ទោះចេញពីសង្គ្រោះបន្ទាន់ តែស្ថានភាពនាយក្រិនយប់មិញនេះ នៅវង្វេងស្មារតី មិនស្គាល់សូម្បីកូនៗ

នៅយប់ថ្ងៃទី១១ ខែមីនា ឆ្នាំ២០២៦ តារាកំប្លែងអ្នកនាង ប្រិយប្រិយ បានបញ្ជាក់ពីស្ថានភាពជំងឺរបស់នាយក្រិន ក្រោយបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត្រ កាលពីរសៀលម្សិលមិញនេះ ដោយសារតែមេរោគទ្បេីងពេញឈាម និងខួរក្បាល ដល់ថ្នាក់វង្វេងស្មារតី។

យ៉ាងណា ក្រោយបញ្ជូនទៅសង្គ្រោះបន្ទាន់ ស្ថានភាពតារាកំប្លែងដ៏កម្សត់រូបនេះ នៅស្ថិតក្នុងសភាពវង្វេងស្មារតីនៅឡើយ ដោយក្រុមគ្រូពេទ្យបានកំណត់ជំងឺជាជំហានដំបូង គឺរលាកត្រចៀកធ្ងន់ធ្ងរ។ ដោយឡែក ចំពោះបញ្ហាមេរោគដែលនៅក្នុងឈាម ឬអាចប៉ះពាល់ដល់ប្រព័ន្ធប្រសាទខួរក្បាលយ៉ាងណានោះ ក្រុមគ្រូពេទ្យកំពុងបន្តតាមដានបញ្ហាសុខភាពនៅឡើយ មិនទាន់មានការបញ្ជាក់បន្ថែមនៅឡើយទេ។

បើតាមអតីតតារាកំប្លែងអ្នកនាង ប្រិយប្រិយ គិតត្រឹមរាត្រីថ្ងៃទី១១ ខែមីនានេះ នាយក្រិន មិនស្គាល់អ្នកណាទាំងអស់ សូម្បីតែកូនប្រុសស្រីបង្កើតរបស់ខ្លួន។

គួររំលឹកថា នាយក្រិន មានជំងឺរលាកត្រចៀកធ្ងន់ធ្ងរ និងត្រូវបានបញ្ជូនទៅសង្គ្រោះជំហានដំបូងនៅមន្ទីរពេទ្យមួយក្នុងខេត្តបាត់ដំបង តែដោយសារស្ថានភាពនៅតែមិនធូរស្រាល លោក សាវិន ហ្វីលីព ក៏សម្រេចបញ្ជូននាយក្រិន មកសង្គ្រោះបន្ទាន់នៅមន្ទីរពេទ្យកាល់ម៉ែត្រតែម្តង៕