សម្តេចតេជោ ហ៊ុន សែន៖ ការបាត់បង់ព្រៃឈើ ដោយសារតែប្រជាជនកើនឡើង

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអះអាងថា ការបាត់បង់ព្រៃឈើ គឺដោយសារតែប្រជាជនកម្ពុជាមានការកើនឡើងខ្លាំង។ សម្តេចតេជោ ហ៊ុន សែន បានអះអាងបែបនេះនៅក្នុងពិធីអបអរសាទរទិវាមច្ឆជាតិ ០១ កក្កដា ឆ្នាំ២០២២ ដែលប្រារព្ធឡើងនៅទីតាំងអាងទឹកត្រពាំងថ្ម ភូមិ​ត្រពាំងថ្ម ឃុំ​ប៉ោយចារ ស្រុក​ភ្នំស្រុក ខេត្តបន្ទាយមានជ័យ នៅព្រឹកថ្ងៃសុក្រនេះ។

សម្តេចនាយករដ្ឋមន្រ្តី បានអះអាងបន្ថែមថា នៅពេលដែលប្រជាជនកម្ពុជាមានការកើនឡើង គឺពួកគេមានតម្រូវការដី ដើម្បីបង្កបង្កើតផលសម្រាប់ជីវភាពរស់នៅប្រចាំថ្ងៃ។ បើតាមសម្តេចតេជោ ប្រជាជនកាប់ព្រៃឈើ គឺដើម្បីយកដីដាំដំណាំភោគផល ដែលវាបាត់តែព្រៃឈើ តែដីនៅដដែលទេ។

 ពាក់ព័ន្ធនឹងការបាត់បង់ព្រៃឈើនេះដែរ សម្តេចតេជោ ហ៊ុន សែន ក៏បានប្រតិកម្មទៅនឹងអ្នករិះគន់នានាទាក់ទងនឹងការបាត់បង់ព្រៃឈើ ដោយឲ្យពួកគេប្រគល់ដីមកឲ្យរដ្ឋាភិបាលវិញ ព្រោះដីដែលពួកគេកំពុងបង្កបង្កើតផល គឺបានដោយ​សារតែការកាប់ព្រៃឈើ។ ប៉ុន្តែ សម្តេចក៏បានគូសបញ្ជាក់ថា សម្តេចមិនមែនចង់ទៅរឹបអូសដីពីពួកគេនោះទេ។ យ៉ាងណាក៏ដោយ សម្តេចប្រមុខរដ្ឋាភិបាលកម្ពុជា បានអំពាវនាវឲ្យប្រជាជនកម្ពុជាទាំងអស់ បន្តដាំដើមឈើនានា ហើយបើអាចដាំជារៀងរាល់តែម្តង៕

ដោយ៖ វណ្ណ​ សុគន្ធា