ចិន ប្រកាសបន្តធ្វើទំនើបកម្ម ឃ្លាំងអាវុធនុយក្លេអ៊ែរ

មួយថ្ងៃបន្ទាប់ពីមហាអំណាចពិភពលោក សន្យាថានឹងការពារការរីករាលដាលនៃអាវុធប្រល័យលោក ប្រទេសចិនបាននិយាយកាលពីថ្ងៃអង្គារថា ខ្លួននឹងបន្តធ្វើទំនើបកម្មឃ្លាំងអាវុធនុយក្លេអ៊ែររបស់ខ្លួន ហើយបានអំពាវនាវឲ្យសហរដ្ឋអាមេរិក និងរុស្ស៊ីកាត់បន្ថយការស្តុកទុករបស់ពួកគេ។

នៅក្នុងសេចក្តីថ្លែងការណ៍រួមដ៏កម្រមួយ សហរដ្ឋអាមេរិក ចិន រុស្ស៊ី អង់គ្លេស និងបារាំងបានអះអាងសារជាថ្មីអំពីគោលដៅរបស់ពួកគេ ក្នុងការបង្កើតពិភពលោកដែលគ្មានអាវុធបរមាណូ និងចៀសវាងជម្លោះនុយក្លេអ៊ែរ។

មហាអំណាចនុយក្លេអ៊ែរទាំងប្រាំ ក៏បានប្តេជ្ញាចិត្តក្នុងការរំសាយអាវុធបរមាណូពេញលេញនាពេលអនាគតផងដែរ ព្រោះអាវុធបែបនេះត្រូវបានប្រើប្រាស់ក្នុងជម្លោះ តួយ៉ាងដូចជាអាមេរិកបានទម្លាក់លើប្រទេសជប៉ុននៅចុងបញ្ចប់នៃសង្គ្រាមលោកលើកទីពីរ។

ប៉ុន្តែ​ការ​និយាយ​​នឹង​មិន​ងាយស្រួល​ទេ ស្រប​ពេល​​មាន​ភាព​តានតឹង​កាន់តែ​ខ្លាំងឡើង​រវាង​មហាអំណាច​ពិភពលោក​។

មានការព្រួយបារម្ភជាសកលកាន់តែខ្លាំងឡើង អំពីការធ្វើទំនើបកម្មយោធារបស់ចិន ជាពិសេសបន្ទាប់ពីកងកម្លាំងប្រដាប់អាវុធរបស់ខ្លួនបានប្រកាសកាលពីឆ្នាំមុនថា ពួកគេបានអភិវឌ្ឍមីស៊ីលល្បឿនលឿនជាងសំឡេង ៥ ដង។

សហរដ្ឋ​អាមេរិក​ក៏​បាន​និយាយ​ដែរ​ថា ចិន​កំពុង​ពង្រីក​ឃ្លាំង​អាវុធ​នុយក្លេអ៊ែរ​របស់​ខ្លួន ​ដែល​មាន​ក្បាល​គ្រាប់​ដល់​ទៅ ៧០០ គ្រាប់​នៅត្រឹម​ឆ្នាំ ២០២៧ និង​អាច​ដល់ ១,០០០ គ្រាប់​នៅត្រឹម​ឆ្នាំ ២០៣០។

កាលពីថ្ងៃអង្គារ ប្រទេសចិនបានការពារគោលនយោបាយអាវុធនុយក្លេអ៊ែររបស់ខ្លួន ហើយនិយាយថា រុស្ស៊ី និងសហរដ្ឋអាមេរិក ដែលជាមហាអំណាចនុយក្លេអ៊ែរធំបំផុតរបស់ពិភពលោក គួរតែធ្វើមុនគេលើការរំសាយអាវុធ។

លោក Fu Cong អគ្គនាយកនៃនាយកដ្ឋានគ្រប់គ្រងអាវុធនៅក្រសួងការបរទេសចិន បានប្រាប់អ្នកយកព័ត៌មានថា “សហរដ្ឋអាមេរិក និងរុស្ស៊ីនៅតែមាន ក្បាលគ្រាប់នុយក្លេអ៊ែរ៩០%លើផែនដី។ ពួកគេត្រូវតែកាត់បន្ថយឃ្លាំងអាវុធនុយក្លេអ៊ែររបស់ពួកគេ ក្នុងលក្ខណៈដែលមិនអាចត្រឡប់វិញបាន និងស្របច្បាប់”។

ទោះបីជាយ៉ាងណាក៏ដោយ លោកអះអាងថា “ប្រទេសចិននឹងបន្តធ្វើទំនើបកម្មឃ្លាំងអាវុធនុយក្លេអ៊ែររបស់ខ្លួន សម្រាប់បញ្ហាដែលអាចទុកចិត្តបាន និងសុវត្ថិភាព”៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ចិន អះអាងយកឈ្នះអាមេរិក អភិវឌ្ឍមីស៊ីលល្បឿនលឿនជាងសំឡេងជំនាន់ថ្មី វាយប្រហារគ្រប់កន្លែងលើផែនដី ត្រឹមប៉ុន្មាននាទី