Apple ដំឡើងថ្លៃទូរសព្ទ iPhone ជិតមួយភាគប្រាំ នៅ ជប៉ុន

ក្រុមហ៊ុន Apple Inc បានដំឡើងថ្លៃទូរសព្ទ iPhone ជិតមួយភាគប្រាំ នៅក្នុងប្រទេសជប៉ុន ខណៈប្រទេសនេះ កំពុងប្រយុទ្ធប្រឆាំងនឹងការធ្លាក់ចុះនៃរូបិយប័ណ្ណយ៉េន និងអតិផរណាកើនឡើងខ្ពស់។

គេហទំព័រ Apple បានបង្ហាញថា តម្លៃនាំចូលទូរសព្ទ iPhone 13 របស់ក្រុមហ៊ុន Cupertino ដែលមានមូលដ្ឋាននៅរដ្ឋកាលីហ្វ័រញ៉ា ឥឡូវនេះមានតម្លៃ ១១៧ ៨០០យ៉េន (៨៦៩ ដុល្លារអាមេរិក) ក្នុងមួយគ្រឿង បើប្រៀបធៀបទៅនឹង ៩៩ ៨០០ យ៉េន (៧៣៦ដុល្លារអាមេរិក) កាលពីមុន។

ស្របពេលប្រាក់ដុល្លារកើនឡើង ១៨ភាគរយ បើធៀបនឹងប្រាក់យ៉េន គិតត្រឹមពេលនេះ អ្នកប្រើប្រាស់ត្រូវចំណាយកាន់តែខ្ពស់សម្រាប់ទូរសព្ទ iPhone ដែលគ្របដណ្តប់ទីផ្សារស្មាតហ្វូនរបស់ប្រទេសជប៉ុន។ លើសពីនេះ ប្រជាជនជប៉ុន ក៏កំពុងតស៊ូជាមួយការដំឡើងថ្លៃទំនិញសម្រាប់តម្រូវការប្រចាំថ្ងៃផងដែរ។

ការឡើងថ្លៃទំនិញដ៏ខ្ពស់បែបនេះ គឺជារឿងដែលប្រជាជនជប៉ុនមិនធ្លាប់ជួបប្រទះសោះ ក្នុងរយៈពេលប៉ុន្មានឆ្នាំមកនេះ។
ទោះបីជាយ៉ាងណាក៏ដោយ Apple មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ៕

ប្រែសម្រួល៖ សន្យា

ប្រភព៖ Asian One

ចុចអាន៖ អាមេរិកជំរុញឲ្យ Apple និង Google ដក TikTok ចេញពី App Store