លោក សៀម ភ្លុក ត្រូវតុលាការបង្គាប់ឲ្យឃុំខ្លួន ក្រោយសមត្ថកិច្ចឃាត់ខ្លួនបាននៅថ្ងៃទី ២៧ មេសា

ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេចឃុំខ្លួនលោក សៀម ភ្លុក អតីតស្ថាបនិកគណបក្សបេះដូងជាតិ បន្ទាប់ពីសមត្ថកិច្ចឃាត់ខ្លួនបាន នៅថ្ងៃទី ២៧ ខែមេសា ឆ្នាំ ២០២២ ពាក់ព័ន្ធនឹងករណីក្លែងបន្លំ និងប្រើប្រាស់លិខិតក្លែង។

តាមដីការបស់លោក លិ សុខា ចៅក្រមស៊ើបសួរសាលាដំបូងរាជធានីភ្នំពេញ បានបង្គាប់ឲ្យភ្នាក់ងារមាន សមត្ថកិច្ច នៃកងកម្លាំងសាធារណៈនាំខ្លួនលោក សៀម ភ្លុក ទៅមណ្ឌលអប់រំកែប្រែទី ១(ម១) ដោយអនុវត្តឲ្យបានត្រឹមត្រូវតាមច្បាប់។

ជាមួយគ្នានេះលោកចៅក្រុម ក៏បានបញ្ជាឲ្យប្រធានមណ្ឌលអប់រំកែប្រែទី ១ (ម១) ទទួល និងឃុំខ្លួនលោក សៀម ភ្លុក រហូតដល់មានបទបញ្ជាសម្រេចថ្មី។

សូមជម្រាបថា ចៅក្រមសាលាដំបូងរាជធានីភ្នំពេញ លោក លិ សុខា កាលពីថ្ងៃទី ៤ ខែមេសា ឆ្នាំ២០២២ បានចេញដីកាបង្គាប់ឲ្យកងកម្លាំងមានសមត្ថកិច្ច នាំខ្លួនលោក សៀម ភ្លុក ទៅឆ្លើយបំភ្លឺនៅ សាលាដំបូងរាជធានីភ្នំពេញ ឲ្យបានមុនថ្ងៃទី ២៥ ខែមេសា ឆ្នាំ ២០២២ ពាក់ព័ន្ធនឹងបទចោទ “ក្លែងបន្លំ និងប្រើប្រាស់លិខិតក្លែង” ក្នុងការបង្កើតគណបក្ស បេះដូងជាតិ។

ក្រោយពីឃើញដីការនេះ មានព័ត៌មានមួយចំនួនអះអាងថា លោក សៀម ភ្លុក បានគេចខ្លួនទៅកាន់ទីតាំងមានសុវត្ថិភាព ។ ប៉ុន្តែប្រហែលជាលោក សៀម ភ្លុក មិនអាចគេចខ្លួនបាន ក៏ចេញមុខប្រកាសថា នឹងចូលខ្លួនទៅឆ្លើយបំភ្លឺការពិត នៅចំពោះមុខចៅក្រមស៊ើបសួរ៕

អត្ថបទ៖ ធឿន វ៉ាន់សុង