ៍លើកទី ៤ នេះ ត្រូវបានរៀបចំឡើងយ៉ាងសម្រិតសម្រាំងសម្រាប់សមាជិកគ្រប់រូបក្នុងគ្រួសារ ចាប់ពីកុមារតូចៗ សិស្សានុសិស្ស រហូតដល់និស្សិតសាកលវិទ្យាល័យ។ កម្មវិធីរួមមាន ការអានសៀវភៅ បង្ហាញសិល្បៈ តន្ត្រី របាំបុរាណ ហ្គេមអប់រំ និងវគ្គចែករំលែកពិសេសសម្រាប់យុវជន ដើម្បីបង្កើនចក្ខុវិស័យក្នុងការសិក្សា និងការរស់នៅ។ ចាប់តាំងពីបង្កើតឡើងក្នុងឆ្នាំ ២០២២ គោលបំណងចម្បង ដើម្បីដាស់ស្មារតីឱ្យពលរដ្ឋខ្មែរស្រឡាញ់ការអាន និងផ្តល់លទ្ធភាពទទួលបានចំណេះដឹងដោយឥតគិតថ្លៃ។


លោក មួន ម៉េតទ្រីសាក់ បានបញ្ជាក់ថា សៀមរាបបណ្ណាល័យ មិនត្រឹមតែជាឃ្លាំងផ្ទុកសៀវភៅប៉ុណ្ណោះទេ ប៉ុន្តែគឺជាពន្លឺ នៃបញ្ញា និងជាទីកន្លែងសុវត្ថិភាពសម្រាប់ការសិក្សាស្រាវជ្រាវ ជាពិសេសការថែរក្សាឯកសារប្រវត្តិសាស្ត្រ អរិយធម៌ និងសិល្បៈខ្មែរ ដើម្បីផ្ទេរចំណេះដឹងទាំងនេះទៅកាន់យុវជនជំនាន់ក្រោយ។ តាមរយៈព្រឹត្តិការណ៍នេះ លោកសង្ឃឹមថា នឹងក្លាយជាវេទិកាមួយដែលតភ្ជាប់ទំនាក់ទំនងរវាងអ្នកប្រាជ្ញ អ្នកនិពន្ធ និងសហគមន៍ ដើម្បីរួមគ្នាបង្កើតគំនិតច្នៃប្រឌិតថ្មីៗ សម្រាប់សង្គមជាតិ និងឈានទៅរកសង្គមពោរពេញដោយចំណេះដឹងពិតប្រាកដ៕
អត្ថបទ ៖ គឿនវេត
-
ព័ត៌មានជាតិ១ សប្តាហ៍ agoពិធី “រៀបមង្គលការលេង” មួយគូ នៅវត្តបឹងត្រាវ ប្រមូលថវិកាសាងសង់វត្ត អបអរបុណ្យចូលឆ្នាំខ្មែរ
-
ព័ត៌មានជាតិ៦ ថ្ងៃ ago៦ថ្ងៃក្នុងព្រឹត្តិការណ៍ «នគរសង្ក្រាន្ត» មន្ទីរសុខាភិបាលរាជធានីភ្នំពេញ បានពិនិត្យ និងព្យាបាលជូនពលរដ្ឋជាង២ពាន់នាក់
-
ព័ត៌មានអន្ដរជាតិ៣ ថ្ងៃ agoខេត្ត Kochi នៅជប៉ុនផ្តល់ប្រាក់ ១២៥ដុល្លារឲ្យអ្នកនៅលីវ ចំណាយលើការណាត់ចួបបង្កើតស្នេហា
-
ព័ត៌មានអន្ដរជាតិ៤ ថ្ងៃ agoត្រាំ ពន្លះ WSJ ថា ជាសារព័ត៌មានវង្វេងផ្លូវ និងជាកាកសំណល់នយោបាយ
-
ព័ត៌មានអន្ដរជាតិ៣ ថ្ងៃ agoវិមានក្រឹមឡាំង៖ ពូទីន ត្រៀមជួបហ្សេលេនស្គី ទាល់តែមានការចុះហត្ថលេខាលើកិច្ចព្រមព្រៀងសន្តិភាព
-
ព័ត៌មានជាតិ១ សប្តាហ៍ agoបដិសេធមិនឱ្យ សម រង្ស៊ី ចូលរួមការជួបជុំសមាគមខ្មែរនៅប៉ារីស គឺដើម្បីបញ្ចៀសការភ្ជាប់ជាមួយបុគ្គលនេះកំពុងជាប់ទោស
-
សន្តិសុខសង្គម២ ថ្ងៃ agoតុលាការខេត្តកំពត បង្គាប់ឲ្យឃុំខ្លួនមន្ត្រីនគរបាលដែលគប់កែវស្រាលើអ្នកចាប់ទឹកកកដាក់ពន្ធនាគារ
-
ព័ត៌មានជាតិ៥ ថ្ងៃ agoមន្រ្តីបរិស្ថានស្នើពលរដ្ឋកុំបរិភោគត្រីងាប់ និងផ្អាកប្រើប្រាស់ទឹកព្រែកត្រែង នៅស្រុករតនៈមណ្ឌល ខេត្តបាត់ដំបង


