នគរបាលខណ្ឌចំការមន ឃាត់ខ្លួនបុរស០៣នាក់ផឹកស៊ីបង្កសម្លេងរំខាន ខណៈសមត្ថកិច្ចចុះទៅអប់រំបង្កហិង្សាជាមួយសមត្ថកិច្ច

បុរស០៣នាក់បានបង្កហិង្សាជាមួយកម្លាំងសមត្ថកិច្ច បន្ទាប់ពីសមត្ថកិច្ចចុះណែនាំ មិនអោយចាក់ធុងបាស់បង្កសម្លេងរំខាន ដល់ពលរដ្ឋដដទៃ។ ហេតុការណ៍បង្កភ្ញាក់ផ្អើលកាលពីវេលាម៉ោង ១១ និង ២០នាទីយប់ថ្ងៃទី ១២ ខែមេសា ឆ្នាំ២០២៦ នៅតាមបណ្តោយផ្លូវលេខ ១០៥ កែងផ្លូវលេខ ៤២០ សង្កាត់បឹងត្របែក ខណ្ឌចំការមន រាជធានីភ្នំពេញ។

តាមការបញ្ជាក់ពីនគរបាលបានអោយដឹងថា ពលរដ្ឋបានរាយការណ៍មកកាន់សមត្ថកិច្ច ដោយបានប្រាប់ថា មានពលរដ្ឋមួយចំនួន បានធ្វើពិធីចូលបុណ្យឆ្នាំថ្មី (បុណ្យភូមិ) ផឹកស៊ីស្រែកឡូឡា និងចាក់បាស់ឮខ្លាំង រំខានដល់ការរស់នៅ និងដំណេក មិនអាចសម្រាកបាន។ ទើបភ្លាមៗ សមត្ថកិច្ចប៉ុស្តិ៍បានចុះទៅ កាន់ទីតាំងខាងលើ ដើម្បីណែនាំ ទៅកាន់ពលរដ្ឋ កុំអោយបង្កសម្លេងរំខានបន្តទៅទៀត។

ប្រភពពីនគរបាលបន្តថា ខណៈពេលដែលកម្លាំងសមត្ថកិច្ច ធ្វើការហាមឃាត់ណែនាំ ក៏ស្រាប់តែមានជនសង្ស័យ ០៣នាក់ បានស្ទុះមកបង្កហិង្សាជាមួយសមត្ថកិច្ច ទើបមានការផ្អើលឆោរឡោរ ដល់ពលរដ្ឋ ជួយឃាត់បំបែកតែម្តង។ ភ្លាមៗ សមត្ថកិច្ចបានឃាត់យកជនសង្ស័យ ០៣នាក់ ទៅកាន់ប៉ុស្តិ៍ ដើម្បីធ្វើការសួរនាំ។

ក្រោយកើតហេតុ សមត្ថកិច្ចបានបញ្ជូនជនសង្ស័យទាំង ០៣នាក់ ទៅកាន់អធិការដ្ឋាននគរបាលខណ្ឌចំការមន ដើម្បីបន្តនីតិវិធីច្បាប់៕ អត្ថបទ ៖ រដ្ឋា