រលកកម្តៅធ្ងន់ធ្ងរ នឹងវាយប្រហារប្រទេសថៃ ដល់ចុងខែមីនា

ប្រទេសថៃបានចេញការព្រមានអំពីរលកកម្តៅក្នុងកម្រិតធ្ងន់ធ្ងរ ចាប់ពីថ្ងៃនេះរហូតដល់ចុងខែមីនា ដោយសីតុណ្ហភាពនៅតំបន់ខ្លះ នឹងកើនលើស៤០°C ឯណោះ។

ដោយដកស្រង់ប្រភពពីនាយកដ្ឋានឧតុនិយម, សារព័ត៌មាន The Nation បានផ្សាយនៅថ្ងៃពុធទី២៥ខែមីនាឆ្នាំ២០២៦ថា រលកកម្តៅនឹងវាយប្រហារប្រទេសថៃ រហូតដល់ថ្ងៃទី៣០ខែមីនា ខណៈតំបន់ប៉ែកខាងជើងនិងកណ្តាល នឹងរងគ្រោះខ្លាំងជាងគេ។

ក្រៅពីកម្តៅ ក៏អាចមានបាតុភូតផ្គររន្ទះនិងខ្យល់កន្ត្រាក់នៅតាមតំបន់មួយចំនួននៃភាគខាងជើង ភាគខាងកើត និងកណ្តាលផងដែរ ដោយសារប្រព័ន្ធសម្ពាធទាប។

នៅភាគខាងជើង សីតុណ្ហភាពអប្បបរមាត្រូវគេព្យាករថា នឹងស្ថិតក្នុងចន្លោះពី ២០°C ទៅ ២៦°C ខណៈសីតុណ្ហភាពអតិបរមានឹងឡើងដល់ ៣៦°C ទៅ ៤១°C។

អ្វីដែលកាន់តែធ្ងន់ធ្ងរគឺថា បើតាមការព្រមានពីនាយកដ្ឋានឧតុនិយម, សន្ទស្សន៍កម្តៅក្នុងខែប្រាំងឆ្នាំនេះ អាចហក់ឡើងលើស ៥២°C ឯណោះអំឡុងខែមេសានិងឧសភា ដែលជាកម្រិតគ្រោះថ្នាក់ខ្លាំង។

សន្ទស្សន៍កម្ដៅ (Heat Index) គឺជាសីតុណ្ហភាពដែល រាងកាយមនុស្សយើងមានអារម្មណ៍ថាក្ដៅជាក់ស្ដែង នៅពេលដែលគេយក កម្ដៅអាកាស (Air Temperature) មកគណនាបញ្ជូលគ្នាជាមួយ សំណើមទាក់ទង (Relative Humidity)។ និយាយឲ្យងាយយល់ វាគឺជាកម្រិតកម្ដៅដែលយើង មានអារម្មណ៍ថា ក្ដៅជាងសីតុណ្ហភាពដែលឃើញនៅលើទែម៉ូម៉ែត្រ។

រម្លឹកទៅឆ្នាំមុន, បើយោងតាមស្ថិតិ ថៃបានកត់ត្រាសន្ទស្សន៍កម្ដៅខ្ពស់រហូតដល់ ៥៩.៥អង្សាសេ ដោយមានមនុស្សចំនួន ២១ នាក់ បាត់បង់ជីវិតដោយសារមូលហេតុពាក់ព័ន្ធនឹងកម្ដៅ៕

អត្ថបទ៖ សុខ សុវណ្ណ