អ្នកជំនាញ ថា ចំនួនអ្នកស្លាប់ដោយកូវីដពិតប្រាកដនៅ អាមេរិក គឺខ្ពស់ជាងតួលេខផ្លូវការជិតទ្វេដង

អ្នកជំនាញផ្នែកជំងឺឆ្លងកំពូល របស់សហរដ្ឋអាមេរិក លោកវេជ្ជបណ្ឌិត Anthony Fauci បានលើកឡើងថា សហរដ្ឋអាមេរិកមានចំនួនអ្នកស្លាប់ ដោយសារជំងឺកូវីដ ១៩ ច្រើនជាងតួលេខ ដែលបានរាយការណ៍ជាផ្លូវការ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យ ដែលត្រូវបានចងក្រងដោយ សាកលវិទ្យាល័យ Johns Hopkins បានឲ្យដឹងថា មានមនុស្សជាង ៥៨១,៧០០ នាក់ត្រូវបានបញ្ជាក់ថា បានស្លាប់ ដោយសារជំងឺកូវីដ ១៩ នៅសហរដ្ឋអាមេរិក ។ ទោះយ៉ាងណាលោក Fauci បាននិយាយថា គ្មានការសង្ស័យទេ ដែលថាសហរដ្ឋអាមេរិក មានចំនួនអ្នកស្លាប់ខ្ពស់ ដោយសារជំងឺរាតត្បាត ហើយបានអះអាងថា ចំនួនពិតប្រាកដ គឺខ្ពស់ជាងនេះទៅទៀត ។

លោក Fauci បានចង្អុលបង្ហាញតាម ការវិភាគមួយកាលពីថ្ងៃទី ៦ ខែឧសភា ពីវិទ្យាស្ថានវាស់វែង និងវាយតម្លៃសុខភាព របស់សាកលវិទ្យាល័យវ៉ាស៊ីនតោន (IHME) បានបង្ហាញថា ចំនួនអ្នកស្លាប់ ដោយសារជំងឺកូវីដ ១៩ អាចមានប្រហែល ៩០០,០០០ នាក់ ។

ចាប់តាំងពីការផ្ទុះឡើងជាសកល នៅខែមីនា ឆ្នាំ ២០២០ ជំងឺឆ្លងនេះបានជះឥទ្ធិពល ដល់សហរដ្ឋអាមេរិកច្រើនជាងប្រទេសដទៃទៀត ដោយមានជនជាតិអាមេរិកជាង ៣៣.៤ លាននាក់បានឆ្លងជំងឺនេះ ។

កាលពីខែមុន លោក Fauci បានព្រមានថា សហរដ្ឋអាមេរិក ក៏កំពុងតែកើនឡើង នូវករណីជំងឺកូវីដ ១៩ ផ្សេងទៀត ហើយបាននិយាយថា វាជាការខុសសម្រាប់ជនជាតិអាមេរិក ក្នុងការបន្ធូរបន្ថយការពាក់ម៉ាស និងគម្លាតសង្គម ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក​ជោគជ័យ​ចាក់​វ៉ាក់សាំង​ការពារ​មនុស្ស​ចាស់ ខណៈ​យុវវ័យ​វិញ​កំពុង​រងគ្រោះ​ខ្លាំង​ឆ្លង​វីរុស​បំប្លែង​ខ្លួន​ថ្មី

ចុចអាន ៖ ជា​ក្ដី​សង្ឃឹម​មួយ​ទៀត​សម្រាប់​ប្រទេស​ក្រីក្រ ខណៈ​អាមេរិក​បើក​ការ​ចរចា​ជាមួយ WTO ពាក់ព័ន្ធ​ការ​ដក​ប៉ាតង់​ផលិត​វ៉ាក់សាំង