ព័ត៌មានអន្ដរជាតិ

លោក Medvedev ៖ មូលដ្ឋានទ័ពអាមេរិកនៅប្រទេសឈូងសមុទ្រជា «ការគំរាមកំហែង» ប្រទេសទាំងនោះទៅវិញទេ

បានផុស

៥ ខែ មុន

នៅ

ថ្ងៃសៅរ៍ ៧ មីនា ២០២៦

ដោយ

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានបង្ហោះនៅលើបណ្តាញសង្គម X នៅថ្ងៃទី៦ខែមីនាថា បណ្តាប្រទេសឈូងសមុទ្រអារ៉ាប់ បានអនុញ្ញាតឲ្យសហរដ្ឋអាមេរិកដាក់មូលដ្ឋានទ័ពនៅលើទឹកដីរបស់ពួកគេ ដោយជឿជាក់បែបឆោតល្ងង់ថា មូលដ្ឋានទ័ពបែបនេះនឹងជួយការពារពួកគេ។ ផ្ទុយទៅវិញ មូលដ្ឋានទ័ពបែបនេះ ជាការ «គំរាមកំហែង» ទៅវិញទេ។

**អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev (រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរុស្ស៊ី TASS បានចុះផ្សាយថា លោក Dmitry Medvedev បានបញ្ចាក់ថា ទីក្រុងវ៉ាស៊ីនតោនប្រើប្រាស់បណ្ដាប្រទេសឈូងសមុទ្រពែរ្យជាមូលដ្ឋាន ដើម្បីការពារប្រទេសតែមួយគត់ ដែលនោះគឺជាសហរដ្ឋអាមេរិក។

លោក Dmitry Medvedev បានលើកឡើងបន្តដោយលើកនូវគំនិតបែបពិចារណាថា សូមគិតដោយប្រុងប្រយ័ត្ននិងហ្មត់ចត់ តើអ្នកពិតជាត្រូវការមូលដ្ឋានទ័ពអាមេរិកឬអត់? ក្នុងករណីវាមិនបានការពារ តែជាការគំរាមគំហែងអាយុជីវិតទៅវិញ។

ការលើកឡើងរបស់លោក Medvedev បានកើតឡើង បន្ទាប់ពីអ៊ីរ៉ង់ក្នុងរយៈពេល ៧ថ្ងៃកន្លងមកនេះ បានបាញ់មីស៊ីល និងយន្តហោះគ្មានមនុស្សបើក (UAV) ជាបន្តបន្ទាប់ចូលទៅក្នុងប្រទេសតាមឈួងសមុទ្រនៅមជ្ឈិមបូព៌ាដែលមានមូលដ្ឋានទ័ពអាមេរិក ដើម្បីឆ្លើយតបទៅនឹងយុទ្ធនាការវាយឆ្មក់ដែលធ្វើឡើងដោយសហរដ្ឋអាមេរិក និងអ៊ីស្រាអែលចាប់តាំងពីថ្ងៃទី២៨ខែកុម្ភៈមកនោះ។

ប្រទេសឈូងសមុទ្រចំនួន៦ រួមមានអារ៉ាប៊ីសាអូឌីត, អារ៉ាប់រួម (UAE) កាតា, គុយវ៉ែត, បារ៉ែន និងអូម៉ង់ សុទ្ធតែអនុញ្ញាតឲ្យសហរដ្ឋអាមេរិកដាក់មូលដ្ឋានទ័ពនៅលើទឹកដីរបស់ពួកគេក្រោមកិច្ចព្រមព្រៀងការពារសន្តិសុខ។

មូលដ្ឋានទ័ព ហេដ្ឋារចនាសម្ព័ន្ធ និងថាមពលមួយចំនួននៅក្នុងប្រទេសទាំងនេះត្រូវបានវាយប្រហារដោយការវាយប្រហាររបស់អ៊ីរ៉ង់ ដែលបង្ខំឲ្យប្រព័ន្ធការពារដែនអាកាសរបស់ពួកគេបាញ់តបតវិញម្តងហើយម្តងទៀត។ យ៉ាងហោចណាស់មានមនុស្ស ១៦ នាក់នៅក្នុងរដ្ឋឈូងសមុទ្រ ត្រូវបានសម្លាប់នៅក្នុងការវាយប្រហាររបស់អ៊ីរ៉ង់៕

អត្ថបទ៖ សាង ស្រីល័ក្ខ