តាលីបង់ ព្រមានលោក បៃដិន ថា នឹងជួបផលវិបាក បើយន្តហោះគ្មានមនុស្សបើកអាមេរិក ចូលដែនអាកាស អាហ្វហ្គានីស្ថាន

ក្រុមតាលីបង់បានព្រមានសហរដ្ឋអាមេរិកថា ពួកគេនឹងប្រឈមមុខនឹងផលវិបាក ប្រសិនបើមិនបញ្ឈប់ការហោះហើរយន្តហោះគ្មានមនុស្សបើក នៅលើដែនអាកាសអាហ្វហ្គានីស្ថានទេនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zabihullah Mujahid អ្នកនាំពាក្យរបស់ក្រុមនេះ បានចោទប្រកាន់ទីក្រុងវ៉ាស៊ីនតោនថា បានរំលោភលើកិច្ចព្រមព្រៀងសន្តិភាព ដែលខ្លួនចុះហត្ថលេខានៅប្រទេសកាតា ដោយបន្តការល្បាតប្រើយន្តហោះគ្មានមនុស្សបើកនៅទូទាំងប្រទេស។

សេចក្តីថ្លែងការណ៍មួយនៅលើបណ្តាញសង្គម Twitter បានឲ្យដឹងថា “យើងសូមអំពាវនាវដល់ប្រទេសទាំងអស់ ជាពិសេសសហរដ្ឋអាមេរិក ឲ្យគោរពអាហ្វហ្គានីស្ថាន ដោយគោរពសិទ្ធិ ច្បាប់និងការប្តេជ្ញាចិត្តអន្តរជាតិ ដើម្បីការពារផលវិបាកអវិជ្ជមានណាមួយ”។

កងកម្លាំងអាមេរិក បានដកចេញទាំងស្រុងពីប្រទេសអាហ្វហ្គានីស្ថាន កាលពីថ្ងៃទី ៣០ ខែសីហា ដោយប្រគល់ការគ្រប់គ្រងប្រទេសនេះទៅឲ្យក្រុមតាលីបង់វិញ បន្ទាប់ពីរដ្ឋាភិបាលដែលខ្លួនបានចំណាយពេលជួយ ២០ ឆ្នាំនិងជួយសាងសង់គិតជាទឹកប្រាក់រាប់ពាន់លានដុល្លារ បានដួលរលំក្នុងរយៈពេលត្រឹមតែប៉ុន្មានសប្តាហ៍។

ប៉ុន្តែលោកប្រធានាធិបតី ចូ បៃដិន បានប្តេជ្ញារក្សាសមត្ថភាពនៅ អាហ្វហ្គានីស្ថាន ដោយអនុញ្ញាតឲ្យអាមេរិក វាយប្រហារគោលដៅភេរវករនៅក្នុងប្រទេសនេះ។

នោះមានន័យថា យន្តហោះគ្មានមនុស្សបើក នៅតែបន្តហោះហើរក្នុងដែនអាកាស អាហ្វហ្គានីស្ថាន ប៉ុន្តែត្រូវលោក Mujahid និយាយថា ជាការរំលោភច្បាប់អន្តរជាតិហើយគួរតែបញ្ឈប់។

ទោះបីជាយ៉ាងណាក៏ដោយ លោកមិនបានបញ្ជាក់ទេថា តើផលវិបាកអវិជ្ជមានដែលលោកលើកឡើង គឺជាអ្វីនោះទេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ យន្តហោះគ្មានមនុស្សបើកអាមេរិក សម្លាប់មេដឹកនាំជាន់ខ្ពស់ក្រុម អាល់កៃដា នៅស៊ីរី